کرسمس نا وخت آ پرغ و بٹ و مسلمان تے شست کننگ کن ریاستی سرپرستی ٹی مہم بھارت اٹ اقلیت آتا خوف و بھیم اٹی ودکی کرینے، ترجمان دفترخارجہ

اسلام آباد۔ 29 دسمبر (اے پی پی) ترجمان دفترخارجہ بھارت اٹی اقلیت آتیا مروک آ ظلم و ستم ءِ تشویشناک گوندسا پارینے کہ کرسمس نا وخت آ پرغ و بٹ و مسلمان تے شست کننگ کن ریاستی سرپرستی ٹی مہم اقلیت خاص کر مسلمان تیٹی خوف وبھیم اٹی ودکی کرینے، جہانی برادری دا واقعہ غاتا نوٹس ءِ ہلے۔ دوشنبے نادے آ دفترخارجہ نا ترجمان طاہر اندرابی بھارت اٹ کرسمس نا وخت آ پرغ و بٹ و مسلمان تا برخلاف بیدادی نا بابت میڈیا نا سوج آتا ورندی ءِ ترسا پارے کہ بھارت اٹی اقلیت آتیامروک آ ظلم و ستم بے کچ گڑتی نا ہیت اسے۔ کرسمس نا وخت آ ساڑی آ مذمت نا قابل پرغ وبٹ نا واقعہ، نیز مسلمان تے شست کروک آ ریاستی سرپرستی ٹی چلینگوک آ مہم، ہرافتے ٹی اوفتا اُراتے دڑفنگ و وار وار آ مچی نا کنڈآن اوفتا خون نا واردات آک اوار ءُ، خاص کر محمد اخلاق تون پیش بروک آ واقعہ، ہراٹی ریاست ڈوہدار آتے احتساب آن بچفنگ کن گام گیج کرے، مسلمان تیٹی خوف و بیگانگی ٹی پین ودکی کرینے۔ ترجمان پارے کہ داوڑنا زہمی تا لڑ است ہسون وڑاٹ مرغن ءِ۔ اوخواست کرے کہ جہانی برادری دا واقعہ غاتا نوٹس ءِ ہلے وبھارت اٹ نزور تپہ غاتا بنداوی حق انا رکھ اکن جوان گام گیج کننگے۔