پاکستان اٹی زرکاری نا جم چاگڑد پیدوار وڑاٹ مثبت کنڈآ ہِننگ ءِ، خرم شہزاد

اسلام آباد۔ 24 دسمبر (اے پی پی) وزیرخزانہ نا سلاہکار خرم شہزاد پارینے کہ پاکستان اٹی زرکاری نا جم چاگڑد پیدوار وڑاٹ مثبت کنڈآ ہِننگ ءِ و ہندی زرکارآتون اوار اوار درملکی زرکارآک ہم زرکاری کن بننگ ءُ ہرا بدل مروک زرگزرانی بیانیہ نا غٹ آن بھلا سرسہبی ءِ۔ چارشنبے نادے آ راجی رابطہ نا ویب سائٹ ’’ایکس‘‘ آ تینا اسہ کلہو اسے ٹی اوپارے کہ ناقدین آتا سلاہ نا برعکس ملک اٹی زرکاری نا جم چاگڑد پیدوار وڑاٹ مثبت کنڈآ ہِننگ ءِ۔ اوپارے کہ پاکستان اٹ ساڑی آ وخت اٹی مروک آ زرکاری معاہدہ دا تاثر ءِ پیدواروڑاٹ غلط ثابت کننگ ءِ کہ ملک زرکاری کن موزوں اف۔ بیرہ منہ نمان سود ہی جم وڑاٹ 545 ارب روپئی (کم و ود 1.95 ارب ڈالر) نا زرکاری ءِ حقیقت اٹ بدل کرینے، ہرا ملکی زرگزران اٹی پت انا سوگو چیدہ ءِ، ساڑی آ بھلا معاہدہ غاتیٹی اینگرو نا کنڈآن دیودار(جاز) انا 157 ارب روپئی ٹی دوئی کننگ، اتصلات نا ٹیلی نار پاکستان ءِ 108 ارب روپئی ٹی ہلنگ، میپل لیف نا پائنیر سیمنٹ 76 ارب روپئی ٹی دوئی کننگ، نشاط گروپ نا رفحان میز 68.5 ار ب روپئی ٹی ہلنگ و غٹ آن نمان عارف حبیب نا کماشی ٹی کنسور شیم نا کنڈآن پی آئی اے نا 75 درسد حصص نا 135 ارب روپئی ٹی دوئی کننگ اوار ءِ، ہرا پورو نجکاری نا دروشم اٹ کم و ود 180 ارب روپئی اسکان ہِننگ کیک۔ اوپارے کہ ہندا رداٹ معدنیات و کانڑ کنی نا بشخ اٹی ہم اسہ اہم پیش رفت اس مون آ بسنے ہراڑے پنچ بھلا کاروباری گروپ آتیا تالان پوسکن آ کنسورشیم پاکستان اٹی پترینگانے ، دا کنسور شیم نا جم مالیت 5 ارب ڈالر آن زیات پاننگ انگ ءِ و دا بھلو کچ اسے آ زرکاری نا ڈٹ آتیا کاریم کننگ نا ارادہ تخک، دا غٹ پیش رفت ہندن ءُ وخت اسے ٹی مننگ ءِ ہراتم گوگل ہم پاکستان اٹی پوسکن زرکاری نا پڑو کرینے۔