وزیراعظم شہباز شریف بنجائی دارالحکومت نا شاری تے آسان، شفاف و تیز ترین خذمت آتا فراوانی کن پاکستان آسان خذمت ہند انا بناءِ کرے

اسلام آباد۔ 15 جنوری (اے پی پی) وزیراعظم محمد شہباز شریف بنجائی دارالحکومت نا شاری تے آسان، شفاف و تیز ترین خذمت آتا فراوانی کن پاکستان آسان خذمت ہند انا بناءِ کرے، پنچ شنبے نادے آ بنائی دود آن تران اٹی او پارے کہ دا ہند آن الس ءِ بے پناہ آسانی و چندی محکمہ غاتا بابت خذمت فراوان کننگک، پوسکن آ ٹیکنالوجی آذربائیجان نا کنڈآن ننکن ٹیکی اسے، آذربائیجان نا صدر الہام علیوف نا بھلا کمکاری آ اونا منت وارءِ، ہنداوڑانا ہندآتے آزاد جموں وکشمیر و گلگت بلتستان اٹی ہم جوڑ کننگک۔ داوخت آ بنجائی وزیر انفارمیشن ٹیکنالوجی و ٹیلی کمیونیکیشن شزہ فاطمہ خواجہ، بنجائی وزیر اقتصادی امور احدخان چیمہ ، بنجائی وزیر حوالکاری و شینکاری عطاء اللہ تارڑ، بنجائی وزیر واپار جام کمال خان ، چیف کمشنر اسلام آباد و چیئرمین سی ڈی اے محمد علی رندھاوا، آئی جی اسلام آباد علی ناصر رضوی و ایلو کمامدارآک ہم ساڑی ئسر۔ وزیراعظم محمد شہباز شریف پارے کہ پاکستان آسان خذمت ہند انا بناءِ کننگانے، آذربائیجان نا دورہ ٹی باکو ٹی خذمت ہند انا دورہ ءِ کریسس و دادورہ ٹی فیصلہ کرے کہ داطرزانا ادارہ بنجائی دارالحکومت اسلام آباد و ایلو شار تیٹی ہم جوڑ کیک، دا چرجوئی ٹی آذربائیجان نا صدر الہام علیوف نا بھلا کمکاری آ اونا منت وار اُن۔ پوسکن ٹیکنالوجی آذربائیجان نا کنڈآن ننکن ٹیکی اسے۔ اوپارے کہ پاکستان آسان خذمت ہند آن الس ءِ بے پناہ آسراتی و آسانی دُوبریک، پاکستان آسان خذمت ہند اکن ماسٹرٹرینرز آذربائیجان آن تربیت دوئی کرینے، ماسٹر ٹرینرز خذمت آتا فراوانی ٹی اخلاقی و شرف نا جوزہ غان تینا زمواری تے ادا کیر، آسان خذمت ہند اٹی نادرا، ایکسائز اینڈ ٹیکسیشن ، سی ڈی اے، سوئی گیس وایلو محکمہ غاتون تعلقدار خذمت فراوان کننگک۔ اوپارے کہ آسان خذمت ہند آتے آزادکشمیر، گلگت بلتستان و ایلو شار تیٹی  ملنگک، الس نا خذمت کن ہروخت تیار سلنگ المی ءِ۔ داوخت آ بنجائی وزیرانفارمیشن ٹیکنالوجی شزہ فاطمہ خواجہ پارے کہ پاکستان آسان خذمت ہند السی خذمت آتا نظام اسہ انقلابی گام اسے، پاکستان آسان خذمت ہند اٹی اسہ ہی چھت انا کیرغ آسراتی تا فراوانی ءِ پک کننگ ءِ، آسان خذٰت ہند انا جوڑ کننگ ٹیم ورک انا بھرم ءِ ، داوڑنا ہند کون آ گام گیج آتیان شاری حکومت تون تعلق پین سوگو مریک۔ اوپارے کہ آسان خذمت مرکز نا جوڑ کننگ نا مسخت لس مخلوق کن آسان، شفاف و تیز ترین خذمت آتے پک کننگ ءِ۔ داکان مست وزیراعظم ءِ پاکستان آسان خذمت ہند اٹی دوئی آسراتی تابابت حوال تننگا۔ وزیراعظم آسان خذمت مرکز ناچندی بشخ آتا دورہ ءِ کرے، ہند اٹی تروک آ خذمت آتا جاچ ءِ ہلک و داخذمت آتے پین گچین کننگ کن پارت جاری کرے۔