اسلام آباد۔14جنوری (اے پی پی): راجی ورثہ ءُ دود ءُ ربیدگ ءِ وفاقی وزیر اورنگزیب خان کھچی ءَ چار شمبے ءِ روچ ءَ جمہوریہ کرغزستان ءِ سفیر کیلیچ بیک سلطان ءَ گوں گند ءُ نند کت، ایشی ءِ تہ ءَ دو نیمگی دود ءُ ربیدگی کمک ءُ مردم آنی نیام ءَ رابطہ آنی دیمروئی ءِ سر ءَ گپ ءُ تران کنگ بوت۔ گند ءُ نند راجی ورثہ ءُ دود …
راجی میراث ءُ دود ءُ ربیدگ ءِ وفاقی وزیر اورنگزیب خان کھچی ءَ جمہوریہ کرغزستان ءِ سفیر کیلیچ بیک سلطان ءَ گوں گند ءُ نند کت، دو نیمگی دود ءُ ربیدگ ءِ کمک ءُ مردم ءِ نیام ءَ رابطہ ءِ دیمروئی ءِ بابت ءَ گپ ءُ تران
گیشتریں ھال
اسلام آباد۔14جنوری (اے پی پی): راجی ورثہ ءُ دود ءُ ربیدگ ءِ وفاقی وزیر اورنگزیب خان کھچی ءَ چار شمبے ءِ روچ ءَ جمہوریہ کرغزستان ءِ سفیر کیلیچ بیک سلطان ءَ گوں گند ءُ نند کت، ایشی ءِ تہ ءَ دو نیمگی دود ءُ ربیدگی کمک ءُ مردم آنی نیام ءَ رابطہ آنی دیمروئی ءِ سر ءَ گپ ءُ تران کنگ بوت۔ گند ءُ نند راجی ورثہ ءُ دود ءُ ربیدگ ءِ ڈویژن ءَ برجم دارگ بوت، ایشی ءِ تہا وفاقی وزیر ءُ سیکرٹری ءَ کرغزستان ءِ سفیر ءَ را گہتری ءَ گوں وش آتک کت۔ گند ءُ نند ءِ ساھت ءَ وفاقی وزیر اورنگزیب خان کھچی ءَ کرغزستان ءِ صدر صادِر نورگوزوئیوچ ژاپاروف ءُ پاکستان ءِ مزن وزیر محمد شہباز شریف ءِ نیام ءَ گوستگیں گند ءُ نند ءِ حوالہ دات کہ ایشی ءِ تہ ءَ دو نیمگی کار آنی ھاسیں رنگ ءَ مردم آنی نیام ءَ رابطہ آنی دیمروئی ءِ سر ءَ گپ ءُ تران کنگ بوتگ۔ سفیر ءَ را ھال دیگ بوت کہ مزن وزیر محمد شہباز شریف ءُ دری کارانی وزارت ءِ ہدایت ءِ رژنائی ءَ مارچ 2026 ءِ گڈی ہفتگ ءَ اسلام آباد ءَ کرغز دود ءُ ربیدگ ءِ روچانی برجم دارگ ءِ منصوبگ است انت، چہ یک ءَ بگر داں دو روچی مراگش ءَ کرغز دستکاری، وردن ءُ وراک، روایتی پوشاک، آرٹ ءُ فوٹو گرافی نماش، فلم شو، ساز ءُ زیمل ءَ ھوار ناچ، ءُ دگہ دود ءُ ربیدگی کارانی سرا کار کنگ بیت۔ پاکستانی حکومت تر ءُ تاب کنوکیں ڈل ءِ واستہ دمگی مہمان داری ءِ بندوبست ءَ کنت۔ گند ءُ نند ءَ اے گپ ھم سرپد کنگ بوت کہ پاکستان ءَ نوروز ءِ مراگش ھم برجم دارگ ءِ منصوبگ اِنت کہ ایشی ءِ تہ ءَ کرغزستان ءَ ھوار پاکستان ءَ گوں سفارتی سیادی داروکیں جتا جتائیں ملک آناں دعوت دیگ بیت۔ کرغزستان ءِ سفیر ءَ گوشت کہ آ وتی حکومت ءَ گوں رابطہ کنت ءُ اے ماہ ءِ گڈ ءَ وتی بھر زوری ءِ تصدیق کنت تانکہ اے بندوبست وھد ءِ سر ءَ سرجم کنگ بہ بنت۔ آئی ءَ گوشت کہ کرغزستان ڈل ءِ لاہور ءِ تر ءُ تاب ءِ ھم ارادہ انت۔ وفاقی وزیر ءَ سوج دات کہ اسلام آباد ءَ مراگش ءَ پد ڈل لاہور ءِ ھم تر ءُ تاب کت کنت۔ گیش ءَ چہ گیش ھال دیگ بوت کہ پاکستانی نیمگ ءَ چہ راجی ورثہ ءُ دود ءُ ربیدگ ءِ بہر ءِ جوائنٹ سیکرٹری (اے اینڈ آئی سی) سمرین زھرہ ءَ را پاکستانی نیمگ ءَ چہ فوکل پرسن ءِ بستار ءَ گچین کنگ بوتگ وھدیکہ کرغزستان ھم وتی نیمگ ءَ چہ فوکل پرسن نامزد کنت۔ سفیر ءَ را لاہور ءَ کرغزستان ءِ اعزازی قونصل جنرل ءِ گوما رابطہ ءِ دیوان ءِ بندوبست کنگ ءِ ھم گشگ بوتگ۔ گند ءُ نند ءِ گڈسرا دوئیں رہشونانی نیام ءَ سوغات ءِ بدلی کنگ بوت ءُ پاکستان ءُ کرغزستان ءِ نیام ءَ دود ءُ ربیدگ ءِ سیادی ءَ را گیش مھکم کنگ ءِ ھاترا وتی جزم ءِ درشان کت۔
