بحرین ءِ شاہ حمد بن عیسیٰ الخلیفہ ءَ صدر آصف علی زرداری ءِ شرپ ءَ نگن دعوت  ءِ مراگش ءِ میزبانی

منامہ۔15جنوری  (اے پی پی): بحرین ءِ بادشاہ حمد بن عیسیٰ الخلیفہ ءَ صدر آصف علی زرداری ءِ شرپ ءَ سرکاری نان ءِ مراگش ءِ میزبانی کت۔ پنچ شمبے ءِ روچ ءَ صدر ءِ بحرین ءِ چار روچی سرکاری تر ءُ تاب ءِ ساھت ءَ نان ءِ مراگش ادا برجم دارگ بوت۔ ایوان ءِ صدر ءِ پریس ونگ ءِ نیمگ ءَ جاڑی بوتگیں بیان ءِ رد ءَ صدر ءِ مملکت ءِ ھمبراھی ءَ بانُک اول بی بی آصفہ بھٹو زرداری ھم ھوار بوتگ۔ شاہ حمد بن عیسیٰ الخلیفہ ءَ صدر ءِ مملکت ءَ را شاہی اصطبل ءَ دارگ بوتگیں دنیا ءِ نامداریں خالص نسل ءِ عرب اسپ پیش داشت انت۔ نجی اصطبل ءِ اے ھاسیں تر ءُ تاب ءِ ساھت ءَ صدر ءَ دگنیا ءِ نامدار تریں گھوڑو آنی چار ءُ تپاسی کت۔ صدر ءَ را ھال دیگ بوت کہ اسپ ءِ میراث ءِ نامداریں سرپرست ءِ بستار ءَ شاہ حمد بن عیسیٰ الخلیفہ ذاتی رنگ ءَ بحرین ءِ کوھنیں نسل آنی رکھینگ ءِ سر ءَ نگرانی کنت ایشی ءِ تہ ءَ الضحہ، کوہیلات الجلبیہ ءُ کوہیلات الفاس ھوار اَنت۔ اے نسل وتی “خالص نسل” ءِ حیثیت ءِ سبب ءَ زانگ بنت ءُ وتی رفتار، ذہانت ءُ جتائیں، تابناکیں زیبائی ءِ سبب ءَ زانگ بنت۔ صدر آصف علی زرداری ءَ نادر نسل آنی رکھینگ ءِ واستہ شاہ حمد بن عیسیٰ الخلیفہ ءِ دل ءِ جہلانکی ءَ گوں کوشست آناں ساڑاھی ءِ درشانی کت۔ آئی ءَ گوشت کہ عرب اسپ پاکستان ءُ بحرین دوئیں ملک آنی یکجائی دود ءُ ربیدگ ءُ اسلامی ورثہ ءِ تہ ءَ یک ھاسیں ءُ مقدسیں جاھے ءِ واھند اِنت ءُ دوئیں ملک آنی نیام ءَ دیریں ءُ مھکمیں سیادی آنی علامت اِنت۔ وشیں ءُ دلپھکی ءِ چاگرد ءَ برجم دارگ بوتگیں نان ءِ ورگ ءَ بحرین ءِ شاہی ٹبر ءِ مزنیں باسک ءُ پاکستانی مزنیں تک ءِ ڈل ءَ بہر زرتگ۔