گیس انا مفننگ و کم پریشر ءِ منپنہ، گیس تنکی ءِ ہرحال اٹ ایسر کننگے، وزیراعلیٰ بلوچستان میر سرفراز بگٹی

کوئٹہ۔ 15 جنوری (اے پی پی) وزیراعلیٰ بلوچستان میر سرفراز بگٹی ترند انگا یخ اٹی کوئٹہ ، زیارت، سوئی وقلات اٹی گیس انا کم پریشر و مفننگ آ سخت ترندی نا درشانی ءِ کرسا پارینے کہ الس ءِ داسخت موسم اٹی داوڑنا مشکلات آتا گواچی  کننگ ءِ ہچ ءُ وڑاسے ٹی منپنہ۔ وزیراعلیٰ میر سرفراز بگٹی نا کماشی ٹی پی پی ایل و سوئی سدرن گیس کمپنی نا کمامدارآتا بڑزکو کہولی دیوان چیف منسٹر سیکرٹریٹ اٹی اڈ ہلک ہراٹی بلوچستان اسمبلی نا باسک آک خصوصی بشخ ہلکر۔ دیوان اٹی چندی علاقہ غاتیٹی گیس پریشر اٹی کمتی، مریس بندش و فراوان مفننگ نا بابت غاوتیا سرجمی اٹ سجفنگا ، وزیراعلیٰ بلوچستان گیس شکست آتیا گڑتی نا درشانی ءِ کرسا کمامدارآتے پارت کرےکہ رکھی گام گیج آتے پین گچین ، سخت و نتیجہ خیز جوڑ کننگے تانکہ نہادی انسانی جون تا رکھ پک مرے۔ اوپیدوار کرے کہ صارف آتیکن گیس انا دوئی مفننگ و کم پریشر ءِ منپنہ و دانا دمدستی و آخبتی و عمل نا قابل ایسراس کشنگے۔ میر سرفراز بگٹی پارے کہ بلوچستان کن گیس انا محدود ایلوکیشن صوبہ نا الس تون ناانصافی نامترادف ءِ ہرانا سوب الس شدید اذیت اٹی اختہ ءِ۔ اوپارے کہ دا سنگین حالیت آتیان وزیراعظم ءِ باضابطہ وڑاٹ چٹھی اس نوشتہ کرسا معلومدار کننگک۔ وزیراعلیٰ پارے کہ کوئٹہ و ایلو یخ علاقہ غاتیٹی الس ترند انگا یخ اٹی لڑزنگ اٹی ءِ وخت اس کہ گیس دوئی اف دا حالیت آتے اسُل سگنگ پننگک۔ وزیراعلیٰ بلوچستان پی پی ایل و سوئی سدرن گیس کمپنی نا کمامدار آتے دوٹوک لوز آتیٹی پارت کرے کہ بلوچستان اٹی گیس تنکی ءِ ہرحال اٹ ایسر کننگے۔ اوپارے کہ حکومت السی ویل آتیان پورو وڑاٹ معلومدار ءِ دا باندات اٹی گیس کمپنی تا بہانہ و ڈیوالئی ءِ سگنگ پننگک ہنداسوب آن تعلقدار کمامدارآک الس نا مشکلات آتا دمدستی ازالہ کن گچین گام گیج ہرفر۔