پاکستان نا قیام قائد اعظم محمد علی جناح نا سخت جہد و بدل مفروک عزم انا نتیجہ ءِ، ڈپٹی چیئرمین سینیٹ سیدال خان

اسلام آباد۔ 25 دسمبر (اے پی پی) ڈپٹی چیئرمین سینیٹ سیدال خان پارینے کہ پاکستان نا قیام قائد اعظم محمد علی جناح نا سخت جہد و بدل مفروک عزم انا نتیجہ ءِ۔ بانی پاکستان قائد اعظم محمد علی جناح اسہ دوراندیش، عظیم  مدبر و بے مٹ ءُ راہشون اس ئس۔ بابائے قوم قائد اعظم محمد علی جناح نا ودی دے انا وخت آ تینا کلہو اٹی ڈپٹی چیئرمین سینیٹ پارے کہ بابائے قوم تینا دانشمندانہ سرکڑدہ ئی اٹ مسلمان تے یکجا کرسا آجوپاکستان اسے نا تغ ءِ حقیقت کرے، پاکستان نا قیام بیرہ ڈغار نا دوئی کننگ الوکہ دا مسلمان تیکن اسہ آجو و وتواجہ ریاست اسےنا جوڑ کننگ ئس۔ اوپارے کہ قائد اعظم دوقومی نظریہ نا بنداو آ جتا ءُ وطن اسے نا تصور ءِ عملی ءُ دروشم اس تس ہراکہ نظریہ پاکستان نا بنداو جوڑ مس، قائد اعظم نا وژن اسہ پوسکن، جمہوری و آسودہی ریاست اس ئس۔ اوپارے کہ بانی پاکستان نا قربانیک قوم اکن کسر نا ڈیوا ءُ مچ آ قوم اونا خذمت آتے خراج عقیدت پیش کیک۔ سیوت، ایمان ونظم و ضبط قائد اعظم نا روشنا اصول قومی شونداری نا ضمانت ءِ۔ تحریک پاکستان اٹی قائد اعظم نا استقامت و بے مٹ عزم بھلا واکدار آتے ہم شیف کننگ آ بیوس کرے۔ سیدال خان پارے کہ ساڑی حالیت آتیٹی قائد اعظم نا رغاموک آک بھلو اوہمیت اس تخرہ ہرافتیا عمل کرسا قومی ویل آتے ایسر کننگ کینہ، ننے قائد اعظم نا فکر آتے مون آ تخسا مون آہنوئی مریک۔ سیوت و امنائی اٹ سوگو پاکستان ممکن ءِ۔