این ڈی ایم اے بروک آ منہ دے اٹی ملک انا چندی بشخ آتے زہمی کروک آ دیکی تہوتا سسٹم نا رداٹ موسمی ایڈوائزری جاری کرے

اسلام آباد۔ 29 دسمبر(اے پی پی) نیشنل ڈیزاسٹرمینجمنٹ اتھارٹی (این ڈی ایم اے) بروک آ منہ دے اٹی ملک انا چند ی بشخ آتے زہمی کروک آ دیکی تہو تا سسٹم نا رداٹ موسمی ایڈوائزری جاری کرے۔ دوشنبے نادے آ این ڈی ایم اے نا پیشگوئی نا رداٹ دیکی تہو تا چرجوئی 29 دسمبر 2025 نا نن آن ملک انا دیکی علاقہ غاتیٹی پترینگ انگ نا گمان ءِ و 30 دسمبر 2025 آن داٹی شدت بننگ کیک۔ داموسمی نظام 31 دسمبر آ ملک انا گیشتر بڑزکو و نیامی علاقہ غاتے تینا پلویڑ اٹی ہلیک و بڑزکو علاقہ غاتیٹی 2 جنوری 2026 نا سہب اسکان برقرار سلنگ نا گمان ءِ۔ دا موسمی نظام نا اثراٹی ناران، کاغان، دیر، سوات ، کوہستان ، مانسہرہ ، ایبٹ آباد ، شانگلہ ، استور ، ہنزہ ، سکردو ، مری ، گلیات، وادی نیلم، باغ، پونچھ و حویلی ٹی 30 دسمبر نا نن آن 2 جنوری نا سہب اسکان برف انا سوب سڑک آتا بندش و لغوشتی نا گڑتی ءِ، ہنداوخت آ بڑزکو خیبرپختونخوا، گلگت بلتستان و آزاد جموں وکشمیر نا مشی آ علاقہ غاتیٹی لینڈ سلائیڈنگ و برفانی کرود آتا تمنگ نا ہم گمان ءِ۔ سیل و سواتی تے پارت کننگانے کہ او بھاز احتیاط کیر و حساس و بڑزکو مشی آ علاقہ غاتیٹی بے گرج سفر آن پاناد کیر۔ ایلو کنڈآ دا پِر انا چرجوئی ٹی نیامی و سویلی پنجاب و بڑزکو سندھ اٹی گوتلو نا شدت اٹی کمتی گمانی ءِ، گمانی حالیت آتا رداٹ این ڈی ایم اے غٹ تعلقدار صوبائی ڈیزاسٹر مینجمنٹ اتھارٹیز(پی ڈی ایم ایز) ، گلگت بلتستان ڈیزاسٹر مینجمنٹ اتھارٹی (جی بی ڈی ایم اے)، اسٹیٹ ڈیزاسٹر مینجمنٹ اتھارٹی (ایس ڈی ایم اے) و آئی سی ٹی انتظامیہ ءِ المی تیاری و وخت آ ردعمل نا غٹ گام گیج آتے پک کننگ نا پارت کرینے۔ تعلقدار ادارہ غاتے تیار سلنگ، وخت آ معلومداری تا فراوانی، ہلہلہ ئی ردعمل ٹیم تے الرٹ تخنگ و انسانی جان ، ملکیت و اہم انفراسٹرکچر آتے گمانی نسخان تیان بچفنگ کن پیشگی گام گیج کننگ آ زور شاغنگانے۔ این ڈی ایم اے حالیت آتیا پدریسہ نظر تخانے و وخت آ ردعمل و نسخان تیٹی کمتی کن تعلقدار ادارہ غاتون رابطہ ٹی ءِ۔ الس ءِ پارت کننگک کہ او تازہ انگا موسمی حالیت و ایڈوائزررآتیان باخبر سلر و خاص کر زہمی علاقہ غاتیٹی سفر نا ڈٹ بندی آن مست ’’پاک این ڈی ایم اے ڈیزاسٹر الرٹ‘‘ موبائل ایپ ءِ کاریم اٹ اتیر۔