وزیراعظم محمد شہباز شریف نا خصوصی کمکار ہارون اخترخان تون وزیراعلیٰ بلوچستان میر سرفراز بگٹی نا اوڑدہی

اسلام آباد۔ 14 جنوری (اے پی پی) وزیراعظم محمد شہباز شریف نا خصوصی کمکار صنعت وپیداوار ہارون اخترخان تون وزیراعلیٰ بلوچستان میر سرفراز بگٹی وزارتِ صنعت و پیداوار اٹی اوڑدہی کرے و صوبہ ٹی مائیکرو ، سمال اینڈ میڈیم انٹرپرائزز (ایس ایم ایز) نا مون آ دننگ کن تین پہ تینی کمکاری نا بابت گپ وتران کرے ۔ چارشنبے نادے آ وزارت صنعت و پیداوار نا کنڈآن جاری بیان نا رداٹ اوڑدہی ٹی بنجائی و صوبائی حکومت نا نیام اٹ مائیکرو ، سمال اینڈ میڈیم انٹراپرائزز (ایس ایم ایز) نا مون آ دننگ کن تین پہ تینی کمکاری نا بابت گپ وتران کننگا۔ خصوصی کمکار ہارون اخترخان وزیراعلیٰ بلوچستان ءِ پارے کہ وزیراعظم محمد شہباز شریف نا وژن مچ آ ملک اٹی ایس ایم ایز و خاص کر زالبول آتے زرگزرانی وڑاٹ واکدار کننگ ءِ۔ اوپارے کہ وزیراعظم نا پارت نا رداٹ غٹ صوبہ غاک اواری اٹ ہی ملک انا مائیکرو، سمال ومیڈیم انٹرپرائزز ءِ مون آ دننگ کیرہ۔ ہارون اخترخان پارے کہ ایس ایم ایز نا مون آ دننگ اٹ صوبہ غاتا کڑد بھاز اہم ءِ و بلوچستان اٹی اونا بے پناہ وارخواہی ارے ہراڑے خواری کش و لائخ آ افرادی قوت دستیاب ءِ۔ اوپڑو کرے کہ ایس ایم ایز نا مون آ دننگ کن بلوچستان حکومت تون اواری اٹ اسہ اسیجا ٹاسک فورس اس جوڑ کننگک ہرا کشاری بنداو آ ایس ایم ایز ، لائیو اسٹاک ، ورنا و زالبول آتے واکدار کننگ نا ڈٹ آتیا کاریم کیک۔ وزیراعلیٰ میر سرفراز بگٹی پارے کہ بلوچستان حکومت ایس ایم ایز نا مون آ دننگ کن سنبرینگوک ءِ، نن خوانہ کہ صوبہ نا الس تینا کاروبار ءِ ودفے و ملکی وجہانی منڈی ٹی گچین وڑاٹ مقابلہ کے۔ اوباوری کرفے کہ بنجائی حکومت نا کمکاری اٹ بلوچستان ہر بشخ اٹی ایس ایم ایز نا شونداری کن پبی گام گیج کیک۔ اونا پاننگ ئس کہ بلوچستان اٹی ایس ایم ایز نا شونداری آن نئے بیرہ صوبہ بلکن علاقائی و قومی زرگزران ءِ ہم سوگوی ملک وخت اس کہ ملکی ایس ایم ایز اٹی بلوچستان نا کڑد بھاز اہم ءِ و اونا پبی است بڈی ءِ کننگک۔ خصوصی کمکار ہارون اخترخان وزیراعلیٰ میر سرفراز بگٹی نا ایس ایم ایز نا مون آ دننگ کن کروک آ کوشست آتا ستاءِ کرے و بنجائی حکومت نا کنڈآن پورو کمکاری نا باوری کرفے۔