تعلیمی سفارتکاری میاں اوستمانی سیادی ءِ یک دائمی ءُ موثریں وسیلہ یے، ادارُکی صدر سید یوسف رضا گیلانی لندن یونیورسٹی ءِ ڈل ءُ پیسریگیں نودربر آنی شرپ ءَ برجم داشتگیں وش اتکی دیوان ءَ گوں تران

اسلام آباد۔14جنوری  (اے پی پی): ادارُکی صدر سید یوسف رضا گیلانی ءَ وانگ ءُ زانگ ءِ سفارتکاری ءَ را میاں اوستمانی سیادی ءِ یک دائمی ءُ موثر وسیلگ لیک اتگ ءُ گوشت کہ ملک ءِ وانگ ءُ زانگ ءِ شوبگ ءَ جہلیں جیڈھ آنی گیواری ءُ ورناہ آناں ترندیں رنگ ءَ بدل بوھوکیں دگنیا ءِ واستہ تیار کنگ ءِ واستہ پائیدار وانگ ءُ زانگ ءِ شریکداری المی انت۔ آئی ءَ اے ھیالانی درشانی یونیورسٹی آف لندن ءِ ڈل ءُ ایشی ءِ پیسریگیں نودربر آنی شرپ ءَ ادا برجم داشتگیں وش اتکی دیوان ءَ گوں تران کنان ءَ کت۔ ادارُکی صدر ءِ مملکت ءَ گوشت کہ ڈل ءِ ساڑی پاکستان ءُ برطانیہ ءِ نیام ءَ زانشت ءُ واھشت ءُ شریکداری ءِ مھکمیں پُل ءِ علامت اِنت۔ آئی ءَ لندن یونیورسٹی ءِ جھان ءِ بستار ءُ نزیک ءَ دو سد سال ءِ تہ ءَ ھواریں جتا جتائیں پڑ آنی تہ ءَ انسانی دیمروئی ءِ واستہ آئی ءِ ھزمت آناں یات دات۔ ادارُکی صدر ءِ مملکت ءَ گوشت کہ پاکستان ءِ بازیں نامداریں مردم لندن یونیورسٹی ءَ چہ گریجویٹ اَنت ایشاں سرکاری ازمت، کانود، میڈیسن، ٹیچنگ، کامرس ءُ سفارتکاری ءِ وڑیں شوبگ آنی تہ ءَ جوانیں ازمت کتگ۔ اے مشترکہ تعلیمی میراث دو نیمگی تعلیمی کمک ءِ بنیاد ءَ دات کنت ءُ تعلقات ءِ دیمروئی ءِ ھاتر ءَ یک مھکمیں بُن ھشتے جوڑ کنت۔ آئی ءَ گوشت کہ یونیورسٹی ءِ میاں اوستمانی پروگرام ءُ منظور شدہ وانینگ ءِ مراگش آنی وسیلگ ءَ ھزاراں پاکستانی نودربر آناں ملک ءَ چہ درآھگ ءَ ابید جھان ءِ درجہ ءِ وانگ ءُ زانگ ءِ موہ رستگ، ایشی ءَ چہ وانگ ءُ زانگ ءِ راج دوستی ءِ تہ ءَ کمک رستگ ءُ ورنا پاکستانی وتی وطن ءَ نندگ ءِ وھد ءَ جھان ءِ پڑ ءَ مقابلہ کنگ ءِ ھاترا توانمند بوتگ اَنت۔ ادارُکی صدر ءَ اے گپ ءِ سر ءَ زور پر دات کہ ملک اے وھد ءَ وانگ ءُ زانگ ءِ دیمروئی ءِ تہ ءَ یک نازرکیں موڑ ءِ سر ءَ اِنت ، لس مھلوک ءُ استاد آنی کوشست آنی باوجود وانگ ءُ زانگ ءِ پڑ انگت ءَ بازیں جیڈھ آنی آماچ اِنت ، ایشانی تہ ءَ مزنیں کساسے ءَ چہ وانگجاہ ءَ دریں زھگ ، جنسی نابرابری ، ءُ دمگی نابرابریاں کہ ھاسیں رنگ ءَ جنکیں دمگ ءُ دمگاں تاوان رسیت۔ آئی ءَ یات کت کہ اے چیلنج آنی رد ءَ حکومت ءَ 2024 ءَ راجی وانگ ءُ زانگ ءِ ایمرجنسی ءِ جار جتگ ات تانکہ وفاقی ءُ صوبائی تک ءَ یکجاھیں کوشست آنی وسیلگ ءَ وانگ ءُ زانگ ءِ یکسانیں رسائی ءَ را دل یکیمی کنگ ءُ وانگ ءُ زانگ ءِ کوالٹی ءَ را گہتر کنگ بہ بیت۔ آئی ءَ راجی وانگ ءُ زانگ ءِ پالیشی ءِ دیمروئی ءِ چارچوب 2024 ءَ را اصلاحات ءِ واستہ یک جامع روڈ میپ ءِ رنگ ءَ بیان کتگ ءُ بے نظیر وانگ ءُ زانگ ءِ اسکالرشپ ءِ وڑیں گامگیج آنی حوالہ داتگ کہ ایشی ءَ چہ زھگ آناں مشروط مالی کمک رس ایت تانکہ اسکول ءِ تہ ءَ داخلہ ءُ حاضری ءِ ترغیب دیگ بہ بیت۔ آئی ءَ 2022ءِ سیلاب ءَ ھوار موسمی آفت آنی وانگ ءُ زانگ ءِ بنیاتی ڈھانچگ ءِ سر ءَ اثر ءِ ھم ھال دات ءُ یک تابکاریں وانگ ءُ زانگ ءِ نظام ءِ ضلورت ءِ سر ءَ زور پر دات۔ ادارُکی صدر ءَ گوشت کہ مزن وزیر ءُ راجی اسمبلی ءِ اسپیکر ءِ بستار ءَ ھوار آئی ءِ جتا جتائیں آئینی عہدہ آنی ساھت ءَ آئی ءِ واستہ وانگ ءُ زانگ مدام اولی ترجی بوتگ۔ آئی ءَ سوات یونیورسٹی ءِ وڑیں نوکیں ادارگ آنی جوڑ کنگ ءَ را اے باور ءِ عملی مثال لیک اِت کہ وانگ ءُ زانگ تنازعہ، انتہا پسندی ءُ پدمنتگی ءِ ھلاپ ءَ گیشتریں موثریں پسو اِنت۔ آئی ءَ گوشت کہ 2024 ءَ چہ سینیٹ ءِ چیئرمین ءُ اے وھد ءَ ادارُکی صدر ءِ بستار ءَ منی ھیال انت کہ وانگ ءُ زانگ ءِ تہ ءَ سرمایہ کاری ھرچ ءُ درچ نہ انت بلکینگ ءَ راجی دیمروئی ءِ بنیات انت۔ آئی ءَ گوشت کہ سینیٹ ءَ مدام وتی قانون ساز ءُ نگرانی ءِ کرد ءِ وسیلگ ءَ وانگ ءُ زانگ ءِ واستہ برجاھیں فنڈنگ ​​ءُ اصلاحات ءِ حمایت کتگ۔ سید یوسف رضا گیلانی ءَ گوشت کہ مرچیگیں دور ءَ کہ دگنیا ترندیں ٹیکنالوجی ءِ بدلی، موسمی چیلنج ءُ مصنوعی ذہانت ءِ دیمروئی ءَ چہ گوزگ ءَ انت، وانگ ءُ زانگ ءَ را راجی سیمسراں چہ دیم ءَ شتگ۔ آئی ءَ گوشت کہ پاکستان ءِ نیمگ ءَ اے آئی پالیسی 2025 ءُ ڈیجیٹل سیکٹر روڈ میپ 2025–2035 ءِ منظوری ورنا آناں ڈیجیٹل معیشت ءِ واستہ تیار کنگ ءِ جزم ءِ درشان اِنت وھدیکہ آئی ٹی ءِ برآمدات 3.8ارب ڈالر ءَ سر بوتگ ءُ سالانہ ءِ تہ ءَ نزیک ءَ 20درسد ءِ شرح ءَ گیشی بوتگ۔ آئی ءَ گوشت کہ ایوک ءَ ٹیکنالوجی بس نہ اِنت بلے لندن یونیورسٹی ءِ وڑیں ادارگ آنی گوما گہتریں سیادی ءِ ضلورت اِنت تانکہ گنجائش ءَ را گیش کنگ، وانینگ ءِ کوالٹی ءَ را گہتر کنگ ءُ جوانیں کار ءِ واستہ دلبڈی دیگ بہ بیت۔ ادارُکی صدر ءَ امیت کت کہ ڈل ءِ تر ءُ تاب ءَ چہ نوکیں موہ پیداک بنت ھاسیں رنگ ءَ نودربر آنی واستہ کہ آئی ءَ آھاں ملک ءِ آیوکیں وھد لیک اتگ۔ ایشی ءَ چہ پیسر وفاقی وزیر انفارمیشن ءُ براڈکاسٹنگ عطا اللہ ترار ءَ یونیورسٹی آف لندن ءِ پاکستان ءِ گوما دیریں سیادی ءُ آئی ءِ کانود ءِ پروگرام آنی تہ ءَ پاکستان ءَ گوں سیادی داروکیں ماڈیول آناں ھوار کنگ ءِ توسیپ کت۔ آئی ءَ گوشت کہ یونیورسٹی ءَ چہ یک ایلومنائی ءِ بستار ءَ رستگیں وانگ ءُ زانگ ءَ چہ آئی ءِ پیشہ وارانہ مہارت ءُ سرکاری ھزمت ءَ را مھکم کتگ۔ لندن یونیورسٹی ءِ پرو وائس چانسلر پروفیسر فل آلمینڈنگر ءَ وتی وش اتکی گشتانک ءِ تہ ءَ گوشت کہ ادارگ پاکستان ءِ گوما کمک ءَ را آیوکیں وھد ءِ جوڑ کنگ ءِ واستہ وژنری حکمت عملی ءِ بھر لیک ایت۔ آئی ءَ گوشت کہ پاکستان ءَ یونیورسٹی ءِ یک مھکمیں ایلومنائی نیٹ ورک ءِ است اِنت ایشی ءِ تہ ءَ  25ایلومنائی  ایمبیسڈر پبلک پالیشی ءُ گورننس ءِ تہ ءَ کرد پیلو کنگ ءَ اَنت۔ آئی ءَ گوشت کہ لندن یونیورسٹی ءِ نیمگ ءَ چہ یک ڈلے اے سال ءَ لاہور، اسلام آباد ءُ کراچی ءِ تر ءُ تاب ءَ کنت ءُ انوگیں ءُ پیسریگیں نودربراں گوں گند ءُ نند کنت ءُ سرکاری نمائندگاں گوں گپ ءُ تران کنت۔ آئی ءَ پاکستان ءِ واستہ ھاسیں اسکالرشپ پروگرام ءِ ھم جار جتگ ایشی ءِ تہ ءَ سئے فول ٹائم اسکالرشپ ھوار اَنت وھدیکہ سرجمیں دگنیا ءَ چہ چل ءَ چہ گیش پاکستانی نودربر اے سال ءَ یونیورسٹی آف لندن ءِ اسکالرشپ ءَ چہ سیت چست کن اَنت۔ پاکستان ءَ برٹش کونسل ءِ سروک جیمز ہیمپسن ءَ گوشت کہ وانگ ءُ زانگ پاکستان ءُ برطانیہ ءِ سیادی آنی یک ھاسیں کنٹگ انت۔ آئی ءَ لندن یونیورسٹی ءَ را برطانیہ ءِ مستریں دوری وانگ ءِ ادارگ لیک اِتگ ءُ گوشتگ کہ مرچی برطانیہ ءَ ھزاراں پاکستانی وانگ ءَ اَنت . آ ملک ءِ تہ ءَ ھاسیں پجّار آنی سر ءَ کار کنگ ءَ اَنت کہ ایشی ءَ چہ تعلقات عامہ ءَ را مھکم کنگ بوھگ ءَ اِنت۔ سپریم کورٹ ءِ جج جسٹس عائشہ اے ملک ءَ گوشت کہ محترمیں ایلومنائی کمیونٹی ءِ باسک بوھگ ھم گوں ذمہ واری ءَ کیت۔ آئی ءَ وانگ ءُ زانگ ءِ رسائی ءَ را بنیاتی ھک لیک اِتگ ءُ گوشت کہ مزنیں ادارگ آنی گریجویٹ آناں ادارگ جوڑ کنگ ءُ سٹینڈرڈ آنی برجائی ءِ تہ ءَ کرد پیلو کنگی اِنت ھاسیں رنگ ءَ ھما مردمانی واستہ کہ آھاں اے وڑیں موہ نیست۔