ملک ءِ دفاع مھکمیں دستاں اِنت، پاکستان ءَ سفارتی پڑ ءَ سوبمندی رسگ ءَ اِنت، انصاف ءِ جنگ ءَ بھارت ءَ وتی تباہ کنوکیں شکست مدام یات بیت، صدر آصف علی زرداری

گڑھی خدابخش۔27دسمبر  (اے پی پی):صدر آصف علی زرداری ءَ گشتگ کہ ملک ءِ دفاع مھکمیں دستاں انت، پاکستان ءَ سفارتی پڑ ءَ سوبمندی رسگ ءَ انت، سلاہ بندیں اُرد ءَ انصاف ءِ جنگ ءَ بھارت ءَ را انچیں تباہ کنوکیں شکست داتگ کہ آئی ءَ را مدام یات بیت، مئے فیلڈ مارشل ءَ  بھارت ءَ را  دپ پروشیں پسو ءِ داتگ، مودی  ءِ دیم سیاہ بوتگ،  پاکستان  پیپلز پارٹی وفاق ءِ چیدگ اِنت۔ بانک بے نظیر بھٹو ءِ شہادت ءِ روچ ءَ پاکستان کھپے ءِ نعرہ چست کنگ ءَ ملک ءِ رکھینگ بوتگ، ما پاکستان ءَ امن ءُ ایمنی ءِ جھولا جوڑ کنیں ءُ دیمروئی ءُ وشھالی آرگ ءَ ایں ۔ آئی ءَ اے ھیالانی درشانی پیسریگیں مزن وزیر بانک بے نظیر بھٹو شہید ءِ بیرانی ءِ 18 سال ءِ درگت ءَ شمبے ءِ روچ ءَ لس دیوان ءَ گوں گشتانک دیان ءَ کت۔ اے موہ ءِ سرءَ پاکستان پیپلز پارٹی ءِ چیئرمین بلاول بھٹو زرداری ءِ بانُک اولی عصفہ بھٹو زرداری، توکی کارانی وزیر محسن نقوی ءُ پاکستان پیپلز پارٹی ءِ ایندگر راہشون ھم ساڑی اَت۔ صدر ءِ مملکت آصف علی زرداری ءَ گوشت کہ ما شہیدبانک  بے نظیر بھٹو ءَ را شگر ءُ منت دیگ ءِ واستہ مرچی ادا یکجا بوتگیں ۔ اے روچ ملک ءِ رکّینگ ءِ روچ بوتگ۔ آ روچ ءَ پاکستان پیپلز پارٹی ءَ پاکستان کھپے ءِ نعرہ چست کتگ ءُ ملک رکینتگ ۔ پاکستان داں قیامت ءَ مھکم ءُ مستقل مان اِنت انشاء اللہ ۔ آئی ءَ گوشت کہ اللہ تعالیٰ ءَ مارا ملک ءُ راج ءِ ازمت ءِ موہ داتگ ۔ راستی ءِ جنگ ءَ مئے سلاھبند ءُ مئے فیلڈ مارشل سید عاصم منیر ءَ ھندوستان ءَ را ھما لائکیں پسو داتگ کہ آ مدام یات کنت۔ پاکستان ءِ بھادر ءُ بے دروریں رھشونی ءَ دژمن شکست دات۔ پاک اُرد ءُ پاک فضائیہ ءَ دژمن ءِ مراگش ھلاس کتگ انت۔ ملک ءِ دفاع مھکمیں دستاں انت۔ ما زانیں کہ وت ءَ چوں دفاع بہ کنیں۔ اگاں ما لوٹ اِتیں گڑا ما ھندی بالی گرابانی سرجمیں بالی گراباں تیر جتگ اَت۔ اگاں کسے ملک پدا پاکستان ءَ گوں بد نیتی ءِ چماں بہ چاریت گڑا آئی ءَ را لائکیں پسو رس ایت۔ صدر ءِ مملکت ءَ گوشت کہ پاکستان پیپلز پارٹی ءِ کارکن شہید ذوالفقار علی بھٹو ءُ شہیدبانک بے نظیر بھٹو ءِ وارث اَنت۔ آ پہ وتی ڈیھ ءَ وتی جان، مال ءُ ھرچیز ءَ ندر کن اَنت۔ مئے آیوکیں پدریچ ھم پہ ڈیھ ءَ جنگ کن اَنت۔ پیپلز پارٹی ءِ اعتماد انت کہ مشکل راجمانی گیش ءُ گیوار کنگ بہ بیت۔ پارٹی پیپلز ءَ گامگیج چست کت انت کہ استاناں حق دئیگ بہ بیت۔ پیپلز پارٹی ءَ مدام راج ءِ ھزمت ءِ سیاست کتگ۔ ملک ءِ جیڑہانی گیش ءُ گیوار ءِ واستہ انگت ءَ کوشست کنگ بوہگ ءَ انت۔ آئی ءَ گوشت کہ چار ءُ نیم سال ءِ تہ ءَ یک مردمے ءَ سرجمیں دگنیا ءَ گوں ملک ءِ سیادی ھراب کتگ۔ نوں پاکستان ءِ نام جھان ءِ تک ءَ گہتر بوتگ ءُ پاکستان سفارتی سوبمندی حاصل کنگ ءَ انت۔ امریکی صدر ٹرمپ ھم فیلڈ مارشل ءِ توسیپ ءَ کنگ ءَ اِنت ءُ گْوشگ ءَ اِنت کہ آ پاکستان ءَ را امن ءُ ایمنی ءِ جھولا جوڑ کنت ءُ دیمروئی ءُ وشھالی ءَ آرگ ءَ اِنت۔ ملک ءِ دیمروی ءِ واستہ مارا درستاں وتی کرد پیلو کنگی انت۔ راج دیوان ءَ پاکستان پیپلز پارٹی ءِ چیئرمین بلاول بھٹو زرداری ءُ اے دگہ راہشوناں ھم گشتانک دات۔