اطالوی سفیر ءَ ادارُکی صدر ءَ گوں گند ءُ نند کتگ، جتا جتائیں پڑاں کمک ءِ دیمروئی ءِ بابت ءَ گپ ءُ تران

اسلام آباد۔14جنوری  (اے پی پی): ادارُکی صدر سید یوسف رضا گیلانی ءَ گوں اٹلی ءِ سفیر مارلینا آرمَلّین  ءَ ایوان ءِ صدر ءَ گند ءُ نند کت۔ چار شمبے ءِ روچ ءَ صدر ایوان ءِ میڈیا ونگ ءِ رد ءَ گند ءُ نند ءَ پاکستان ءُ اٹلی ءِ نیام ءَ دو نیمگی سیادی ءَ را گیش مھکم کنگ ءُ جتاجتائیں شوبگ آنی تہ ءَ کمک ءَ را دیمروئی دیگ ءِ راہ آنی سر ءَ ھیال ریچی کنگ بوتگ۔ ادارُکی صدر ءَ گوشت کہ پاکستان ءُ اٹلی ءِ نیام ءَ 75سال ءَ چہ گیش ءِ سفارتی سیادی جوڑ کتگ، ایشی ءِ بنیات ءَ ھاسیں میاں اوستمانی فورم آنی تہ ءَ دیریں دوستی ءُ وت مہ وتی کمک ءِ سر ءَ انت۔ آئی ءَ کثیر جہتی پلیٹ فارمز ءِ سر ءَ اٹلی ءِ کمک ءِ توسیپ کت ءُ اطالوی حکومت ءِ منت گپت ءُ گوشت کہ اطالوی حکومت 3لکھ ءَ چہ گیش پاکستانی مہاجر آناں میزبانی کنگ ءَ اِنت۔ سید یوسف رضا گیلانی ءَ پاکستان ءَ ھاسیں رنگ ءَ دوا ءُ درمان، تیل ءُ گیس ءُ ریلوے ءِ شوبگ ءَ اطالوی کمپنی آنی ھست بوھگ ءِ ذکر کت ءُ پاکستان ءِ تجارتی ءُ سرمایہ کاری سیادی آناں گیش وسعت دیگ ءِ واھشت ءِ درشان کت۔ آئی ءَ اٹلی ءَ روگ ءَ پاکستانی شہری آنی واستہ ویزہ ءِ عمل ءَ را ترند کنگ ءِ ضلورت ءِ سر ءَ ھم زور پر دات ءُ لیبر مائیگریشن پروگرام ءِ چیر دستی ءَ ہنرمندیں کارندہ آنی کوٹہ ءَ را گیش کنگ ءِ واھشت ءِ درشان کت ایشی ءِ واستہ دوئیں ملک آنی نیام ءَ یک مفاہمت نامہ ءِ سر ءَ ھلاسی کنگ بوھگ ءَ اِنت۔ اٹلی ءِ سفیر ءَ گوشت کہ اٹلی پاکستان ءِ گوما وتی دیریں دوستی ءَ را سک باز ارزشت دنت ءُ پاکستان اولی ملک آنی تہ ءَ ھوار اِنت کہ ایشی ءِ گوما اٹلی ءَ سفارتی سیادی جوڑ کتگ۔ آئی ءَ گوشت کہ 2025 ءَ اٹلی ءَ 15 ہزار ءَ چہ گیش پاکستانی نودربر آناں ویزہ داتگ کہ آ اٹلی ءِ یونیورسٹی آنی تہ ءَ پوسٹ گریجویٹ ءُ پی ایچ ڈی پروگرام آنی تہ ءَ داخلہ بوتگ اَنت۔ اٹلی ءَ ھاسیں رنگ ءَ سائنسی پڑ، آئی ٹی ءُ جان سلامتی ءِ شوبگ ءَ ہنرمندیں مردمی قوت ءِ کمی ءِ حوالہ ءَ آئی ءَ گوشت کہ اٹلی ءِ ادارگ پاکستانی یونیورسٹی آنی نیمگ ءَ روزگار ءِ موہ آناں گہتر کنگ ءِ واستہ اطالوی زبان ءِ کورس بندات کنگ ءِ گامگیج ءَ را وش اتک کن اَنت۔ دیوان ءَ وانگ ءُ زانگ، ہجرت، تجارت ءُ مردم ءِ نیام ءَ رابطہ ءَ ھوار جتا جتائیں پڑ آنی تہ ءَ دو نیمگی کمک ءَ را گیش ءُ گیوار کنگ ءِ عزم ءِ پدا پدر کنگ بوت۔