اسپیکر قومی اسمبلی سردار ایاز صادق نا وزیراعلیٰ بلوچستان میر سرفراز احمد بگٹی ءِ بگٹی قبیلہ نا ہشت می چیف نا منصب ءِ سنبھالنگ آ مبارکباد

اسلام آباد۔ 30 دسمبر (اے پی پی) اسپیکر قومی اسمبلی سردار ایاز صادق وزیراعلیٰ بلوچستان میر سرفراز بگٹی ءِ بگٹی قبیلہ نا ہشت می چیف نا حیثیت اٹ زمواری تے سنبھالنگ آ مبارکبادی پیش کرینے۔ تینا بیان اٹی اسپیکر قومی اسمبلی پارے کہ میر سرفراز احمد بگٹی نا چیف انا وڑاٹ گچین کاری بگٹی برادری نا پبی پت انا درشانی ءِ۔ اوپارے کہ دا اعزاز میر سرفراز بگٹی نا سیاسی بصیرت، قائدانہ لائخی و بلوچستان نا الس نا راجی و زرگزرانی راجی آسودہی کن اونا پدریسہ خذمت آتا اعتراف ءِ۔ سردار ایاز صادق پارے کہ بطور وزیراعلیٰ بلوچستان میر سرفراز بگٹی نا صوبہ ٹی شونداری، تعلیم نا مون آ دسننگ و ادارہ جاتی سوگوی کن گام گیج ستاکڑزک۔ اوپارے کہ شونداری و سیاسی سوگوی نا بابت اونا وژن اونا بالغ نظری و بلوچستان ءِ مون تروک چیلنج آتا گہری فہم نا درشانی ءِ۔ اسپیکر قومی اسمبلی پارے کہ بلوچستان داوخت آ بھارتی سرپرستی ٹی مروک آ فتنۃ الخوارج و سیم پار دہشت گردی کون آ سنگین چیلنج آتون مون تننگ ءِ ہرا امن و شونداری نا کسر اٹی بھلا اڑاند ءِ۔ اوپارے کہ میر سرفراز احمد بگٹی بلوچستان نا الس، پاک فوج وسیکورٹی فورس آتون ہم کوپہ سلسا دہشت گردی نا چٹفنگ و صوبہ تون اوار مچ آملک اٹی پائیدار امن نا قیام کن سرگرم کڑد ادا کننگ ءِ۔ اسپیکر میر سرفرا ز احمد بگٹی کن نیک است خواہی نا درشانی ءِ کرسا داپت انا درشانی ءِ کرے کہ بگٹی قبیلہ نا چیف نا حیثیت اٹ او پین عزم و پت اتون صوبہ نا الس نا خذمت ءِ برجاتخک و بلوچستان اٹی سیوت و یکجہتی ، سیاسی سوگوی و امن و ایمنی نا مون آ دسننگ کن پبی کڑد اداکیک۔