قائد اعظم نا دوراندیش سرکڑدہ ئی و آفاقی اصول اینو ہم پاکستان ءِ شونداری ، سوگوی و قومی یکجہتی نا کسر آ روان تخنگ کن کسر نا ڈیواءِ، بنجائی وزیر واپار جام کمال خان

اسلام آباد۔ 25دسمبر (اے پی پی) بنجائی وزیر واپار جام کمال خان پارینے کہ قائد اعظم نا دوراندیش سرکڑدہ ئی و آفاقی اصول اینو ہم پاکستان ءِ شونداری، سوگوی و قومی یکجہتی نا کنڈآ روان تخنگ کن کسرنا ڈیواءِ۔ بابائے قوم قائد اعظم محمد علی جناح نا ودی دے انا وخت آ تینا کلہو اٹی بنجائی وزیر واپار پارے کہ قائد اعظم نئے بیرہ برصغیر نا مسلمان تا عظیم قائد ئس بلکن مذہبی آجوئی، آئین نا بالادستی، کانود نا حکمرانی و بریبری کون آ اصول آتا سوگو علمبردار ہم ئس۔ ایمان، سیوت و نظم انا روشنا اصول آتا حوالہ ءِ ترسا بنجائی وزیر زور شاغا کہ قومی سیوت ہی پاکستان نا سوگوی و پائیدار شونداری نا بنداو ءِ و قوم ءِ غٹ تر اختلاف آتے ایڑتر ترسا متحد و منظم وڑاٹ مون آ ہنوئی مریک۔ اوقائد اعظم نا اقلیت آتا حق انا بابت تاریخی فرمان نا ذکر ءِ کرسا پارے کہ پاکستان رواداری، شمولیت و بریبر حق آ جوڑ ریاست ءِ، ہراڑے بے پرخ مذہب غٹ شاری تے بریبر حق ، رکھ و وارخواہی فراوان کننگ حکومت نا اولیت ءِ۔ اوقائد اعظم نا ورناتا بابت وژن نا حوالہ ءِ ترسا پارے کہ ورناچین پاکستان نا روشنا آخبت و قومی شونداری نا اصل قوت ءِ۔ اوورناتیا زور شاغا کہ او تعلیم، سائنس ، ٹیکنالوجی، پٹ وپول و جدت نا پڑ تیٹی مون آبرسا ملک انا شونداری و شونہالی ٹی فعال کڑد ادا کیر ۔ بنجائی وزیر واپار پارے کہ ساڑی حکومت قائد اعظم نا اصول آتا پاسداری ءِ کرسا پاکستان ءِ اسہ پائیدار، سوگو، وتواجہ و الس دوست ریاست اس جوڑ کننگ کن سنبرینگوک ءِ۔ اودعاکرے کہ اللہ تعالیٰ پاکستان ءِ مدام امن، سیوت ، شونداری و شونہالی فرمائفے۔