قائداعظمؒ نا نقشِ قدم آ چلینگسا پاکستان نا عزت ، سلامتی و شونہالی کن یکجا مرسا خواری کینہ ، وزیراعلیٰ بلوچستان

کوئٹہ۔ 25 دسمبر (اے پی پی) وزیراعلیٰ بلوچستان میر سرفراز بگٹی بابائے قوم قائد اعظم محمد علی جناح نا 149 می ودی دے آ تینا کلہو اٹی پارینے کہ قائداعظمؒ نا روشنا اصول ایمان، سیوت و تنظیم ننا قومی آخبت نا سوگو ضمانت ءِ، قائداعظمؒ نا نقش قدم آ چلینگسا پاکستان نا عزت ، سلامتی و شونہالی کن یکجا مرسا خواری کینہ۔ وزیراعلیٰ میر سرفراز بگٹی پارے کہ قائداعظمؒ دیانت، کانود نا بالادستی و بریبری آ تالان ریاست نا تصور تس، ہراڑآ عمل المی ءِ۔ وزیراعلیٰ بلوچستان پارے کہ بابائے قوم نا تعلیمات ننے سیوت و اسٹی اتون قومی چیلنج آتا مقابلہ ءِ کننگ نا حوصلہ ایتک۔ اوپارے کہ قائدا عظم نا پاکستان غٹ شاری تیکن امن، سگ و انصاف نا چیدہ ءِ، پوسکن آ چین ءِ قائداعظمؒ نا فکر آن روشناس کرفنگ ننا اسیجائی قومی زمواری ءِ۔ میر سرفراز بگٹی پارے کہ قائداعظمؒ نا وژن نا رداٹ سوگو، وتواجہ و شونہال پاکستان نا جوڑ کننگ کن سنبرینگوک اُن۔