راجی اسمبلی ءِ اسپیکر سردار ایاز صادق ءَ گورنر خیبرپختونخوا فیصل کریم کنڈی ءَ گوں گند ءُ نند کتگ، ملک ءِ سرجمیں سیاسی جاورحالانی بابت ءَ گپ ءُ تران

اسلام آباد۔15جنوری  (اے پی پی): گورنر خیبر پختونخوا فیصل کریم کنڈی ءَ پنچ شمبے ءِ روچ ءَ پارلیمنٹ گس ءَ راجی اسمبلی ءِ اسپیکر سردار ایاز صادق ءَ گوں گند ءُ نند کت۔ گند ءُ نند ءِ تہ ءَ ملک ءِ سرجمیں سیاسی جاور، راجی معاملہ، پارلیمانی معاملہ ءُ وفاق ءُ صوبہ آنی نیام ءَ ھمگرنچی ءِ ھوالگ ءَ جیڈھ آنی سر ءَ سرجمی ءَ گپ ءُ تران کنگ بوت۔ راجی اسمبلی ءِ اسپیکر سردار ایاز صادق ءَ گوشت کہ جمہوری نظام ءِ برجائی ءِ واستہ توامیں آئینی ءُ کانودی ادارگ آنی نیام ءَ مشورہ ءُ وت مہ وتی کمک ءِ المی انت۔ آئی ءَ اے گپ ءِ سر ءَ زور پر دات کہ پارلیمنٹ ملک ءِ الس ءِ واھشت آنی جارکش اِنت ءُ راجی نپ آنی واستہ کانود سازی ءُ پالیسی سازی ءِ عمل ءَ را وت مہ وتی تپاکی ءَ گوں دیم ءَ برگ بہ بیت۔ اسپیکر قومی اسمبلی ءَ گوشت کہ ملک ءِ استحکام، دیمروئی ءُ السی گہبودی ءِ واستہ وفاق ءُ صوبگ آنی نیام ءَ مھکمیں رابطہ ءُ کمک سک باز المی انت۔ گورنر خیبر پختونخوا فیصل کریم کنڈی ءَ پارلیمنٹ ءِ کرد ءِ توسیپ کنان ءَ وتی اے جزم ءِ درشانی کت کہ صوبہ خیبر پختونخوا جمہوری اقدار ءِ دیمروئی ءُ فیڈریشن ءِ گوما یکجائی ءَ راجی جیڈھ آنی گیواری ءِ تہ ءَ وتی سرجمیں کرد ءَ را برجاہ دار ایت۔ ایشی ءَ چہ پیسر پارلیمنٹ گس ءَ اسپیکر سندھ اسمبلی ءِ اسپیکر اویس قادر شاہ ءُ مزن وزیر ءِ ھاسیں کمکار طارق فاطمی ءَ سردار ایاز صادق ءَ گوں گند ءُ نند کت۔ گند ءُ نند ءِ تہ ملکی کانود ساز ادارگ آنی نیام ءَ وت مہ وتی کمک ءَ را دیمروئی دیگ، پارلیمانی سیادی ءَ را دیمروئی دیگ، موثر کانود سازی ءُ فیڈریشن ءُ صوبہ آنی نیام ءَ ہمگرنچی ءَ را گیش مھکم کنگ ءِ جیڈھ آنی سر ءَ سرجمیں رنگ ءَ گپ ءُ تران کنگ بوت۔ اسپیکر سردار ایاز صادق ءَ گوشت کہ جمہوری نظام ءِ برجائی ءِ واستہ توامیں کانود ساز ادارگ آنی نیام ءَ نزیکیں رابطہ ءُ مشورہ المی انت۔ اے موہ ءِ سر ءَ تران کنان ءَ راجی اسمبلی ءِ اسپیکر سردار ایاز صادق ءَ گوشت کہ راجی ءُ صوبائی اسمبلی ءِ نیام ءَ موثر رابطہ کاری کانود سازی ءِ عمل ءَ را گہتر جوڑ کنگ ءَ المی کرد انت۔ آئی ءَ گوشت کہ پارلیمانی کمک نہ ایوک ءَ راجی جیڈھ آنی گیواری ءَ کمک کنت بلکینگ ءَ جمہوری ارزشت ءُ ادارگی برجائی ءَ را ھم دیمروئی دنت۔ اسپیکر سندھ اسمبلی عویس قادر شاہ ءَ پارلیمانی کمک ءَ را گیش مھکم کنگ ءِ واستہ یکجائی گامگیج آنی ضلورت ءِ سر ءَ زور پر دات ءُ گوشت کہ صوبائی ءُ وفاقی کانود ساز ادارگ آنی نیام ءَ تجروبت آنی مٹ ءُ بدلی ءَ چہ کانود سازی ءِ کوالٹی گہتر بیت۔ مزن وزیر ءِ ھاسیں کمکار طارق فاطمی ءَ ھم پارلیمانی سیادی آنی دیمروئی ءَ را وھد ءِ ضلورت لیک اِتگ ءُ گوشت کہ راجی مفاد ءِ واستہ پالیسی جوڑ کنگ ءِ واستہ فیڈریشن ءُ صوبگ آنی نیام ءَ ھمگرنچی المی اِنت۔ گند ءُ نند ءَ ملک ءِ سیاسی جاور، راجی نپ ءِ ھاسیں جیڈھ ءُ وت مہ وتی نپ ءِ ایندگہ سرھالانی سر ءَ ھم گپ ءُ تران کنگ بوت۔