وزیراعظم نا خصوصی کمکار صنعت وپیداوار ہارون اخترخان تون ازبکستان نا نائب وزیر زرکاری، صنعت و واپار شاہ رُخ غلاموف نا اوڑدہی

اسلام آباد۔ 15 جنوری (اے پی پی) وزیراعظم نا خصوصی کمکار صنعت وپیداوار ہارون اخترخان تون ازبکستان نا نائب وزیر زرکاری، صنعت و واپار شاہ رُخ غلاموف نا وزارت صنعت و پیداوار اٹی اوڑدہی مس۔ وزارت صنعت و پیداوار نا کنڈآن جاری بیان نا رداٹ اوڑدہی ٹی پاک۔ ازبک تعلقداری ، ہڑتوم آ کنڈآتا کمکاری نا مون آ دننگ و چندی بشخ آتیٹی شریداری ءِ ودفنگ آ سرجمی اٹ گپ وتران کننگا۔ خصوصی کمکار ہارون اختر خان ازبک نائب وزیر و اونا ڈل ءِ پاکستان آ بننگ آ بخیر اٹ پارسا پارے کہ پاکستان و ازبکستان نا تعلقداری سوگو بنداو تیا قائم ءِ و وخت اتون پین ودنگ اختیار کننگ ءِ۔ اوپارے کہ ہڑتوم آ ملک آتا نیام اٹ سفارتی، زرگزرانی وواپاری رابطہ غاتیٹی نمان ودکی مننگ ءِ، ہرا تین پہ تینی پت و اسیجائی فائدہ غاتا عکاسی ءِ کیک۔ ہارون اخترخان پارے کہ وزیراعظم نا وژن ءِ کہ پاکستان و ازبکستان نا نیام اٹ تین پہ تینی واپار ءِ اِرا ارب ڈالر اسکان ودفنگے، ہراڑکن واپار، زرکاری و صنعتی بشخ آتیٹی کمکاری ءِ مون آ دننگ انگ ءِ۔ اوعلاقائی رابطہ کاری نا کمک اٹ واپار نا مون آدننگ آ ہڑتوم آملک آتا امنائی نا ہم ذکر ءِ کرے۔ ازبک نائب وزیر شاہ رُخ غلاموف داوخت آ پارے کہ پاکستان اسہ دوستانہ ملک اسے و ازبکستان تین پہ تینی فائدہ و اسیجائی شونداری نا خواہندار ءِ۔ اونا پاننگ ئس کہ واپار، زرکاری، سیل و سوات و صنعت نا بشخ آتیٹی کمکاری ءِ پوسکن ءُ جہت اس تننگ نا عزم تخک، وخت اس کہ پاک ۔ ازبک شریداری ڈیہہ اٹی سوگوی و شونہالی نا سوب جوڑمریک۔ اوڑدہی ٹی پاننگاکہ وزیراعظم نا پارت آتیا پاک ۔ازبک اسیجائی ڈٹ آتیکن تعلقدار کمیٹی تے فعال کننگانے و ہڑتوم آملک آتا نیام اٹ مفاہمتی یات داشت (ایم اویوز) آ پیش رفت ترندی اٹ برجاءِ۔