بنجائی وزیر داخلہ محسن نقوی نا نیشنل پولیس اکیڈمی نا دورہ، اے ایس پی تیکن پلاٹ، بیجنگ اٹی تربیت و تنخواہ تیٹی ودکی نا پڑو

اسلام آباد۔ 15 جنوری (اے پی پی) بنجائی وزیر داخلہ محسن نقوی نیشنل پولیس اکیڈمی نا دورہ نا وخت آ زیر تربیت اے ایس پی تیکن بھلا فیصلہ غاتا پڑو کرینے، ہرانا رداٹ پاسنگ آؤٹ آ آفیسر آتے پلاٹ آتا تننگ، اسہ تُو انا تربیت کن چین(بیجنگ) آ گدریفنگ و پولیس آفیسر آتا تنخواہ تیٹی گچینی اتون اوار پروموشن نا ویل آتے دمدستی ایسر کننگ نا منظوری ءِ تننگانے۔ اوپیدوار کرے کہ پولیس فورس ءِ جہانی آب انا رداٹ کننگ کن کسبی مہارت و مالی آسودگی ءِ پک کننگک۔ وزیرداخلہ زیر تربیت آفیسر آتیان تران کرسا پارے کہ ساڑی آ پولیس بیچ ءِ پوسکن آ خواست آتا رداٹ تیار کننگ حکومت نا اولیت ءِ۔ دا چرجوئی ٹی آفیسر آتامالی مشکلات آتے مر کننگ کن خصوصی گام گیج کننگ انگ ءِ و نیشنل پولیس فاؤنڈیشن نا کمک اٹ اوفتے پوسکن آسراتی تننگک۔ دورہ ٹی وزیرداخلہ اکیڈمی نا تزئین و آرائش نا کاریم نا معائنہ ءِ کرے، ہرافتے ٹی کانفرنس ہال، ڈائننگ ہال و ایلو رومک اوار ئسر۔ اوکاریم نا کوالٹی نا بابت کمانڈنٹ اکیڈمی محمد ادریس ءِ المی پارت جاری کرے۔ داوخت آ کمانڈنٹ نیشنل پولیس اکیڈمی وزیرداخلہ ءِ حوال تس وخت اس کہ ڈپٹی کمانڈنٹ ، ایڈیشنل ڈپٹی کمشنر اسلام آباد و ایلو بڑزکو آفیسر آک ہم اوڑتون اوار ئسر۔