شونہالی نا سرچشمہ واک و رسینگ آخا بلکن تعلیم، کسب و پروڈیکٹویٹی ءِ، بنجائی وزیر موسمیاتی بدلی نا پاکستان پالیسی ڈائیلاگ نا بنائی سیشن آن تران

اسلام آباد۔ 14 جنوری (اے پی پی) بنجائی وزیر موسمیاتی بدلی و چاگڑدی ہم گرنچی ڈاکٹر مصدق ملک پارینے کہ شونہالی نا سرچشمہ واک و رسینگ آخا بلکن تعلیم، کسب و پروڈیکٹویٹی ءِ، حکومتی کوشست آتیان زرگزرانی ٹک آتیٹی گچینی بسنے۔ داخیال آتا درشانی ءِ او چارشنبے نادے آ اسلام آباد نا ہندی ہوٹل اٹی ’’پاکستان نا زرگزرانی سمت انا اول سرآن ٹہیفنگ‘‘ نا سرحال آ پاکستان پالیسی ڈائیلاگ نا بنائی سیشن آن تران کرساکرے۔ پالیسی ریسرچ اینڈ ایڈوائزری کونسل نا کنڈآن پاکستان پالیسی ڈائیلاگ اڈتننگا ہراٹی بڑزکو کہولی حکومتی و چاہندار آک بشخ ہلکر۔ پالیسی ڈائیلاگ آن تران کرسا بنجائی وزیر ملک اٹی زرگزرانی بحالی ٹی پالیسی ہم گرنچی آ زور شاغسا پارے کہ پاکستان اٹ شونہالی نا کسر بیرہ واک و اثرورسوخ اسکان رسینگ جوڑ مسنے، شونہالی نا اسٹ انگا کسر پیداواری لائخی ٹی ودکی ءِ، شونہالی نا سرچشمہ واک و رسینگ آخا بلکن تعلیم، کسب و پروڈیکٹویٹی ءِ۔ اوپارے کہ برآمد آتیا تالان شونداری ہی پائیدار شونداری ءِ، نجکاری نظریاتی ءُ ڈٹ اس اف، مارکیٹ نا خرابی تے سہی کننگ نا وڑءِ۔ ڈاکٹر مصدق ملک پارے کہ ریاست ءِ کاروبار چلیفنگ نا جاگہ غا کمکار نا کڑد ءِ ادا کروئی ءِ، شونداری ہموتم بریک ہراتم ہر شاری ءِ کاریم کن اسہ وڑ وارخواہی فراوان کننگک۔ اوپارے کہ حکومتی کوشست آتیان زرگزرانی ٹک آتیٹی گچینی بسنے، ملکی زرگزران اٹی نجی بشخ انا کڑد اہم ءِ، ٹیلنٹ و قابلیت نا بنداو آ مخلوق ءِ مون آ ہِننگ نا بایدے وارخواہی ملے۔