نائب وزیراعظم و وزیرخارجہ سینیٹر محمد اسحاق ڈار نا قائد اعظم محمد علی جناح نا ودی دے و کرسمس 2025 نا وخت آ کلہو

اسلام آباد۔ 25 دسمبر (اے پی پی) نائب وزیراعظم و وزیرخارجہ سینیٹر محمد اسحاق ڈار قائد اعظم محمد علی جناح نا ودی دے و کرسمس 2025 نا وخت آ تینا کلہو اٹی پارینے کہ اینو نن بانی پاکستان قائد اعظم محمد علی جناح نا ودی دے ءِ اڈتننگ تون تینا مسیحی سنگت آتا تہوار ۔ کرسمس نا دود آتے ہم اڈتننگ اُن۔ دا اسیجائی وخت ہمو جوان وژن و اخلاقی بنداو تا عکاسی ءِ کیک ہرافتیا پاکستان جوڑ مسوسس۔ پنچ شنبے نادے آ دفترخارجہ غان جاری بیان نا رداٹ نائب وزیراعظم و وزیرخارجہ سینیٹر محمد اسحاق ڈار تینا کلہو اٹی پارینے کہ قائد اعظم محمد علی جناح نئے بیرہ ننا آجوئی نا معمار ئس بلکن بدل مفروک اصول و غیر معمولی بصیرت نا حامل اسہ عظیم ءُ مدبر اس ہم ئس۔ اوپاکستان ءِ اسہ ہندن ءُ جمہوری ریاست اسے نا وڑاٹ ہرا ہراڑے بریبر، تکثیریت و غٹ شاری تا بنداوی حق انا شرف بے پرخ مذہب، رنگ و نسل نا مرے۔ 11 اگست 1947 نا تینا تاریخی تقریر اٹی او پیدوار وڑاٹ فرمائفے کہ ریاست شاری اسے نا نیام اٹ ہچ ءُ پرخ اس روا تخپک۔ اقلیت آتا حق، بریبری و مذہبی آجوئی نا رکھ ننا آئین و قومی تشخص نا بنداوی تمبہ ءِ۔ نائب وزیراعظم ووزیرخارجہ پارے کہ ای اینو نادے انا رداٹ مسیحی ہم وطن آتے کرسمس نا مبارکبادی ایتیوہ و مذہبی آجوئی، بریبری و تکثیریت کن تینا بدل مفروک عزم انا درشانی ءِ کیوہ، دُن کہ ننا بانیانِ پاکستان نا تصور ئس و ہرا ننا آئین اٹی ہم خننگک۔ اوپارے کہ ننا مسیحی سنگت آک تعلیم، جان جوڑی ، السی خذمت و قومی دفاع نا بشخ آتیٹی پاکستان نا شونداری و شونہالی ٹی بھلو خذمت اس سرتسنے و مدام خلوص ، حب الوطنی و وقار اتون ملک انا خذمت ءِ کرینے۔ کرسمس امن، ہمدردی، قربانی و انسانیت تون مہرومریبت کون آ آفاتی قدر انا چیدہ ءِ۔ دا غٹ قدر آک اسلامی تعلیمات و قائد اعظم نا تصورِ پاکستان تون پورو ہم گرنچ ءُ۔ نائب وزیراعظم ووزیرخارجہ محمد اسحاق ڈار پارے کہ اینو ہراتم دنیا ءِ بے سگی و بشخنگ کون آ چیلنج مون تروک ءِ، پاکستان تکثیریت ، بین المذاہب ہم گرنچی و پرامن بقائے تین پہ تینی نا تینا عزم انا درشانی ءِ کیک۔ ننا ایلمی ننا واک و گمر نا سوب ءِ۔ اوپارے کہ اینو قائد اعظم نا میرات ءِ خراج عقیدت پیش کرسا و کرسمس نا خوشی تے اڈترسا، ببو نن امن، خیرخواہی و تین پہ تینی شرف نا دا کلہو ءِ مدامی کن مون آ دین۔ نائب وزیراعظم و وزیرخارجہ پارے کہ ای ایسر اٹی اسہ وار ولدا مچ آ دنیا نا غٹ مسیحی برادری تے کرسمس نا مبارکبادی ایتیوہ و قائد اعظم محمد علی جناح ءِ زبردست خراجِ عقیدت پیش کیوہ۔ پاکستان زندہ باد