مزن وزیر شہباز شریف ملک ءِ ورنا آنی واستہ شپ ءُ روچ کار کنگ ءَ انت، ورنا آناں توانمند کنگ حکومت ءِ اولی ترجی انت، وفاقی وزیر امیر مقام

چکدر۔ 29 دسمبر (اے پی پی): کشمیر ءُ گلگت بلتستان ءِ کار ءُ سیفرون ءِ وفاقی وزیر ءُ صدر پاکستان مسلم لیگ ءِ انجینئر امیر مقام ءَ گوشت کہ مزن وزیر شہباز شریف ملک ءِ ورنا آنی واستہ شپ ءُ روچ کار کنگ ءَ انت ءُ ورنا آناں توانمند کنگ آئی ءِ حکومت ءِ اولی ترجی انت۔ ورنا آنی تہ ءَ سرمایہ کاری اصل ءَ پاکستان ءِ وشیں آیوکیں وھد ءِ ضمانت اِنت۔ دو شمبے ءِ روچ ءَ ملاکنڈ یونیورسٹی ءَ مزن وزیر یوتھ لیپ ٹاپ اسکیم ءِ فیز چارمی مراگش ءَ گوں تران کنان ءَ وفاقی وزیر انجینئر امیر مقام ءَ گوشت کہ مزن وزیر یوتھ لیپ ٹاپ اسکیم ءِ بندات مسلم لیگ ن ءِ سروک محمد نواز شریف ءُُ مزن وزیر شہباز شریف ءِ وژن ءِ چیر دستی ءَ کنگ بوتگ بلکیں ایشی ءَ را گیش ءُُ گیوار کتگ۔ مزن وزیر شہباز شریف ورنا آنی واستہ وانگ ءُُ زانگ، ڈیجیٹل ءُُ ہنر ءِ دیمروئی ءِ منصوبگ آنی سر ءَ ذاتی رنگ ءَ نگرانی کنت ءُُ اے گپ ءَ دل یکیمی کنت کہ ملک ءِ ورنا نوکیں لوٹ آنی رد ءَ دیم ءَ روان کن اَنت۔ انجینئر امیر مقام ءَ اے گپ ءِ پدر کنگ ءَ گشتگ کہ لیپ ٹاپ ءِ اسکیم سرجمی ءَ میرٹ ءُُ شفافیت ءِ سرا بندوک انت۔ اگاں کسے بے میرٹ ءَ لیپ ٹاپ دیگ ءِ یک کیسے ثابت بہ کنت گڑا آ سیاست ءَ چہ درکپگ ءَ تیار اِنت۔ اے مزن وزیر شہباز شریف ءُ قائد محمد نواز شریف ءِ یک سدکیں پیسلہ یے کہ اے آسراتی ءِ حقدار ایوک ءَ ہما نودربر انت کہ آ واقعی ایشی ءِ مستحق انت۔ آئی ءَ گوشت کہ راجی ارزشت ءِ اے پروگرام 2018ءَ چہ 2022ءَ تاں بند بوتگ، البت 2022ءَ پدا شہباز شریف ءِ مزن وزیر بوھگ ءَ پد اے اسکیم ءِ زندگ کنگ ءِ اولی پیسلہ کنگ بوتگ۔ انوگ ءَ تاں سرجمیں ملک ءَ یک ملین ءَ چہ گیش لیپ ٹاپ بھر ءُ بانگ کنگ بوتگ ءُ آیوکیں وھد ءَ ھم اے کارروائی سرجمیں رفتار ءَ برجاہ بیت۔ وفاقی وزیر ءَ گوشت کہ مرچی ملاکند یونیورسٹی ءِ 600میرٹ نودربر آنی نیام ءَ لیپ ٹاپ بھر ءُ بانگ کنگ بوھگ ءَ انت۔ یونیورسٹی ءِ کارکردگی ءِ توسیپ کنان ءَ آئی ءَ گوشت کہ خیبر پختونخوا ءَ ملاکند یونیورسٹی ءِ اولی نمبر ءُُ سرجمیں ملک ءَ نامداریں نمبر ءِ اے گپ ءِ ثبوت اِنت کہ اگاں کوہ ءُ دوریں دمگ آنی ورنا آناں موہ دیگ بہ بیت گڈا آ ملک ءُُ راج ءِ دیمروئی ءِ تہ ءَ ھم کلیدی کرد پیلو کن اَنت۔ وفاقی وزیر انجینئر امیر مقام ءَ گوشت کہ مزن وزیر شہباز شریف ءِ وژن ءِ رد ءَ حکومت ڈیجیٹل اسکل پروگرام، اسکالرشپ، گرین یوتھ موومنٹ، اسپورٹس آسراتی ءُُ ڈینش اسکول ءِ وڑیں منصوبگ آنی سر ءَ ھم سرجمیں دلگوشی دیگ ءَ اِنت تانکہ ورنا آناں جوانیں موہ ءُ وانگ ءُ زانگ ءِ واستہ روزگار ءِ پجارینگ بہ بیت۔ آئی ءَ دل یکیمی دات کہ آئی ءِ کارگس ملاکنڈ یونیورسٹی ءِ جیڈھ ءُ لوٹ آنی گیواری ءِ واستہ ہر وھد ءَ دستیاب اِنت ءُُ وانگ ءُ زانگ ءُ لیب ءُ گوازی ءِ بنیاتی ڈھانچہ ءِ گہتری ءِ واستہ پی سی ون ءِ منظوری ءِ تہ ءَ سرجمیں کمک ءِ تہ ءَ گیشی کنگ بیت۔ وفاقی وزیر ءَ نودربر آناں زور پر دات کہ آ وتی صلاحیت آناں جوانیں رنگ ءَ کارمرد بہ کن اَنت، سوشل میڈیا ءَ را ذمہ واری ءُُ جوڑیشت ءِ رنگ ءَ کارمرد بہ کن اَنت ءُُ پاکستان ءِ دیمروئی، مھکم ءُُ وشھالی ءِ تہ ءَ وتی کرد ءَ پیلو بہ کن اَنت۔ آئی ءَ گوشت کہ مھکم، شرپدار ءُ وشھالیں پاکستان مئے درستانی یکجائی مول ءُ مراد انت۔ اے موہ ءِ سر ءَ وفاقی وزیر ءَ نودربر آنی نیام ءَ لیپ ٹاپ بھر ءُ بانگ کت۔ یونیورسٹی ءِ نودربراں مزن وزیر ءِ لیپ ٹاپ اسکیم ءِ توسیپ کت ءُ وفاقی وزیر انجینئر امیر مقام ءِ منت گپت۔ ایشی ءَ چہ پیسر جامعہ ملاکنڈ ءِ وائس چانسلر ءِ نیمگ ءَ وفاقی وزیر ءُ پاکستان مسلم لیگ ءِ صدر انجینئر امیر مقام ءَ را یونیورسٹی ءِ سرجمیں کارکردگی، وانگ ءُُ زانگ ءِ کار ءُ کرد ءُ دیم ءَ اتکگیں چیلنج آنی بابت ءَ سرجمیں بریفنگ دیگ بوتگ۔ بریفنگ ءِ ساھت ءَ وائس چانسلر ءَ جامعہ ملاکند ءَ برجاھیں وانگ ءُ زانگ ءِ پروگرام، پٹ ءُ پولی منصوبگ، فیکلٹی ءِ کارکردگی، نودربر آنی آسراتی ءُ آیوکیں وھد ءِ دیمروئی منصوبگ آنی بابت ءَ سرپدی دات۔ آئی ءَ یونیورسٹی ءِ دیم ءَ مالی ءُ انتظامی جیڈھ ءُ انفراسٹرکچر ءِ گہتری ءِ واستہ لوٹوکیں گامگیج آنی سر ءَ ھم چمشانک دات۔ آئی ءَ نودربرانی واستہ کرکٹ گراؤنڈ ءِ جوڑ کنگ ءِ لوٹ کتگ ۔ اے موہ ءِ سر ءَ انجینئر امیر مقام ءَ جامعہ ملاکنڈ ءِ وانگ ءُ زانگ ءِ کوالٹی ءُُ خطہ ءَ ہائیر ایجوکیشن ءِ دیمروئی ءِ تہ آئی ءِ کرد ءَ را ساڑات ءُ گوشت کہ حکومت ورنا آناں کوالٹی ءِ وانگ ءُ زانگ ءِ پجاری ءِ واستہ جزمیگ انت۔ آئی ءَ دل یکیمی دات کہ جامعہ ملاکنڈ ءِ جائز جیڈھ آناں گیواری ءُُ دیمروئی منصوبگ آنی سرجمی ءِ واستہ وفاقی تک ءَ ھمک رنگ ءَ کمک کنگ بیت۔ وفاقی وزیر ءَ گوشت کہ وانگ ءُُ زانگ، پٹ ءُ پول ءُ مہارت آنی دیمروئی ءَ ابید پائیدار دیمروئی ممکن نہ اِنت، حکومت وانگ ءُ زانگ ءِ ادارگ آناں نوکیں لوٹ آنی گوما یکجا کنگ ءِ واستہ گامگیج زورگ ءَ اِنت۔ اے موہ ءِ سر ءَ صدر ملک جہانزیب خان، صدر پاکستان مسلم لیگ (ن) ملاکند ڈویژن، سینیٹر زاہد خان، ملک فاروق اقبال، ضلع ءِ صدر لوئر دیر، نثار خان وردک، ضلع ءِ صدر بالائی دیر، ملک نعمان یوسفزئی، کوآرڈینیٹر مزن وزیر ورنا پروگرام ملاکنڈ ڈویژن، فیض اللہ خان، عطاء اللہ خان، زاہد اللہ خان، سجاد خان ءُ فرید یوسفزئی ہم ساڑی ات انت۔ ایشی ءَ چہ پیسر وفاقی وزیر ءُ صدر مسلم لیگ (ن) خیبر پختونخوا انجینئر امیر مقام ءَ را جامعہ چکدارہ ءَ سر بوھگ ءِ سر ءَ گہتری ءَ گوں وش آتک کنگ بوت۔ اے موہ ءِ سر ءَ وائس چانسلر جامعہ چکدرہ، فیکلٹی ءِ باسک ءُ انتظامیہ ءِ مزنیں کارندہ ھوار اتنت۔ انجینئر امیر مقام ءَ پارٹی کارکناں گوں گپ ءُ تران کنان ءَ گوشت کہ مسلم لیگ ن سرکاری ھزمت، دیمروئی ءُ وشھالی ءِ ایجنڈا ءِ رندگیری ءَ کنگ ءَ اِنت ءُ خیبر پختونخوا ءَ دیمروئی منصوبگ آناں دیم ءَ برگ بیت۔