بلوچستان نا وزیر خزانہ نا خاران اٹی پیش بروک آ واقعہ نا مذمت

کوئٹہ۔ 16 جنوری (اے پی پی) بلوچستان نا وزیر خزانہ میر شعیب نوشیروانی بلوچستان نا علاقہ خاران اٹی پیش بروک آ است ہسون واقعہ نا سخت مذمت ءِ کرینے و داواقعہ ٹی ٹھپی مروک آ چنا و ایلو کودک بندغ آتیکن ہمدردی و نیک است خواہی نا درشانی ءِ کرے۔ تینا بیان اٹی صوبائی وزیر خزانہ پارے کہ السی و سرکاری ملکیت آتے نسخان تننگ، راکٹ جلہو آتیٹی کودک جان تے خطرہ ٹی شاغنگ ءِ اسُل منپنہ اوپارے کہ بیدادی و خوف و بھیم ہچ ءُ ویل اسے نا ایسری اف۔ واک انا کاریم اٹ اتنگ آن نئے تو است ءِ کٹنگ مریک و نئے دیرپا امن مننگ کیک۔ بلوچستان نا الس مدام امن ، سگ و تین پہ تینی شرف نا است خواہی نا درشانی ءِ کرینے۔ میر شعیب نوشیروانی پارے کہ ساڑی آ حالیت آتیٹی صوبائی حکومت غٹ فریق آتے اوار ہلسا ہِننگ، السی ویل آتے بِننگ و اوفتا ایسری کن عملی گام گیج کننگ ءِ۔ کھلی کچہری تا کمک اٹ لس شاری تے براہ راست بِننگ انگ ءِ ، وخت اس کہ بے گوا بندغ آتا باندات آ ہم کانودی و آخبتی ایسری نا کنڈآ پیش رفت مننگ ءِ۔ اومستی پارے کہ داوڑنا نازرک وخت اٹی المی ءِ کہ اختلاف آتے گپ وتران و مفاہمت نا کمک اٹ ایسر کننگے، تانکہ بلوچستان ءِ امن، سوگوی و شونداری نا کسر آ دننگ کین۔ صوبائی وزیر خزانہ داعزم انا درشانی ءِ کرے کہ حکومت الس نا جان و مال انا رکھ و صوبہ ٹی امن  کن تینا کوشست آتے برجاتخک، و دعاکرے کہ اللہ تعالیٰ بلوچستان ءِ امن و سکون نا گہوارہ جوڑ کے و ٹھپی تے زوت دراخ جوڑی عطاکے۔ یات سلے کہ خاران اٹی سلہہ بند بندغ آک سٹی پولیس تھانہ غا جلہو کریر و سرکاری و نجی بینک آتے نسخان تسر۔ داواقعہ ٹی گڑاس بندغ ٹھپی ہم مسر۔