پی آئی اے ءِ نجکاری یک مزنیں ءُ راجدپتری سودا یے بوتگ، نیشنل ایئر لائن ءِ پیسریگیں  شرپ ءُ ازت ءَ را واتر آرگ ءِ سفر گوں ترندی ءَ بندات بوتگ، عطاء اللہ تارڑ

اسلام آباد۔24دسمبر  (اے پی پی): وفاقی وزیر ءِ اھوالکاری ءُ شنگ کاری عطا اللہ تارڑ ءَ گوشت کہ پی آئی اے ءِ نجکاری یک مزنیں ءُ راجدپتری سودا یے بوتگ، راجی بالی گراب ءِ پیسریگیں شان ءُ شانی ءَ را پدا آرگ ءِ سفر تذری ءَ چہ بندات بیت۔ چار شمبے ءِ روچ ءَ ادا پی ٹی وی ھیڈ  کوارٹر ءَ چیئرمین پرائیویٹائزیشن کمیشن محمد علی ءُ سیکرٹری پرائیویٹائزیشن کمیشن عثمان اختر باجوہ ءِ گوما پریس کانفرنس ءَ گوں تران کنان ءَ وفاقی وزیر ءِ اھوالکاری ءَ گوشت کہ پی آئی اے ءِ سوبمندیں نجکاری ءِ سر ءَ ڈائریکٹر پرائیویٹائزیشن محمد علی ءُ آئی ءِ ٹیم ءَ را مبارک بات دیگ ءَ انت۔ پی آئی اے ءِ نجکاری یک زرین موہ یے ۔ اے مزن وزیر محمد شہباز شریف ءِ پنت ءُ شون ءِ یک جتائیں بہرے ات کہ آ تاوان ءِ سبب جوڑ بوتگیں سرکاری ادارگ آناں نجکاری بہ کنت ءُ اے گامگیج ملک ءِ اقتصادی برجای ءِ تہا ھاسیں کرد پیلو کنت۔ وفاقی وزیر ءَ گوشت کہ اولی ڈیل فرسٹ وومن بینک ءِ گوما بوتگ، ایشی ءِ تہ ءَ جی ٹو جی ءِ معاہدہ ءِ سر ءَ دستخط کنگ بوتگ۔ ایشی ءَ پد پی آئی اے ءِ گوما سک مزنیں ءُ زرینیں سودا یے بوتگ۔ مزن وزیر محمد شہباز شریف ءِ پنت ءُ شون ءِ سرا پی آئی اے ءِ بولی ءِ عمل ٹی وی ءِ سرا براہ راست پیش کنگ بیت کہ ایشی ءَ سرجمیں راج چاریت۔ آئی ءَ گوشت کہ بولی ءِ عمل سک ساپ ءُ  سلہ بوتگ،  ٹوھیں زانتکار آں ایشرا   جوانیں کار ءِ  درشان کتگ۔ پیسریگیں وزیر خزانہ مفتاح اسماعیل  ءَ اے کار ءَ را جوانیں سودا لیک اتگ۔ عطا اللہ تارڑ ءَ گوشت کہ 1990 ءِ زمانگ ءَ چہ ما اِش کنگ ءَ اتیں کہ پی آئی اے ءَ را نجکاری کنگ بوھگ ءَ انت بلے ایشی ءِ تہ ءَ ھچ وڑیں سوبمندی نہ رؤگ ءَ ات۔ ما اللہ تعالیٰ ءِ شگر ءُ منت وار ایں کہ مرچی یک راجدپتری روچے کہ پی آئی اے ءِ نجکاری کنگ بوتگ۔ مزن وزیر محمد شہباز شریف، فیلڈ مارشل ءُ سرجمیں ٹیم ءِ کوشست اے سوبمندی ءِ سبب انت۔ وفاقی وزیر انفارمیشن ءَ گوشت کہ ما گوستگیں وھد ءَ ھمے روچ دیستگ کہ یورپ ءُ امریکہ ءِ راہ پی آئی اے ءِ واستہ بند کنگ بوتگ اَنت ءُ زانت ءُ زانگ ءَ لوگ ءِ تہ ءَ اوشتاتگ ءُ جنجالی پابندی داتگ اَنت۔ اللہ ءِ شکر انت کہ انوگیں حکومت ءِ دور ءَ اے راہ پدا پچ کنگ بوتگ انت ۔ پی آئی اے ءِ مانچسٹر کالے ءِ بالی گراب ءِ حوالہ ءَ وفاقی وزیر ءِ اھوالکاری ءَ گوشت کہ پاکستانی آں پی آئی اے ءِ بالی گراب ءَ را پاکستانی بیرک ءِ سر ءَ استر کنگ ءَ وش آتک کتگ ایشی ءَ چہ الس ءِ راجی جزم ءِ درشان اِنت۔ آئی ءَ گوشت کہ پاکستانی ڈائسپورا راجی بالی گراب ءِ وسیلگ ءَ ملک ءَ واتر بوھگ لوٹ ایت چیاکہ ایشی ءِ وسیلگ ءَ دیم پہ دیمیں بالی گراب آنی مقابلہ ءَ 15 ءَ چہ 16 کلاک بچت انت۔ آئی ءَ گوشت کہ پی آئی اے ءِ سالانہ تاوان برے 35ارب ءُ برے 50ارب کلدار بوتگ بلے 2023 ءَ گشگ بوتگ کہ سالانہ 75ارب کلدار ءِ تاوان بوتگ۔ آئی ءَ گوشت کہ پی آئی اے ءِ نجکاری ءَ پد اے تاوان راجی خزانہ ءِ سر ءَ دگہ بار نہ بیت، ءُ اے تاوان ءِ پورا کنگ ءِ واستہ ٹیکس دہندگانی نیمگ ءَ چہ ھچ وڑیں ادائیگی نہ بیت۔ وفاقی وزیر ءَ گوشت کہ سرجمیں دگنیا ءَ ماہرین اے ڈیل ءِ سر ءَ گپ ءُ تران کنگ ءَ اَنت ءُ اے حکومت ءِ کوشست، ایف بی آر ءِ گہتری ءُ وتی ملکی اقتصادی ایجنڈا ءِ سوبمندی ءِ درشان اِنت۔ آئی ءَ گوشت کہ راجی بالیگ ءِ پیسریگیں شان ءِ پد ءَ آرگ ءِ سفر نوکیں رنگ ءَ بندات بیت۔ آئی ءَ گوشت کہ سرکاری ادارگ آنی نجکاری ءِ گامگیج برجاہ بنت، اگاں چہ ما اولی روچ ءَ اے نعرہ چست کتگ ات کہ حکومت ءِ کار کاروبار کنگ نہ انت، پرائیویٹ سیکٹر دیم ءَ بیا ایت۔ یک جستے ءِ پسو ءَ وفاقی وزیر ءِ اطلاعات ءَ گشتگ کہ پی آئی اے ءِ نجکاری ءِ عمل سرجمیں دنیا ءَ دیستگ، پی آئی اے ءِ ڈیل چہ توقع ءَ گیش ساپءُ سلہ بوتگ، اے سرجمیں دنیا ءَ جوانیں تاثر ءِ واھند اِنت، البت ھما مردمانی واستہ کہ سرپد نہ بنت، منی گور ءَ سئے گال اَنت: "زوت وش باتے” ۔