خاتون اول بی بی آصفہ بھٹو زرداری نا منامہ ٹی بحرین نیشنل میوزیم و پرل میوزیم نا دورہ

منامہ۔ 15 جنوری (اے پی پی) خاتون اول بی بی آصفہ بھٹو زرداری منامہ ٹی بحرین نیشنل میوزیم و پرل میوزیم نا دورہ ءِ کرے۔ پنچ شنبے نادے آ ایوان صدر آن جاری بیان نا رداٹ بی بی آصفہ بھٹو زرداری تون اوار بحرین نا وزیر ہاؤسنگ اینڈ اربن پلاننگ آمنہ بنت احمد الرومیحی ہم ئسک۔ میوزیم آ بننگ آ خاتون اول ءِ موزیمز اینڈ کلچر نا ڈائریکٹر جنرل فرح محمد مطر و ڈائریکٹر کمیونیکیشنز اینڈ پارٹنر شپس ہانی علی بہزاد ئسک بخیرکریر۔ دورہ ٹی بی بی آصفہ بھٹو زرداری ءِ ہڑتوم آ عجائب گھر تا دورہ ءِ کرفنگا، ہراڑے بحرین نا پبی دودوربیدہ ئی میرات، تاریخی جڑ و تہذیبی عظمت ءِ گچین وڑاٹ تالان کننگانے۔ اوجم وجوش اٹ مہمانداری  و بحرین نا دودوربیدہ ئی و تاریخی خزانہ غاتے خڑک آن ہُننگ ناموقع غا است اٹ قدردانی نا درشانی ءِ کرے۔ اوقومی میرات آتا رکھ و تاریخ نا رکھ انا اہمیت آ زور شاغسا پارے کہ دا شناخت، سیو ت و بروک آچین تیکن تحریک  نا اہم ءُ ذریعہ اسے۔ خاتون اول دودوربیدہ ئی سفارتکاری ، عجائب گھر تا نیام اٹ شریداری، تعلیمی ہل و تس و آثارقدیمہ نا رکھ انا بشخ آتیٹی پاکستان و بحرین نا نیام اٹ کمکاری نا گیشتر گمان تے ہم تالان کرے۔ اوپارے کہ ہڑتوم آ ملک آک اسہ شاندار تہذیبی میرات تخرہ، ہرافتے ٹی پاکستان نا وادی سندھ انا تہذیب و بحرین نا آثار قدیمہ غا تالان میرات خاص کر دلمون تہذیب اوار ءُ ۔ اوداہیت آ زور شاغا کہ دودوربیدہ ئی میرات آتا رکھ اٹی خڑکی کمکاری ہڑتوم آ قوم تا نیام اٹ السی رابطہ و تین پہ تینی فہم ءِ پین سوگو جوڑ کننگ کیک۔