درئی کارانی کارگس ءِ جارکش طاہر حسین آندرابی ءِ پریس بریفنگ ءَ مزن وزیر ءَ قطری سروکی ءَ را دل یکیمی داتگ کہ پاکستان دمگ ءَ امن ءُ ایمنی ءِ برجائی ءِ واستہ وتی جوانیں کرد ءَ را برجاہ دار ایت

اسلام آباد۔15جنوری  (اے پی پی):درئی کارانی کارگس ءِ جارکش طاہر حسین آندرابی ءَ گوشت کہ مزن وزیر ءَ خطہ ءَ امن، گپ ءُ تران ءُ میانجی داری ءِ دیمروئی ءِ واستہ قطر ءِ تعمیری ءُ فعال کرد ءِ توسیپ کتگ ءُ سفارتی چینل آنی وسیلگ ءَ کش ءُ چیل آنی تہ ءَ کمی ءِ واستہ قطر ءِ بامردیں کوشست آناں من اِتگ۔ پنچ شمبے ءِ روچ ءَ پریس بریفنگ ءِ تہ ءَ آئی ءَ گوشت کہ مزن وزیر ءَ قطر ءِ امیر شیخ تمیم بن حمد التھانی ءَ گوں ٹیلی فون ءِ سر ءَ گپ ءُ تران کنان ءَ قطر ءِ سروکی ءَ را دل یکیمی دات کہ پڑ ءَ امن ءُ ایمنی ءِ برجائی ءِ واستہ پاکستان وتی جوانیں کرد ءَ برجاہ دار ایت۔ جارکش ءَ گوشت کہ آیوکیں روچ آنی تہ ءَ دوئیں سروک آنی نیام ءَ نزیکیں رابطہ ءِ سر ءَ تپاک کنگ بوتگ۔ ترجمان ءَ گوشت کہ دوئیں بامرد آں پاکستان ءُ قطر ءِ نیام ءَ دو نیمگی سیادی آنی استیں جوانیں رھشونی ءِ سر ءَ دل یکیمی ءِ درشان کت ءُ آزمائشی براتی سیادی آناں گیش مھکم کنگ ءِ واستہ وتی یکجائی عزم ءِ سر ءَ پدا زور دات۔ جارکش ءَ گوشت کہ اے موہ ءَ میاں اوستمانی تک ءَ انوگیں جاور ھال ءُ دیمروئی آنی سر ءَ ھم گپ ءُ تران کنگ بوت۔ جارکش ءَ گوشت کہ صدر آصف علی زرداری بحرین ءِ سرکاری تر ءُ تاب ءَ انت۔ صدر ءِ مملکت ءَ بحرین ءِ شاہ حمد بن عیسیٰ الخلیفہ ءَ گوں منامہ ءَ گند ءُ نند کتگ ایشی ءِ تہ ءَ بیپار ءُ سرمایہ کاری، دفاعی کمک، بحرین ءَ پاکستانی کمیونٹی ءِ وشھالی ءُ دمگی ءُ جھان ءِ معاملہ آنی سر ءَ ھیال ریچی کنگ بوتگ۔ دری کارانی کارگس ءِ جارکش ءَ گوشت کہ اے تر ءُ تاب ءِ مول ءُ مراد پاکستان ءُ براتیں خلیج ءِ ملک بحرین ءِ نیام ءَ دیریں کمک ءَ را گیش مھکم کنگ ءِ ھوار تجارتی ءُ اقتصادی شریکداری، دفاعی ءُ ایمنی ءُ مردم آنی نیام ءَ رابطہ آنی تہ ءَ کمک ءِ واستہ نوکیں موہ پیداک کنگ ءِ مول ءُ مراد ءَ کنگ بوھگ ءَ اِنت۔ آئی ءَ گوشت کہ نائب مزن وزیر ءُ دری کارانی وزیر سینیٹر محمد اسحاق ڈار ءَ گوستگیں ھپتگ ءَ پاکستانی ڈل ءِ سروکی ءَ اسلامی کمک ءِ گل او آئی سی ءِ وزیر آنی درئی کار آنی کونسل ءِ 22می غیر معمولی دیوان ءَ ھوار بوتگ ات کہ سومالیہ ءِ دمگ سومالی لینڈ ءِ سر ءَ برجم دارگ بوتگ ات۔ ترجمان ءَ گوشت کہ نائب مزن وزیر ءَ اسرائیل ءِ نیمگ ءَ سومالی لینڈ ءِ دمگ ءِ ناجائز ءُ غیر آئینی منگ ءُ ایشی ءَ پد آئی ءِ یک کارندہ ءِ اودا بے جاہ ءُ سکیں اشتعال انگیزیں تر ءُ تاب ءِ سک باز مذمت کتگ۔ آئی ءَ اے کارروائیاں سومالیہ ءِ میاں اوستمانی تک ءَ منگ بوتگیں سیمسر آنی سر ءَ دیم پہ دیم اُرش لیک اِتگ۔ ترجمان ءَ گوشت کہ نائب مزن وزیر ءَ اسلامی کمک ءِ تنظیم ءِ اصولی موقف ءُ جموں ءُ کشمیر ءِ جیڈھ ءِ گیواری ءِ واستہ آئی ءِ برجاھیں کمک ءِ توسیپ کتگ ءُ او آئی سی ءَ را زور پر داتگ کہ آ جموں ءُ کشمیر ءِ اُلس ءِ وت واجہی ءِ حق ءِ ھاترا وتی کوشست آناں گیش مھکم بہ کنت۔