پاکستان غٹ انا اسیجاءِ، غٹ شاری تے بریبر نا حق و مذہبی آجوئی دوئی ءِ، کس اسے مذہب نا پن آ من مانی کننگ کن اِلیپنہ، وزیراعظم شہباز شریف نا دود آن تران

اسلام آباد۔ 25 دسمبر (اے پی پی) وزیراعظم محمد شہباز شریف زند انا ہر بشخ اٹی مسیحی برادری نا خذمت آتے خراج تحسین پیش کرسا پارینے کہ پاکستان غٹ انا اسیجاءِ، غٹ شاری تے بریبر نا حق و مذہبی آجوئی دوئی ءِ، کس اسے مذہب نا پن آ من مانی کننگ کن اِلیپنہ، زیادتی آ کانود حرکت اٹی بریک۔ اوداخیال آتا درشانی ءِ پنچ شنبے نادے آ داڑے کرسمس نا وخت آ وزیراعظم ہاؤس اٹی اڈ ہلوک دود آن تران کرسا کرے۔ داوخت آ بنجائی وزیر آک، اسمبلی نا باسک آک، مسیحی برادری نا سرکڑدہ شخصیت آک و سفارتی کمامدار آک ہم ساڑی ئسر۔ وزیراعظم پارے کہ حضرت عیسیٰ علیہ السلام اللہ نا پیغمبر ئس ہرا انسانیت ءِ ظلم و جور آن نجات ترفے، دست شفا جوڑ مس و انسانیت تون مہرومریبت ، امن  و شرف نا کلہو ءِ لس کرے۔ اینو دنیا ءِ دا کلہو آ عمل کننگ نا غٹ آن زیات گرج ءِ۔ وزیراعظم پارے کہ پاکستان اٹی مسیحی برادری تون اوار اقلیت آتے بریبر نا حق دوئی ءِ، اوفتا قدر انا قابل تاریخی کڑد طب، دفاع وطن ، عدلیہ ، تعلیم ، جان جوڑی تون اوار زند انا ہر بشخ اٹی نمان نظربریک، مئی ٹی بھارت پاکستان آ جلہو کرے تو فیلڈ مارشل سید عاصم منیر نا ولولہ انگیز کماشی ٹی پاکستان نا سلہہ بند فوج دشمن ءِ پبی ورندی تس، پاک فضائی حرکت اٹ بس و دشمن نا ہفت جہا ز آتے بِٹے تو سیسل چوہدری نا یات تازہ مس، وزیراعظم پارے کہ قائد اعظم محمد علی جناح تینا خطبہ غاتیٹی اقلیت آتا مذہبی آجوئی آ زور شاغا، دا ننا آئین نا بشخ ءِ، مسلم لیگ ن و قائد مسلم لیگ ن میاں نواز شریف مدام اقلیت آتے شرف و عزت تس، رائیونڈ اٹی اوفتے کن دود اڈ تس۔ وزیراعظم پارے کہ ہارون ولیم دشمن تون جنگ ترسا تینا جان ءِ ندر کرے تو او فیلڈ مارشل تون اوار اونا آخیریکو رسم آتیٹی بشخ ہلک۔ اوپیدوار کرے کہ پاکستان اٹ ہر شاری ءِ تینا مذہب آ عمل نا پورو آجوئی دوئی ءِ، کس اسے مذہب نا پن آ من مانی کننگ کن اِلیپنہ و شاری تتون زیاتی آ کانود حرکت اٹی بریک ، داننا غٹ انا اسیجا وطن ءِ و داڑے غٹ شاری تے بریبر نا حق دوئی ءِ۔ اوپارے کہ شونداری و شونہالی نا سفر آ ننے غٹ ءِ ہم کوپہ مون آ ہنوئی ءِ، وزیراعظم مسیحی برادری نا سرکڑدہ راہشون آتون اوار کرسمس نا کیک ءِ کاٹ کرے و مسیحی برادری کن کرسمس آ نیک است خواہی نا درشانی ءِ کرے ۔ داکان مست وزیرمملکت بین المذاہب ہم گرنچی کھیئل داس کوہستانی پارے کہ پاکستان اٹ ہندو، مسیحی ، سکھ آتون اوار غٹ اقلیت آتے پورو آجوئی دوئی ءِ و او بریبرنا شاری ءُ، اقلیت آک حکومت تون ہم کوپہ ءُ وخت اس کہ بھارت اٹی مودی مذہب نا پن آ خار تالان کننگ ءِ، ہموڑے اقلیت آتے آجوئی و رکھ دوئی اف۔ قومی اسمبلی نا باسک نیلسن عظیم پارے کہ مسیحی برادری کن وزیراعظم ہاؤس اٹی دود ستاکڑزک، وزیراعظم نا منت وار ہرا اقلیت آتے قومی دنگ اٹ اوار کرے، کرسمس امن مہرومریبت و درگزر نا کلہو ایتک، دود آن مسیحی راہشونک ہم تران کریر و وزیراعظم نا منت واری ءِ ہرفیر۔