ایس ای 100 انڈکس نا اسہ لکھ 74 ہزار پوائنٹ آتے عبور کننگ تاریخی ءُ مزل نا نشان اسے، خرم شہزاد

اسلام آباد۔ 29 دسمبر (اے پی پی) وزیرخزانہ نا سلاہکار خرم شہزاد پارینے کہ سال 2025 پاکستان نا اسٹاک مارکیٹ زرکارآتیکن پدریسہ فائدہ مند و پت انا سال جوڑ مسنے۔ دوشنبے نادے راجی رابطہ نا ویب سائٹ ایکس آ پاکستان اسٹاک مارکیٹ اٹی تاریخی بڑزی نا بابت تینا کلہو اٹی او پارے کہ پاکستان نا اسٹاک مارکیٹ اسہ پین مزل اسے عبور کرینے و کے ایس ای 100 انڈیکس نا 174400 پوائنٹ آتا بڑزکو انگا کچ ءِ عبور کننگ اسہ تاریخی سرسہبی و پوسکن ءُ ریکارڈ اسے۔ اوپارے کہ پاکستان سٹاک مارکیٹ جنوری 2025 آن داتم اسکان امریکی ڈالر نا رداٹ 50 درسد کٹیا فراوان کرینے دا مزل نا سوب پاکستان اسٹاک مارکیٹ ایشیانا گچین کارکڑد نشان تروک مارکیٹ آتیٹی اوار مسنے۔ خرم شہزاد پارے کہ پاکستان اسٹاک مارکیٹ اٹی سال 2025 زرکارآتیکن پدریسہ فائدہ مند و پت انا سال جوڑ مس و سٹاک مارکیٹ اٹی زرکاری کروک آتا کچ اٹی بھلو ودکی اس مسنے۔ اوپارے کہ 18 تُو اٹی 37 درسد ودکی آن داوخت آ 4 لکھ 50 ہزار آن زیات زرکاراسٹاک مارکیٹ نا بشخ جوڑ مسنے۔ اوپارے کہ کے ایس ای 100 انڈیکس نا اسہ لکھ 74 ہزار پوائنٹ آتے عبورکننگ تاریخی ءُ مزل نانشان اسے ہرا حکومت نا گچین زرگزرانی پالیسی، مالی نظم و ضبط، جوان اصلاحات و زرگزرانی سوگوی نا عکاسی ءِ کننگ ءِ۔ اوپارے کہ پاکستان اسٹاک مارکیٹ نا تاریخ اٹ دا مزل حکومتی کارکڑد، گچین اصلاحات و زرکارآتا پت انا درشانی ءِ۔