سائبان پاکستان بین المذاہب ہم آہنگی و راجی یکجہتی نا مون آ دننگ نا قومی بیانیہ ءِ، بنجائی وزیر پروفیسر احسن اقبال

اسلام آباد۔ 30 دسمبر (اے پی پی) بنجائی وزیر ڈٹ بندی شونداری و خصوصی گام گیج پروفیسر احسن اقبال پارینے کہ سائبان پاکستان بین المذاہب ہم آہنگی و راجی یکجہتی نا مون آ دننگ نا قومی بیانیہ ءِ، سائبان پاکستان انتہاپسندی نا برخلاف قومی بیانیہ ءِ سوگو کیک۔ وزارت ڈٹ بندی شونداری و خصوصی گام گیج نا رداٹ دا خیال آتا درشانی ءِ او سائبان پاکستان نا بنائی دود آن تران کرسا کرے۔ بنجائی وزیر احسن اقبال پارینے کہ 2018 اٹی پیغام پاکستان جاری کننگا، سائبان پاکستان، پیغام پاکستان نا وڑآ قومی یکجہتی ءِ مون آ دیک۔ اوپارے کہ پاکستان اٹی ہر بشخ اٹی اقلیت آتے نمائندگی دوئی ءِ وخت اس کہ اڑان پاکستان نا اسہ تمبہ راجی ہم گرنچی ہم ارے۔ بنجائی وزیر مستی پارے کہ ورناتیٹی سگ و گپ وتران نا مون آ دننگ کن سائبان پاکستان اہم ءُ گام اسے، بین المذاہب گپ و تران پرامن بقائے تین پہ تینی و راجی سوگوی کن المی ءِ۔ پروفیسر احسن اقبال پارے کہ مذہبی رواداری و گپ وتران انتہاپسندی نا چٹفنگ اٹی اہم کڑد ادا کیک۔ اوپارے کہ قائد اعظم غٹ شاری تے مذہبی آجوئی نا ضمانت تسنے۔ پروفیسر احسن اقبال پارے کہ چندی عقیدہ غاتا پیروکار آتا نیام اٹ ہم گرنچی پاکستان نا شونداری کن المی ءِ۔ احسن اقبال پارے کہ ببو قائد اعظم نا پاکستان ءِ ولدا زندہ کین، ہراڑے مذہب اخلاق ایتک، شاری حق آتے پُلیپک، ہراڑے غٹ بریبر نا شاری ءُ۔ بنجائی وزیر احسن اقبال خواست کرساپارے کہ علماء اختلاف ءِ خار مننگ کن الیپس، سیاسی راہشون آتون اختلاف کیر ولے دشمنی تالان کپس۔ اومیڈیا غان خواست کرساپارے کہ انتہاپسند آخا، امن نا سفیر آتے توار خلیر و ہندا وڑ استاد آک ہم چناتے رواداری ہیل ایتر وخت اس کہ سول سوسائٹی ٹھپ آتے بارِفنگ نا کاریم ءِ برجاتخر۔ اوپارے کہ میثاق مدینہ شہریت، مذہبی آجوئی، کانود نا حکمرانی ، تین پہ تینی شرف نا اولین ماڈل ءِ۔ احسن اقبال پارے کہ ننے خار والا آخا، ایلمی و یکجہتی والا پاکستان جوڑ مروئی ءِ۔ اوپارے کہ 2018 ٹی کنے آ قاتلانہ جلہو مس۔ سم بدن اٹی لگا ولے کلہو است اٹی دڑنگا۔ پروفیسر احسن اقبال پارے کہ ننے ذہن تے خار و تعصب نا سلہہ غاتیان بے سلہہ کروئی ءِ۔