وزیراعظم شہباز شریف نا کماشی ٹی پاکستان ریلویز اٹی برجااصلاحات و شونداری نا بابت نجی بشخ انا چاہندار آتون سلابتی دیوان

اسلام آباد۔ 15 جنوری (اے پی پی) وزیراعظم محمد شہباز شریف پاکستان ریلویز اٹی ادارہ جاتی و انتظامی کارکڑد ءِپین گچین کننگ کن انقلابی گام گیج آتے المی گوندسا پارت کرینے کہ پاکستان ریلویز بامعنی سلابت آن پد عملی گام گیج آتیا تالان روڈ میپ بروک آ ہفتہ پیش کے۔ وزیراعظم محمد شہباز شریف نا کماشی ٹی پاکستان ریلویز اٹی برجا اصلاحات و شونداری نا بابت نجی بشخ انا چاہندار آتون سلابتی دیوان اس اڈ ہلک۔ وزیراعظم آفس نا میڈیا ونگ انا کنڈآن پنچ شنبے نادے آ جاری بیان نا رداٹ دیوان اٹی بنجائی وزیر ریلوائی محمد حنیف عباسی، بنجائی وزیر خزانہ محمد اورنگزیب، بنجائی وزیر حوالکاری وشینکاری عطاء اللہ تارڑ ، بنجائی وزیر موسمیاتی بدلی مصدق ملک، بنجائی وزیر اقتصادی امور احدخان چیمہ، وزیراعظم نا خصوصی کمکار ہارون اختر، نیشنل کوآرڈینیٹر ایس آئی ایف سی لیفٹیننٹ جنرل (ر) سرفراز احمد و تعلقدار وزارت آتا سیکرٹریک و کمامدارآتیان بیدس نجی بشخ انا چاہندار زید بشیر، پیر سعد احسان الدین و ایلوفک بشخ ہلکر۔ وزیراعظم جم زرگزرانی شونداری، علاقائی صنعت و واپار اٹی کمکاری و السی آسراتی و کمرشل کاریم اٹ اتنگ کن ریلویز نا آب اٹ کارکڑد نا اہمیت ءِ تالان کرسا دوئی ذرائع و زرگزرانی ویل آتیان پد ہم گچین کارکڑد آ وزارت ریلویز نا غٹ ٹیم ءِ شاباشی تس۔ وزیراعظم وزارت ریلویز نا وسیلہ غاتا کمرشل کاریم اٹ اتنگ کن حکمت عملی زوت آن زوت مرتب کننگ نا خصوصی پارت کرے۔ وزیراعظم پارے کہ زرگزران نا جم شونداری، صنعت و واپار و ایلو بشخ آتا گچینی ٹی نجی بشخ انا چاہندار آتون سلابت حکومت نا زرگزرانی اصلاحات نا بشخ ءِ، پاکستان ریلویز کم وسیلہ غاتیان پد ہم بے کچ تندہی و خواری اٹ گچین کارکڑد نا درشانی ءِ کننگ ءِ ہراڑآ بنجائی وزیر ریلویز و اونا ٹیم ستاکڑزک۔ اوپارے کہ پاکستان ریلویز اٹی ادارہ جاتی و انتظامی کارکڑد ءِ پین گچین کننگ کن انقلابی گام گیج دہائی تیان المی ئس، پاکستان ریلویز اٹی برجااصلاحات و اودے پین کٹیائی جوڑ کننگ آن دا ادارہ ملکی صنعت وواپار نا مون آ دننگ و زرکاری نا آسراتی کن اہم کڑد ادا کننگ کیک۔ اوپارت کرے کہ پاکستان ریلویز غٹ تعلقدار اکائی و ادارہ غاتون بامعنی سلابت آن پد عملی گام گیج آتیا تالان روڈمیپ بروک آ ہفتہ پیش کے۔ وزیراعظم پارے کہ پاکستان ریلویز نا زرگزرانی شونداری و علاقائی کمکاری ٹی اہمیت نا رداٹ حکومت انقلابی گام گیج آتا چرجوئی نا بناءِ کرینے ہرانا است جم بھرم مون آ بننگ ءِ، پاکستان ریلوائی نا بابت شونداری کاریم تیکن حکومتی فنڈ آتا دوئی مننگ ءِ دہائی اسکان گوجالنگا ہرا افسوزناک ءِ۔ وزیراعظم پارے کہ بروک آ سال انا پی ایس ڈی پی ٹی ریلویز نا شونداری ڈٹ آتے متناسب بجٹ تننگک، پاکستان ریلویز ءِ جہانی کہول آ جہانی آب انا کمرشل مواصلاتی نظام نا بشخ جوڑ کننگ کن گام گیج وخت انا اہم گرج ءِ، پاکستان اٹ آب اٹ ریلوائی نظام زرگزرانی شونداری و ملکی کٹیاءِ ودفنگ اٹ قابل قدر کڑد ادا کننگ کیک۔ اوریلویز نا پنجر نا کٹیائی کمرشل کاریم اٹ اتنگ کن پرائیویٹ پارٹنر شپ نا گمان تا پبی جاچ ءِ ہلنگ نا ہم پارت کرے۔ اوپارے کہ پاکستان ریلویز نا آب اٹ نظام نئے بیرہ اندرون ملک بلکن علاقائی صنعت وواپار و کمکاری ٹی ہم اہم کڑد تخک ۔ اوپاکستان ریلویز نا منظم نظم و نسق و کٹیائی کمرشل کاریم اٹ اتنگ کن عملی گام گیج آتیا تالان و گچین حکمت عملی زوت گچین مرتب کننگ نا پرمان کرے۔ دیوان اٹی شریک نجی بشخ انا چاہندار آک ریلویز نا کارکڑد ءِ پین گچین کننگ و اونا کمرشل کاریم اٹ اتنگ نا رداٹ چندی سلاہ و سوج پیش کرے۔ وزیراعظم دیوان اٹی شریک نجی بشخ انا چاہندار آتیان قابل قدر سلاہ و سوج پیش کننگ آ منت واری ءِ ہرفے۔