پاکستان پانڈا بانڈ انا جاری کننگ کن تیار ءِ، پاک چین اقتصادی شریداری پوسکن آ ریسہ غاتیٹی پترینگانے، بنجائی وزیر خزانہ محمد اورنگزیب نا سی جی ٹی این ءِ انٹرویو

اسلام آباد۔ 30 دسمبر (اے پی پی) بنجائی وزیر خزانہ ومحصولات سینیٹر محمد اورنگزیب پارینے کہ پاکستان بروک آ منہ ہفتہ ٹی چینی کیپیٹل مارکیٹ اٹی پانڈا بانڈ جاری کننگ کن تیار ءِ و داگام پاکستان و چین نا نیام اٹ مالی و اقتصادی تعلقداری تے پین سوگو کننگ نا کنڈآ اسہ اہم ءُ پیش رفت اسے۔ داہیت ءِ او چائنا گلوبل ٹیلی وژن نیٹ ورک ءِ انٹرویو ترساپارے۔ وزیرخزانہ پارے کہ پاکستان و چین نا ہڑتوم آ کنڈآتا تعلقداری پدریسہ سوگو، محکم و متنوع مننگ ءِ و داسہ دا تعلقداری بیرہ بنداوی پنجر اسکان محدود اف بلکن اسہ گیشتر مارکیٹ اسے آ تالان اقتصادی شریداری ٹی بدل مسنے۔ وزیرخزانہ چین ءِ پاکستان نا غٹ آن بھلا واپاری شریدار گوندسا پارے کہ برجاسال انا اولیکو ہشت تُو اٹی ہڑتوم آملک آتا نیام اٹ واپاری کچ کم و ود 17 ارب امریکی ڈالر اسکان سرمسنے۔ اوپارے کہ پاک چین تعلقداری دہائی تیان پدریسہ سوگو مننگ ءُ و چین ہر جہانی فورم آ پاکستان تون پبی تفینے ، پاکستان نا اقتصادی شونداری ٹی چین نا کڑد خاص کر چین پاکستان اقتصادی راہداری (سی پیک) نا کمک اٹ بھاز اہم مسنے، ہرا بیلٹ اینڈ روڈ انیشی ایٹیو نا نمان ڈٹ ءِ، سی پیک نا اولیکو ریسہ ٹی سڑک، بندرگاہ ،بالی پٹ و توانائی نا ڈٹ آتون اوار بنداوی پنجر آ چکار کننگا وخت اس کہ صدر شی جن پنگ و وزیراعظم لی چیانگ تون برجاسال مروک آ بڑزکو کہولی اوڑدہی تیان پد سی پیک نا ارٹ میکو ریسہ باقاقدہ بناکرینے، سی پیک فیز ٹو اٹی ساڑی انفراسٹرکچر ءِ زرگزرانی وڑاٹ گچین کننگ آ چکار کننگ انگ ءِ و دا ریسہ زیات تر بزنس ٹو بزنس کمکاری آ تالان ءِ ہرا نجی بشخ انا کماشی ٹی پائیدار شونداری نا کنڈآ اسہ پیدوار ءُ پیش رفت اسے۔