پنجاب حکومت بلوچستان نا طالب علم آتا میڈیکل کوٹہ نا چٹفنگ نا فیصلہ غا نظرثانی کے، سینیٹر کامران مرتضیٰ

اسلام آباد۔ 16 جنوری (اے پی پی) سینیٹ  نا دیوان اٹی بلوچستان نا طالب علم آتا میڈیکل کوٹہ و بانی پی ٹی آئی نا اوڑدہی تا بابت اہم سوج آتے ہرفنگا۔ سینیٹر کامران مرتضیٰ ایوان ءِ پارے کہ بولان میڈیکل کالج نا طالب علم آتیکن پنجاب حکومت اناگت کوٹہ ءِ چٹفینے۔ اونا رداٹ مہالو پنجاب حکومت بیست طالب علم آتے کوٹہ غا داخلہ تسکہ، ہرادے بیدس پیشگی حوال نا چٹفنگ ناانصافی ءِ۔ اوخواست کرے کہ پنجاب حکومت دا فیصلہ غا نظرثانی کے۔ سینیٹر جان محمد بلیدی پارے کہ ہائر ایجوکیشن کمیشن بلوچستان کن 300 آن زیات نشست جتا کرینے، ولے پنجاب حکومت اوفتیان ہم تینا نشست آتے چٹفینے، ہراصوبہ نا طالب علم آتون زیاتی ءِ۔ سینیٹر فلک ناز چترالی بانی پی ٹی آئی نا باندات آ ہیت کرساپارے کہ سوج ہرفے کہ مسکوہی وزیراعظم ءِ اوڑدہی نا موکل انت اکن تفننگ انگ ءِ۔ وزیرکانود اعظم نذیر تارڑ ایوان ءِ باوری کرفے کہ میڈیکل طالب علم آتا کوٹہ نا باندات پنجاب حکومت تون ہرفنگک و دوشنبے آ داڑآ رپورٹ پیش کننگک۔ اوپیدوار کرے کہ بانی پی ٹی آئی نا اوڑدہی تا باندات پنجاب حکومت و جیل سپرنٹنڈنٹ نا دنگ اٹ بریک۔ اونا رداٹ قومی اسمبلی ٹی تروک آ ورندی ٹی جیل سپرنٹنڈنٹ پارے کہ خاہوت و شریکِ حیات تون اوڑدہی مننگ ءِ وخت اس کہ سیاسی اوڑدہی تا فیصلہ بندی نا کنڈکٹ ءِ مون آ تخسا کننگک۔ سینیٹر علی ظفر پارے کہ او بانی پی ٹی آئی و بشریٰ بی بی نا وکیل ءِ و اوفتا اوڑدہی تا بابت عدالت آتا مسہ فیصلہ ساڑی ءِ و ہفتہ ٹی اِرادے اوڑدہی تا شیڈول طے ءِ۔ وزیرکانود اعظم نذیر تارڑ پارے کہ بانی پی ٹی آئی نا اوڑدہی تا باندات آ بروک آ ہفتہ ایوان ءِ سرجمی اٹ ورندی تننگک۔