صدر آصف علی زرداری ءَ بحرین ءِ شاہ حمد بن عیسیٰ الخلیفہ ءَ گوں گند ءُُ نند کتگ، پاکستان ءُ بحرین ءِ بادشاہی ءِ نیام ءَ نزیکیں ءُ براتی سیادی ءَ را گیش مھکم کنگ ءِ واستہ سرجمیں گپ ءُ تران

منامہ۔ 14 جنوری (اے پی پی): صدر ءِ مملکت آصف علی زرداری ءَ چار شمبے ءِ روچ ءَ بحرین ءِ شاہ حمد بن عیسیٰ الخلیفہ ءَ گوں قصر القذیبیہ ءَ گند ءُُ نند کت۔ گند ءُ نند ءَ پاکستان ءُ بحرین ءِ بادشاہی ءِ نیام ءَ نزیکی ءُ براتی سیادی ءَ را گیش مھکم کنگ ءِ واستہ سرجمیں رنگ ءَ گپ ءُ تران کنگ بوت۔ چار شمبے ءِ روچ ءَ صدارت ءِ پریس ونگ ءِ نیمگ ءَ جاڑی بوتگیں بیان ءِ رد ءَ گند ءُُ نند ءِ تہ دوئیں سروک آں وت مہ وتی کمک ءَ را عملی جہت دیگ ءُُ دو نیمگی سیادی آناں نوکیں رپک دیگ ءِ جزم ءِ درشان کتگ۔ صدر ءِ مملکت ءِ ھمراھی ءَ بانُک اول بی بی آصفہ بھٹو زرداری، سینیٹر سلیم مندیوالا ءُ زراعت بلوچستان ءِ وزیر میر علی حسن زہری ھم ھوار ات۔ صدر ءِ مملکت آصف علی زرداری ءِ آیگ ءَ پد آئی ءَ را گارڈ آف آنر پیش کنگ بوت۔ شاہ حمد بن عیسیٰ الخلیفہ ءَ بحرین ءِ بادشاہی ءِ مستریں اعزاز صدر آصف علی زرداری ءَ را پاکستان ءُ بحرین ءِ سیادی ءِ دیمروئی ءِ ھاتر ءَ آئی ءِ خدمت آنی رد ءَ آرڈر آف شیخ عیسیٰ بن سلمان الخلیفہ (اولی درجہ) داتگ۔ صدر ءَ وتی تاثرات قدس محل ءِ مہمان آنی کتاب ءَ ھم نبشتہ کتگ۔ صدر آصف علی زرداری ءَ بندات ءَ شاہ حمد بن عیسیٰ الخلیفہ ءَ گوں یک پہ یک ءَ گند ءُُ نند کتگ۔ دوئیں راہشوناں پاکستان ءُ بحرین ءِ سیادی ءِ سرجمیں جاور ھال چار ءُ تپاسی کتگ ءُ ایشانی جوانیں رھشونی ءِ سر ءَ دل یکیمی ءِ درشان کتگ۔ صدر ءِ مملکت ءَ بحرین ءِ بادشاہ ءُُ بحرین ءِ سروکی ءِ پاکستان ءِ گوما گرم ءُُ جوانیں مہمانداری ءِ منت گپت ءُُ پاکستان ءِ گوما بحرین ءِ بادشاہ ءِ برجاھیں نیک راھی ءِ ساڑات کت۔ آئی ءَ سیاسی، اقتصادی، دفاعی ءُُ دود ءُُ ربیدگ ءِ پڑ ءَ کمک ءِ دائرہ ءَ را گیش کنگ ءِ واستہ پاکستان ءِ جزم ءِ سر ءَ زور پر دات ءُُ بحرین ءِ بادشاہ ءَ را پاکستان ءِ سرکاری تر ءُُ تاب ءِ دعوت دات۔ ایشی ءَ پد بوتگیں توسیپی گند ءُُ نند ءَ دوئیں نیمگ ءَ تجارتی ءُُ سرمایہ کاری کمک ءَ را گیش کنگ ءِ ٹھوس راہ آنی سر ءَ تران کت۔ صدر آصف علی زرداری ءَ اے گپ ءِ سر ءَ زور پر دات کہ مھکمیں سیاسی سیادی ءَ را گیش بوھوکیں بیپاری ءُُ گہتریں سرمایہ کاری سیادی ءَ را بدل کنگ بہ بیت۔ آئی ءَ بحرین ءِ سرمایہ کار آناں زراعت ءُُ فوڈ سیکیورٹی، آئی ٹی ءُُ ڈیجیٹل سروسز، جان سلامتی، سیل ءُُ سواد ءُُ بنیاتی ڈھانچہ ءَ ھوار پاکستان ءِ اولی ترجی ءِ شوبگ آنی تہ ءَ موہ آناں پٹ ءُُ پول کنگ ءِ دعوت دات ءُُ درملکی سرمایہ کار آناں کمک کنگ ءِ تہ ءَ ھاسیں سرمایہ کاری آسراتی کونسل ءِ آسراتی ءِ کرد ءِ سر ءَ زور پر دات۔ صدر ءِ مملکت ءَ گوشت کہ پاکستان بحرین ءَ را یک ھاسیں اقتصادی شریک لیک ایت ءُُ نزیکیں کمک ءَ چہ دوئیں ملک آنی واستہ وت مہ وتی پائدگ ءِ موہ پیداک بوت کنت۔ آئی ءَ پاکستان ءِ اقتصادی توانائی، دمگی رابطہ ءُُ ہنرمندیں کارکن آنی حوالہ دات ءُُ پائیدار دیمروئی ءُُ مشترکہ وشحالی ءِ واستہ یکجائی منصوبگ آناں دلبڈی دات۔ صدر آصف علی زرداری ءَ دوئیں ملک آنی نیام ءَ دیریں دفاعی ءُُ سلامتی کمک ءَ را دو نیمگی سیادی آنی ستون لیک ات ءُُ اے شریکداری ءَ را گیش مھکم کنگ ءِ واھشت ءِ درشان کت ءُُ سلاہ بندیں اُرد آنی نیام ءَ نزیکیں ادارگی سیادی ءِ ذکر کت۔ صدر ءِ مملکت ءَ دمگی ءُ میاں اوستمانی معاملہ آنی سر ءَ تران کنان ءَ گوشت کہ میاں اوستمانی براتی اے وھد ءَ بے وسی ءُُ ترندی ءَ گوں بدلی ءِ مشکل دور ءَ چہ گوزگ ءَ انت۔ آئی ءَ اے گپ ءِ سر ءَ زور پر دات کہ راج آناں دیم ءَ آیوکیں جھان ءِ نظام ءِ چیلنج آنی دیم ءَ دارگ ءِ واستہ یکجا بوھگی اِنت، پرچا کہ یک دمگے ءَ بے رھبندی ءِ سبب ءَ دگہ دمگ آنی سر ءَ اثر کپت کنت۔ آئی ءَ یکوئی، استحکام، زانت ءُ تحمل ءَ را آیوکیں دور ءِ بنیاتی قدر لیک اتگ ءُُ گوشت کہ اجتماعی جزم ءِ وسیلگ ءَ نہ ایوک ءَ مشکل آنی سر ءَ چہ دیم ءَ رؤگ بیت بلکیں دیمروئی ھم ممکن اِنت۔ صدر آصف علی زرداری ءَ بحرین ءَ نندوکیں پاکستانی کمیونٹی ءَ را شگر ءُُ منت درشان کت ءُُ دوئیں ملک آنی نیام ءَ یک ھاسیں پُل ءِ رنگ ءَ گوشت۔ آئی ءَ بحرین ءِ سروکی ءِ منت گپت کہ آ ملک ءَ نندوکیں ءُُ کار کنوکیں 116ہزار ءَ چہ گیش پاکستانی آناں عزت، موہ ءُُ کمک ءِ پجارینگ ءَ انت ءُُ بحرین ءِ دیمروئی ءُُ راجی سیادی ءِ تہ ءَ آھانی جوانیں کرد ءِ ساڑات کت۔ آئی ءَ اسلام آباد ءَ کنگ حمد یونیورسٹی فار نرسنگ اینڈ الائیڈ میڈیکل سائنسز ءِ جوڑ کنگ ءَ را بحرین ءِ بادشاہ ءِ نیمگ ءَ چہ یک دل ءِ جہلانکی ءِ سوگات لیک اتگ ءُُ پاکستان ءُُ بحرین ءِ نیام ءَ دوستی ءُُ کمک ءِ یک دائمی علامت لیک اتگ۔ دوئیں رہشون آں امن، استحکام ءُُ کثیر جہتی نظام ءِ ھاتر ءَ وتی یکجائی عزم ءِ پدا زور دات ءُُ دمگی چیلنج آناں گیواری ءِ ھاتر ءَ گپ ءُُ تران ءُُ سفارتکاری ءِ ارزشت ءِ سر ءَ زور پر دات۔ آہاں اقوام متحدہ ءَ ھوار میاں اوستمانی فورم آنی تہ ءَ ھاسیں رنگ ءَ مسلم امت ءِ ھوالگ ءَ یکجائی جیڈھ آنی سر ءَ یکجاھیں کوشست آنی ضلورت ءِ سر ءَ تپاک کت۔ صدر آصف علی زرداری ءِ شرپ ءَ برجم داشتگیں ضیافت ءَ گوں تران کنان ءَ شاہ حمد بن عیسیٰ الخلیفہ ءَ پاکستان ءُ بحرین ءَ را براتیں ملک لیک ات کہ آہانی راجدپتری سیادی یکے دومی ءِ شرپ ءُ اِزت، اسلامی براتی ءُ یکجائی مفاد آنی بنیات ءَ انت۔ آئی ءَ صدر ءِ تر ءُ تاب ءَ را دو نیمگی سیادی ءَ را گیش مھکم کنگ ءِ ھاترا یک ھاسیں سنگ میل ءِ رنگ ءَ گوشت ءُُ سیاسی، اقتصادی، تجارتی ءُ دیمروئی شوبگ آنی تہ ءَ کمک ءَ را گیش کنگ ءِ واستہ بحرین ءِ عزم ءِ سر ءَ پدا زور دات۔ بحرین ءِ بادشاہ ءَ بحرین ءِ واستہ پاکستان ءِ برجاھیں کمک، پاکستانی چاگرد ءِ جوانیں ازمت، عرب ءُُ اسلامی دنیا ءِ جیڈھ آنی تہ ءَ پاکستان ءِ کرد ءُُ دمگی ءُ میاں اوستمانی امن ءُُ ایمنی ءِ واستہ پاکستان ءِ کوشست آناں ساڑات۔ اے موہ ءِ سر ءَ پاکستان ءَ بحرین ءِ سفیر محمد ابراہیم عبدالقادر ءُ بحرین ءَ پاکستان ءِ سفیر ثاقب رؤف ھم ساڑی بوتگ اَنت۔ گند ءُ نند ءَ بحرین نیشنل گارڈ ءِ کمانڈر شیخ محمد بن عیسیٰ الخلیفہ ءُ بحرین ءِ دری کارانی وزیر شیخ ڈاکٹر عبداللطیف بن راشد الزیانی ءَ ھم بہر زرتگ۔