مزن وزیر محمد شہباز شریف ءُ قطری امیر شیخ تمیم بن حمد الثانی ءَ یکے دومی ءَ را ٹیلی فون کتگ، براتی سیادی ءَ را گیش مھکم کنگ ءِ واستہ وتی یکجائی جزم ءِ درشان

اسلام آباد۔ 14 جنوری(اے پی پی): مزن وزیر محمد شہباز شریف ءُ قطر ءِ امیر شیخ تمیم بن حمد التھانی ءَ پاکستان ءُ قطر ءِ نیام ءَ برات ءِ سیادی ءَ را گیش مھکم کنگ ءِ واستہ وتی یکجائی ءِ جزم ءِ پدا زور پر دات ءُ میاں اوستمانی تک ءَ نوکیں دیمروئی آنی سر ءَ گپ ءُ تران کت۔ چار شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءَ گوں گتر ءِ امیر شیخ تمیم بن حمد الثانی ءَ ٹیلی فون کتگ۔ گپ ءُ تران ءِ ساھت ءَ دوئیں راہشوناں پاکستان ءُ گتر ءِ نیام ءَ دو نیمگی سیادی ءِ انوگیں رپک ءِ سر ءَ دل یکیمی ءِ درشان کت، براتی سیادی ءَ را گیش مھکم کنگ ءِ واستہ وتی یکجائی جزم ءِ سر ءَ پدا زور دات ءُ میاں اوستمانی تک ءَ نوکیں دیمروئی آنی سر ءَ ھم گپ ءُ تران کت۔ مزن وزیر ءَ خطہ ءَ امن، گپ ءُ تران ءُ ثالثی ءِ دیمروئی ءِ تہا قطر ءِ تعمیری ءُ فعال کرد ءِ توسیپ کت ءُُ سفارتی گیواری ءِ وسیلگ ءَ تناؤ ءَ را کم کنگ ءِ ھاتر ءَ گتر ءِ بامردیں کوشست آناں من اِت۔ آئی ءَ قطری سروکی ءَ دل یکیمی دات کہ پاکستان ھم دمگی امن ءُ ایمنی ءِ واستہ وتی جوانیں کرد ءَ برجاہ دار ایت۔ آیوکیں روچاں نزیکیں رابطہ ءَ برجاہ دارگ ءِ بابت ءَ دوئیں راہشوناں تپاک کتگ۔