حکومت ءِ جوانیں  پالیسی آنی سبب ءَ پاکستان سفارتی، سیاسی ءُ معاشی رد ءَ دیم ءَ آیگ ءَ اِنت،  میاں اوستمانی براتی ءِ تہا پاکستان ءِ کلیدی کرد ءَ را منگ بوھگ ءَ انت، نائب  مزن وزیر /درئی کارانی وزیر اسحاق ڈار ءِ پریس کانفرنس ءَ گوں تران

اسلام آباد۔27دسمبر  (اے پی پی):نائب مزن وزیر ءُ درئی کارانی وزیر سینیٹر محمد اسحاق ڈار ءَ گوشت کہ پاکستان ءَ را یک وھدے ءَ ’’سفارتی رد ءَ ایوکا‘‘ لیکگ بوتگ ات، مرچی استیں حکومت ءِ متحرک پالیشی آنی سبب ءَ میاں اوستمانی براتی ءِ تہ ءَ یک مھکم ءُ نامداریں سفارتی، سیاسی ءُ اقتصادی پوزیشن ءِ سر ءَ گپتگ۔ ھاسیں جھان ءِ جیڈھ آنی سر ءَ پاکستان ءِ سرگرم، اصولی ءُ مھکمیں موقف ءَ را میاں اوستمانی دیوان آنی تہ ءَ ساڑاھگ ءُ منگ بوتگ۔ پاکستان ءِ اصولی موقف ءَ چہ میاں اوستمانی براتی ءَ وتی نام ءُ نام گیش بوتگ۔ شمبے ءِ روچ ءَ وزارت ءِ درئی کار ءِ سالانہ کارکردگی ءُ کرد ءِ ھوالگ ءَ پریس کانفرنس ءَ گوں گشتانک دیان ءَ نائب مزن وزیر ءُ درئی کار ءِ وزیر سینیٹر محمد اسحاق ڈار ءَ گوشت کہ ھاسیں جھان ءِ جیڈھ آنی سر ءَ پاکستان ءِ فعال، اصولی ءُ مھکمیں موقف ءَ را میاں اوستمانی دیوان آنی تہ ءَ ساڑاھگ ءُ منگ بوتگ۔ اسحاق ڈار ءَ ملک ءِ بابت ءَ ملک ءِ جوانیں لیکہ ءِ درشانی کتگ۔ آئی ءَ راجی رسانکدر ءِ ھم منت گپت کہ آیاں پجار ءِ سر ءَ چمشانک داتگ۔ پی ڈی ایم حکومت ءِ جوڑ بوھگ ءِ وھد ءَ پاکستان سفارتی رنگ ءَ الگ ءُ ایوکیں ملک لیکگ بوتگ بلے نوں میاں اوستمانی براتی ءَ پاکستان ءِ کلیدی کرد منگ بوھگ ءَ انت۔ نائب مزن وزیر/درئی کارانی وزیر ءِ رد ءَ گوں بھارت ءَ چار روچی سلاہ بندیں جنگ ءِ وھد ءَ دمگ ءَ بھارت ءِ بالادستی ءِ دعویٰ ءُ وت ءَ را سیکورٹی ءِ وسیلگ ءَ جار جنگ ءِ آزمائش کنگ بوتگ ءُ ناکام بوتگ۔ آئی ءَ گوشت کہ پلوامہ ءِ وئیل ءَ پد بھارت ءَ پاکستان ءِ سر ءَ دروگیں الزام جتگ، وزارت ءِ درئی کار سرگرم بوتگ ءُ نوں ملک ءِ دفاع مھکم ءُ مھکم اِنت۔ بھارتی زوراکی ءِ وھد ءَ پاکستان ءَ ذمہ واری ءِ درشانی کتگ پرچا کہ آ مدام امن ءِ منوگر بوتگ۔ اسحاق ڈار ءَ گوشت کہ پاکستان ءِ ایٹمی توان ءُ میزائل طاقت ءَ چہ ملک ءِ دفاع ناقابل برداشت جوڑ بوتگ۔ آئی ءَ اے گپ ءِ سر ءَ زور پر دات کہ نوں دلگوشی پاکستان ءَ را اقتصادی طاقت جوڑ کنگ ءِ سر ءَ اِنت ءُ اے بستار ءِ سر بوھگ ءَ پد مسلم امت ءِ سروکی ھم ممکن بیت۔ آئی ءَ گوشت کہ پاکستان قدرتی وسیلگ، معدنیات، گران بہائیں سنگ ءُ گیس ءَ ھوار بے دروریں نعمت آناں مالا مال انت، ریکو دیک ءِ وڑیں منصوبگ آنی وسیلگ ءَ ءُ جتا جتائیں رنگ آنی تہ ءَ ملک ءَ درملکی سرمایہ کاری آھگ ءَ انت۔ متحدہ عرب امارات ءِ صدر ءِ گوستگیں تر ءُ تاب ءِ حوالہ ءَ آئی ءَ گوشت کہ متحدہ عرب امارات فوجی گروپ ءِ تہ ءَ لھتیں شیئر ءِ گرگ ءَ انت کہ ایشی ءِ تہ ءَ یک ارب ڈالر ءِ واجبات ءِ ھلاسی ءِ گمان انت وھدیکہ دو ارب ڈالر ءِ وام ءِ مدت ءَ را ھم گیش کنگ ممکن انت۔ آئی ءَ پاکستان ءِ مالیاتی برجائی ءِ واستہ بادشاہی سعودی عرب، متحدہ عرب امارات ءُ چین ءِ کمک ءِ شگر ءُ منت گپت۔ اسحاق ڈار ءَ گوشت کہ داں وھدیکہ جموں ءُ کشمیر ءِ جیڈھ گیش ءُ گیوار نہ بیت خطہ ءَ پائیداریں امن ءِ برجائی بوت نہ کنت۔ پاکستان ءَ ناجائزیں مقبوضہ جموں ءُ کشمیر ءَ بھارت ءِ ناجائزیں کارروائی آنی ھلاپ ءَ سک باز زھرشانی کتگ ءُ اے جیڈھ ءَ را یک رندے پدا جھان ءِ تک ءَ پدر کتگ۔ آئی ءَ گوشت کہ اقوام متحدہ ءِ سلامتی کونسل ءِ دیوان ءَ انسانی ھک آنی لگتمالی ءِ ھوالگ ءَ گپ ءُ تران کنگ بوتگ ءُ کشمیری آنی بھر زوری ءَ چہ سلامتی کونسل ءِ قرارداد آنی رد ءَ اے جیڈھ ءِ گیواری ءِ یکیں گیواری انت ۔ سندھ ءِ آپانی معاہدے ءِ ھوالگ ءَ آئی ءَ گوشت کہ پاکستان اے جیڈھ ءَ را او آئی سی، دائمی آمید گس ءُ اقوام متحدہ ءَ گوں زور ءَ چست کنگ ءَ اِنت ءُ رپورٹ پاکستان ءِ موقف ءِ حق ءَ اَنت۔ آئی ءَ اے سال ءَ بنگلہ دیش ءِ گوما سیادی ءِ تہ ءَ مزنیں گہتری ءَ را ’’مزنیں پیشرفت‘‘ لیک اتگ ءُ گوشت کہ آئی ءِ تر ءُ تاب ءِ ساھت ءَ چیف ایگزیکٹو، وزیر ءِ درئی کار ءُ ایندگر مشیر آنی گوما سرجمیں گند ءُ نند کنگ بوتگ، وھدیکہ خالدہ ضیاء، جماعت اسلامی ءُ نودربر گل آنی گوما ھم گند ءُ نند کنگ بوتگ۔ آئی ءَ گوشت کہ نیک راھی ءِ چاگرد سازگ بوتگ، فروری ءِ گچین کاری ءَ پد سیادی ءَ را گیش مھکم کنگ بنت۔ امریکہ ءِ گوما سیادی ءِ بابت ءَ گپ جنان ءَ آئی ءَ گوشت کہ اے سیادی برے برے دیمروئی ءِ سر ءَ بوتگ اَنت ءُ برے برے کمی ءِ سر ءَ بوتگ اَنت بلے جو بائیڈن ءِ گوستگیں دور ءَ سیادی کم بوتگ اَنت وھدیکہ انوگیں انتظامیہ ءِ تہ ءَ تجارت، سرمایہ کاری ءُ دو نیمگی سیادی جوانیں رنگ ءَ روگ ءَ اَنت وھدیکہ انسداد ناشرکاری ءِ تہ ءَ کمک ھم گیش بوتگ۔ نائب مزن وزیر/دری کارانی وزیر ءَ ڈونلڈ ٹرمپ انتظامی ءِ توسیپ کت ءُ گوشت کہ پاکستان ءُ بھارت ءِ نیام ءَ جنگ بندی ءِ تہ ءَ امریکا ءِ ھاسیں کرد بوتگ۔ آئی ءَ گوشت کہ صدر ٹرمپ 11جون ءَ امن برجائی ءِ تہ ءَ آئی ءِ کرد ءِ پد ءَ نوبل امن داد ءِ واستہ نامزد کنگ بوتگ ءُ صدر ٹرمپ ءَ بازیں رند ءَ ھندوستان ءِ 7 بالی گراب آنی تیر گواری ءِ حوالہ داتگ۔ آئی ءَ امریکا ءِ گوما 13.28ارب ڈالر ءِ دو نیمگی تجارت ءِ سر ءَ دل یکیمی ءِ درشان کت ءُ گوشت کہ پاکستان ءِ سر ءَ ایر کنگ بوتگیں امریکی ٹیرف جنوبی ایشیا ءِ تہ ءَ چست تریں تک ءَ انت۔ آئی ءَ ترکی، او آئی سی ءِ باسکیں ملک، چین، یورپی یونین، آسیان، اقوام متحدہ، شنگھائی کمکی گل ءُ روس ءَ ھوار جتا جتائیں ملک ءُ فورم آنی تہ ءَ پاکستان ءِ سروکی ءِ بھر زوری ءُ گند ءُ نند آنی ذکر کت، ایشی ءِ تہ ءَ بازیں اقتصادی، دفاعی ءُ سرمایہ کاری ءِ معاہدہ آنی سر ءَ دستخط کنگ بوت۔ آئی ءَ غزہ ءَ امن ءُ فلسطین ءِ جیڈھ ءِ گیواری ءِ واستہ پاکستان ءِ اصولی موقف ءُ کرد ءِ سر ءَ ھم زور پر دات۔ آئی ءِ رد ءَ گپ ءُ تران، رابطہ، دمگی استحکام، اقتصادی کمک ءُ امن ءِ دیمروئی پاکستان ءِ دری پالیشی ءِ بنیاتی ستون اَنت کہ آ راجی مفاد آنی رد ءَ اَنت۔ اسحاق ڈار ءَ برطانیہ ءَ پی ٹی آئی ءِ زھرشانی ءِ بابت ءَ گْوشتگ کہ اے سرجمیں اشتعال انگیزی یے، ایشی ءِ تہ ءَ کشگ ءِ دھمکی دیگ بوتگ کہ اے ھرچ وڑ ءَ منّگ نہ بیت۔ برطانیہ ءِ حکومت اے وڑیں کارانی گر ءُ دار ءِ زمہ واری ءَ بہ زوریت ءُ اے درگت ءَ برطانیہ ءَ ڈیمارچ دیگ راستیں گامگیج ات۔ آئی ءَ اوگان سرزمین ءَ چہ پاکستان ءَ ناشرکاری اُرش آنی سر ءَ طالبان حکومت ءِ نیمگ ءَ نا وشیں پسو ءِ سر ءَ اپسوز ءِ درشانی کت ءُناشرکارانی ھلاپ ءَ ٹھوس گامگیج چست کنگ بوھگ ءَ نہ انت۔ گڈسرا آئی ءَ گوشت کہ سارک ءِ فعال کرد ءِ تہ ءَ رکاوٹ جوڑ کنوکیں یکیں ملک بھارت اِنت کہ ایشی ءِ سر ءَ افسوس ءِ گپ اِنت۔