پاکستانی آڈٹ نظام ءِ ڈیجیٹل جوڑ کننگ اٹ نمان پیش رفت، 2022 آن آڈٹ مینجمنٹ انفارمیشن سسٹم نا تیاری و نافذ کننگ آن اودے پوسکن آ ٹیکنالوجی تون گنڈنگانے، دفترآڈیٹر جنرل

اسلام آباد۔ 15 جنوری (اے پی پی) پاکستان سرکاری بشخ انا آڈٹ نظام ءِ ڈیجیٹل جوڑ کننگ اٹ نمان پیش رفت کرے، 2022 آن آڈٹ مینجمنٹ انفارمیشن سسٹم نا تیاری و نافذ کننگ نا کمک اٹ آڈٹ نا مچ آ عمل ءِ پوسکن آ ٹیکنالوجی تون گنڈنگانے۔ دفتر آڈیٹر جنرل پاکستان نا رداٹ اے ایم آئی ایس(AMIS)آڈٹ پلاننگ آن ہلیس گڈیکو آڈٹ رپورٹ اسکان مچ آ عمل ءِ پورو وڑاٹ ڈیجیٹل کرینے، دا نظام نا سوب آڈٹ نا عمل اٹی کارکڑد، گچینی و شفافیت اٹی نمان گچینی بسنے ہراڑآن السی مالیاتی چاروکی پین سوگو مسنے۔ آڈٹ کمامدارآک پک کرینو کہ داوخت آ اے ایم آئی ایس ءِ اینڈ ٹو اینڈ ڈیجیٹل نظام جوڑ کننگ کن پین ودفنگ نا کاریم برجاءِ ہرانا رداٹ پبلک اکاؤنٹس کمیٹی (پی اے سی) و پرنسپل اکاؤنٹنگ آفیسر آتون ڈیجیٹل انٹر فیس جوڑ کننگ انگ ءِ تانکہ رابطہ کاری و حقی وخت اٹی معلومداری تا ہل و تس ءِ گچین جوڑ کننگ مرے۔ داڑتون اوار اوار آڈیٹر جنرل نا دفتراٹی سینٹر فار گورنمنٹ ڈیٹا اینالیٹکس ءِ ہم پورو وڑاٹ فعال کننگ انگ ءِ ہرانا بناءِ دسمبر 2025 اٹی بنجائی وزیر خزانہ و محصولات محمد اورنگزیب کریسس۔ آخبت نا ڈٹ آتیٹی آڈٹ جاچ پڑتال کن بگ ڈیٹا اینا لیٹکس نا کاریم اٹ اتنگ ہم اوار ءِ ہراڑکن آڈیٹر جنرل نا دفتر مہالو آن چار پوسکن سافٹ ویئر لیسن دوئی کرینے۔ داکان بیدس ڈیجیٹل ڈیٹا نا ہل و تس اٹی مون تروک ویل آتا ایسری کن یونیورسل بزنس لینگویج آب ءِ تینا کننگ نا کوشست ہم برجاءِ۔ کمامدارآتا رداٹ دا گام گیج ملکی آڈٹ نظام ءِ پوسکن جوڑ کننگ، شفافیت ءِ مون آدننگ و سرکاری ادارہ غاتیٹی احتساب ءِ پین سوگو کننگ اٹ اہم کڑد ادا کیک۔