مزن وزیر شہباز شریف ءَ اقتصادی دیمروئی ءِ واستہ دکہ آنی ھوالگ ءَ پرائیویٹ سیکٹر ءِ کارگس ءِ دیوان ءِ سروکی

اسلام آباد۔24دسمبر  (اے پی پی): مزن وزیر محمد شہباز شریف ءَ پنت ءُ شون کتگ کہ دکہ آنی سر ءَ استیں  سامان آنی نیلامی ءِ   کار  ساپ ءُ سلہ کنگ بہ بیت۔   پاکستان ءِ توامیں دکہ آنی تہ ءَ گیشی ءِ سر ءَ کار کنگ بہ بیت تانکہ مزنیں جہاز لنگر بند بہ کن اَنت۔ چار شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں پریس ریلیز ءِ رد ءَ مزن وزیر محمد شہباز شریف ءِ سروکی ءَ اقتصادی دیمروئی ءِ واستہ دکہ آنی ھوالگ ءَ نجی شوبگ ءِ ورکنگ گروپ ءِ دیوان برجم دارگ بوت۔ گند ءُ نند ءَ وفاقی وزیر احسن اقبال، احد خان چیمہ ، محمد جنید انور چوہدری، مصدق ملک، وزیر مملکت بلال اظہر کیانی، ھاسیں کمکار ہارون اختر ءُ سیادی داروکیں مزنیں سرکاری کارندہ آں بہر زرتگ۔ مزن وزیر ءَ را کاروباری برات ءِ واستہ بندر آنی تہ ءَ آسراتی ءُ گہتری ءِ ھوالگ ءَ سپارش پیش کنگ بوت۔ مزن وزیر ءَ گوشت کہ ملک ءَ کاروبار ءُ اقتصادی دیمروئی ءِ تہ ءَ گیشی ءِ تہ ءَ مئے بندر سک باز المی ئیں کرد ءِ پیلو کن اَنت۔ مزن وزیر ءَ پنت ءُ شون کت کہ کاروباری براتی ءِ آسراتی ءِ واستہ دکہ گوں سیادی داروکیں جتا جتائیں ادارگ آناں کمک ءَ را گیش گہتر کنگ لوٹ ایت تانکہ کارگو ءِ ڈویل ٹائم (Dwell Time) کم چہ کم کنگ بہ بیت، ءُ جتا جتائیں رنگ ءِ دکہ ءِ چارجز ءَ را گیش کم کنگ بہ بیت۔ آئی ءَ پنت ءُ شون کت کہ دکہ آنی تہ ءَ لیٹ اتگیں یلہ داتگیں کارگو آنی رد کنگ ءِ واستہ ساپءُ سلہیں نظام آرگ بہ بیت، ملک ءِ جتا جتائیں دکہ آنی تہ ءَ یلہ داتگیں بار آنی واستہ جتا جتائیں یارڈ جوڑ کنگ بہ بنت ءُ ایشی ءِ واستہ دگنیا ءِ نامداریں کمپنی آنی سروسز زورگ بہ بنت۔ آئی ءَ پنت ءُ شون کت کہ کارگو ٹیسٹنگ ءِ واستہ بنداتی ٹیسٹ دکہ آنی تہ ءَ وت کنگ بہ بنت ءُ گوشت کہ کارگو ءِ واستہ المی ئیں لیبارٹری ٹیسٹ ہلاس کنگ بہ بنت۔ آئی ءَ پنت ءُ شون کت کہ پاکستان ءِ توامیں دکہ آنی ڈریجنگ ءُ موسائینگ ءِ کار ءَ ترند کنگ بہ بیت تانکہ مزنیں جہاز لنگر بند بہ کن انت۔ مزن وزیر ءَ گوشت کہ ملکی کارگو ءِ ٹرانسپورٹ ءِ واستہ بندر آنی نیمگ ءَ چہ ریل کنیکٹوٹی ءَ را گیش گہتر کنگ بہ بیت۔ مزن وزیر ءَ زیاد بشرہ ءِ سروکی ءَ کارگس ءِ محنت ءُ ٹھوس سوج ساڑات۔ زیاد بشرہ ءَ گوشت کہ پی آئی اے ءِ ساپءُ سلہیں نجکاری ءَ چہ پاکستان ءِ کاروباری براتی ءِ دلبڈی ءَ را بے دروریں رنگ ءَ گیش کتگ۔ مزن وزیر ءَ را گند ءُ نند ءِ تہ ءَ بریفنگ دیگ بیت کہ نیشنل پورٹس ماسٹر پلان ءِ سر ءَ کار زوال ءَ انت، پورٹ کمیونٹی سسٹم انوگیں وھد ءَ آپریشنل بوتگ۔ مزن وزیر ءَ را گوشگ بیت کہ پاکستان ءِ بندر آنی سر ءَ جتاجتائیں فیس کم کنگ بوھگ ءَ انت ءُ انوگیں وھد ءَ پورٹ قاسم ءَ بلک کارگو ءِ فیس 50درسد ءَ چہ گیش کم کنگ بوتگ، پاکستان ءِ جتا جتائیں بندر آنی تہ ءَ نوکیں سرمایہ کاری ءِ گوما ایشانی کارکردگی گہتر بوھگ ءَ انت۔ بریفنگ ءَ گوشت کہ یلہ داتگیں کارگو ءِ انتظام ءِ واستہ سک زوت ای بولی ءِ نظام ءِ بندات کنگ بوھگ ءَ اِنت، ایشی ءِ وسیلگ ءَ سرجمیں ملک ءَ چہ ھرکس چہ ھر جاگہ ​​ءَ بھر زوری کنگ ءِ وس ءَ دار ایت۔ کراچی ءِ دکہانی مزن کنگ ءُ ڈریجنگ ءِ واستہ ٹینڈر دیگ بوتگ ءُ باز زوت کار بندات بیت۔