پی آئی اے نا نجکاری آن کارکڑد اٹی گچینی، زرکاری ٹی ودکی مریک، سلاہکار نجکاری محمد علی نا پریس کانفرنس

اسلام آباد۔ 24 دسمبر (اے پی پی) وزیراعظم نا سلاہکار نجکاری محمد علی پارینے کہ پی آئی اے نا نجکاری آن کارکڑد اٹی گچینی بریک، مستین اٹ بھاز انگا ردینک مس، نجکاری آن زرکاری ٹی ودکی مریک، پی آئی اے نا غٹ آن بھلا میرات اونا روٹس ءِ، پی آئی اے سالانہ 40 لکھ مسافر آتے آسراتی فراوان کیک، کیہی سال مست پی آئی اے تون 50 جہا زآپریشنل ئسر ہرا داسہ بایدے 100 مروسر، پی آئی اے تون 30 درسد مارکیٹ شیئرءِ ، نجکاری آن پی آئی اے نا عظمت رفتہ بحال مریک، نجکاری آن پد جی ڈی پی ٹی ہم ودکی مریک۔ داخیال آتا درشانی ءِ او چارشنبے نادے آ داڑے پریس کانفرنس اٹی کرے۔ داوخت آ بنجائی وزیر حوالکاری و شینکاری عطاء اللہ تارڑ و ایلو بڑزکو کمامدارآک ہم ساڑی ئسر۔ سلاہکار نجکاری تدوک آ دے قومی فضائی کمپنی (پی آئی اے) نا نجکاری نا عمل پورو مننگ آ قوم ءِ مبارکبادی ترساپارے کہ نجکاری نا عمل نا پوروی ٹی وزیراعظم محمد شہباز شریف ، نائب وزیراعظم و وزیرخارجہ سینیٹر محمد اسحاق ڈار، آرمی چیف فیلڈ مارشل سید عاصم منیر تون اوار غٹ راہشونی و کمک کریر۔ اوپارے کہ عارف حبیب کنسورشیم غ آن زیات بولی تس ہراڑآ او مبارکباد نا حقدار ءِ۔ سلاہکار وزیراعظم محمد علی پارے کہ پی آئی اے نا نجکاری نا بابت مالیاتی سلاہکار آتا کارکڑد ستاکڑزوک ئس۔ اوپارے کہ پی آئی اے نا نجکاری نا عمل سرسہبی اٹ پورو مننگ حکومت نا کوشست آتا عکاسی ءِ و داڑآ بلاوجہ تنقید کننگ انگ ءِ۔ داوخت آ اوسرجمی اٹ پریزنٹیشن ہم تس۔ اوپارے کہ نجکاری نا عمل نا پوروی ٹی بنجائی وزیر حوالکاری و شینکاری عطاء اللہ تارڑ ہم پبی کمک کرے و اونا کارکڑد سفت نا قابل ءِ۔