سی پی اے ءِ بابت ءَ پاکستان ءُ امارات ءِ نیام ءَ تکنیکی گپ ءُ تران گڈی پڑ ءَ داخل بوتگ انت، جامع اقتصادی شریکداری ءِ منوگری زوت چہ کار ءَ درکپگ ءَ انت، تجارت ءِ وفاقی وزیر جام کمال خان

اسلام آباد۔14جنوری  (اے پی پی): وفاقی وزیر برائے تجارت جام کمال خان ءَ گشتگ کہ پاکستان ءُ امارات ءِ نیام ءَ سی پی اے ءِ بابت ءَ تکنیکی گپ ءُ تران گڈی پڑ ءَ اتکگ انت، ءُ دوئیں ملک زوت معاہدے ءِ سرا دستخط کن انت۔ اے ھیالانی درشانی آئی ءَ چار شمبے ءِ روچ ءَ امارات ءِ سفیر سالم محمد الزعبی ءَ گوں گند ءُ نند ءَ کت۔ وزیر تجارت ءَ گوشت کہ تکنیکی ٹیم آنی محنت ءِ آسر بوتگ، ءُ سی پی اے ءِ منوگری زوت چہ وتی کار ءَ بندات بیت۔ آئی ءَ گوشت کہ پاکستان امارات ءِ سرجمیں اقتصادی شریداری معاہدے ءَ را وھد ءِ سر ءَ سرجم کنگ ءِ واستہ جزمیگ انت، سی پی اے پاکستان ءُ امارات ءِ نیام ءَ بیپاری ءُ سرمایہ کاری ءِ تہ ءَ نوکیں موہاں پچ کنت۔ جام کمال ءَ گوشت کہ پاکستان ءُ امارات ءِ نیام ءَ راجدپتری سی پی اے زوت شکل ءَ زوریت۔ اے موہ ءِ سر ءَ امارات ءِ سفیر ءَ گوشت کہ پاکستان ءِ اقتصادی اصلاحات کاروباری چاگرد ءَ را گہتر کنگ ءَ انت۔ آئی ءَ پاکستان ءَ تجارت، رسد، بندرگاہ ءُ سرمایہ کاری ءِ شوبگ آنی تہ ءَ دلگوشی ءِ درشان کتگ۔ آئی ءَ گوشت کہ سی پی اے ءِ وسیلگ ءَ پاکستان ءُ امارات ءِ سیادی نوکیں اقتصادی رنگ ءَ دیم ءَ کاینت۔ سی پی اے ءِ منوگری ءَ چہ دوئیں ملک آنی نیام ءَ تجارت ءِ تہ ءَ مزنیں گیشی یے کیت۔