قیام پاکستان بابائے قوم قائد اعظم محمد علی جناح نا سخت خواری، بدل مفروک عزم، سیاسی بصیرت و مدبرانہ حکمت عملی نا بھرم ءِ، چیئرمین سینیٹ سید یوسف رضاگیلانی

اسلام آباد۔ 25 دسمبر (اے پی پی) چیئرمین سینیٹ سید یوسف رضاگیلانی پارینے کہ قیام پاکستان بابائے قوم قائد اعظم محمد علی جناح نا سخت خواری ، بدل مفروک عزم، سیاسی بصیرت و مدبرانہ حکمت عملی نا بھرم ءِ، پاکستان نا قیام بیرہ اسہ ڈیہہ ڈغار اسے نا دوئی اف بلکن برصغیر نا مسلمان تا اسہ مریس جہد نا پوروی ئس ہرانا کماشی ءِ قائد اعظم محمد علی جناح بے کچ دانائی و دوراندیشی اٹ کرے۔ بابائے قوم قائد اعظم محمد علی جناح نا ودی دے انا وخت آ تینا خصوصی کلہو اٹی چیئرمین سینیٹ پارے کہ قائد اعظم اسہ عظیم مدبر، کانود دان و بے مٹ ءُ راہشون اس ئس ہرا تینا ذہانت، اصول پسندی و ثابت گامی اٹ برصغیرنا مسلمان تے اسہ پلیٹ فارم آ یکجاکرے۔ اونئے بیرہ نیزگار و پسماندہ مسلمان تا توار ءِ بڑزکرے بلکن ہمووخت انا غٹ مسلم اکابرو راہشون تے یکجا کرسا اسہ آجو، وتواجہ و جمہوری ریاست ریاست نا قیام ءِ ممکن کرے۔ سید یوسف رضاگیلانی پارے کہ قائد اعظم محمد علی جناح دوقومی نظریہ نا بنداو آ مسلمان تیکن اسہ جتا ءُ وطن اسے نا تصور ءِ عملی ءُ دروشم اس تس، ہراڑے غٹ شاری تے بے پرخ مذہب ، رنگ و نسل بریبر حق و پورو مذہبی آجوئی دوئی مرے۔ ہندا ہمو وژن ئس ہراپاکستان ءِ اسہ پوسکن و آسودہی ریاست اس جوڑ کننگ نا بنداو ءِ تخا۔ چیئرمین سینیٹ پارے کہ مچ آ قوم بانی پاکستان نا عظیم قربانی و خذمت آتے خراج عقیدت پیش کیک و مدام اونا وامدار سلک۔ قائداعظم نا دوراندیش سرکڑدہ ئی قوم ءِ سیوت، ایمان ونظم و ضبط کون آ روشنا اصول تس ، ہرااینو ہم ننا قومی شونداری  و سوگوی نا ضمانت ءِ۔ اوپارے کہ تحریک پاکستان اٹی محمد علی جناح ہرا استقامت و جیرت تون سلیس، او ہمووخت انا بھلا واکدار آتے ہم اونا عزم انا مون آ شیف کننگ آ بیوس کرے۔ اوپارے کہ ساڑی حالیت آتیٹی قائد اعظم نا رغاموک و راہشون اصول پین اہمیت اختیار کرینے۔ چیئرمین سینیٹ زور شاغا کہ ننے بانی پاکستان نا فکر ءِ مون آ تخسا جندی، گروہی و سیاسی اختلاف آتے پدپشت تخسا امن، جمہوریت ، سگ و شونداری پسندانہ سوچ ءِ مون آ دروئی مریک تانکہ پاکستان ءِ اسہ سوگو، شونہال و مستحکم ریاست اس جوڑ کننگ مرے۔ ایسر اٹ اودعاکرے کہ اللہ تعالیٰ ننے غٹ ءِ قائد اعظم محمد علی جناح نا نقش قدم آ چلینگسا وطن عزیز نا شونداری و شونہالی کن اواری اٹ کاریم کننگ نا توفیق ایتے۔