پاکستان و چین انا تعلقداریک وخت انا سختی تیان سرسہبی اٹ پیش تمانو، سی پیک ملک اٹی انفراسٹرکچر ، صنعت و دودوربیدہ ئی شونداری نا پوسکن آ دور انا بنداو ءِ تخا، عطاء اللہ تارڑ

اسلام آباد۔ 24 دسمبر (اے پی پی) بنجائی وزیرحوالکاری وشینکاری عطاء اللہ تارڑ پارینے کہ پاکستان و چین انا تعلقداریک وخت انا سختی تیان سرسہبی اٹ پیش تمانو، سی پیک ملک اٹی انفراسٹرکچر، صنعت و دودوربیدہ ئی شونداری نا پوسکن آ دور انا بنداو ءِ تخا ہراٹی ہڑتوم آملک آتا الس نا نیام اٹ فاصلہ کم مس و تین پہ تینی ہم گرنچی سوگو مس۔ چارشنبے نادے آ داڑے 9 می چین پاکستان اکنامک کوریڈور (سی پیک) میڈیا فورم آن تران کرسا بنجائی وزیر حوالکاری پارے کہ پاکستان ءِ چین اتون خصوصی و اسٹریٹجک تعلقداری تا اعزا ز دوئی ءِ ہرا پین ملک اسے دوئی اف۔ آئرن ایلم تا اصطلاح بیرہ پاکستان و چین نا تعلقداری ٹی استعمال مریک۔ اوپارے کہ چین پاکستان اقتصادی راہداری (سی پیک) ملک اٹی نئے بیرہ بنداوی پنجر نا تفنگ ، صنعت آتا جوڑ کننگ و زرکاری نا وارخواہی فراوان کرے بلکن دودوربیدہ ئی بدلی نا ہم سوب جوڑ مس۔ اونا اثرآک ہمووخت آہم مون آ بسر ہراتم چینی شاریک روانی اٹ اردو ٹی ہیت کیرہ و پاکستانی شاریک فصیح چینی زبان اٹی گپ وتران کرسا خننگرہ۔ اوپارے کہ سی پیک زبان و بشخنگ نا اڑاند آتے پرغسا ہم گرنچی ءِ مون آ درے و بیلٹ اینڈ روڈ انیشی ایٹیو نا رداٹ سڑک، پول،بندرگاہ و صنعت آتون اوار اوار پاک چین سنگتی نا اسہ بے مٹ ءُ پول اس ہم تفے۔ عطاء اللہ تارڑ پارے کہ سی پیک نا اولیکو ریسہ نا بناو داوخت آ چینی صدر شی جن پنگ نا دورہ پاکستان ملکی تاریخ نا اہم مزل ئس ہرادے زرگزران نا بحالی کن اسہ فیصل کن موڑ اسےنا وڑاٹ مدام یا ت تخنگک۔ اوپارے کہ دا ڈٹ آن ورنا، میڈیا ، صنعت و ایلو غٹ زند انا بشخ آتیکن روزگار و شونداری نا گیشتر وارخواہی ودی مس و سی پیک نا جم تاثر مدام مثبت مسنے۔ ڈیجیٹل دور آ ہیت کرسا بنجائی وزیر پارے کہ وزارت حوالکاری و شینکاری ٹی پاکستان نا اولیکوڈیجیٹل کمیونیکیشن ڈیپارٹمنٹ جوڑ کننگا انتئے کہ گچین ریاستی ابلاغ کن ڈیجیٹل ساڑی گری المی مسنے۔ اوپارے کہ ڈیجیٹل پاکستان ٹی وی ءِ بطور انگریزی اسٹریٹجک کمیونیکیشن پلیٹ فارم اس درستی راستی کرفنگا ہرانا ہروک آتسکان رسینگ و ویور شپ اٹی پدریسہ ودکی مننگ ءِ۔ اوپیدوار کرے کہ دا گام گیج سیاسی جماعت اسے کن آخا بلکن ریاست پاکستان نا فائدہ ٹی کننگا تانکہ بروک آ وزراء حوالکاری کن اسہ سوگو و پائیدار نظام اس ساڑی مرے۔ بنجائی وزیر پارے کہ بھارت تون بے چیٹی ٹی پاکستان ءِ بھلو کچ اسے آ غلط معلومداری و گمراہ کن پروپیگنڈاتون مون تروئی تما۔ اوپارے کہ بھارتی میڈیا و گڑاس یوٹیوب چینل آک غیرزموارانہ رپورٹنگ کرسا سٹی ءُ خبر تالان کریر، ولے پاکستانی میڈیا زموارانہ صحافت نا درشانی ءِ کرے ہرانا سوب جہانی کہول آ بیانیہ نا جنگ اٹی پاکستان ءِ سرسہبی دوئی مس انتئے کہ ملکی پڑ سوگو آدوتیٹی ئس۔ اوپارے کہ بھارت پاکستانی یوٹیوب چینل آتیا پابندی خلک ولے پاکستانی ورناو ڈیجیٹل ٹیم پوسکن آ ٹیکنالوجی نا کمک اٹ گچین حکمت عملی اس اختیار کرے و بھارت نا جغرافیائی دنگ انا تہہ ٹی پاکستان نا مواد آتا ترسیل ءِ پک کرے۔ اوپارے کہ دا واقعہ داہیت انا شاہدی ءِ کہ ٹیکنالوجی و بیانیہ سازی نا وڑوڈول ترندی اٹ بدل مننگ ءِ و وخت اتون تینے ہم گرنچ کننگ المی ءِ۔ عطاء اللہ تارڑ پارے کہ جہانی کہول آ غلط معلومداری تے ساڑی آدور انا غٹ آن بھلا چیلنج گوندنگ انگ ءِ و سی پیک نا بابت تالان کروک آ منفی مہم حقیقت اٹ لاعلمی نا نتیجہ ءِ۔ اوپارے کہ سی پیک تون منفی پلو آتے وابستہ کننگ مفک و دنیاءِ دا ڈٹ انا اصل حقیقت آن معلومدار کننگ ننا غٹ انا اسیجائی زمواری ءِ۔ سی پیک 2.0 نا بابت بنجائی وزیرپارے کہ دا اولیکو ریسہ نا سرسہبی نا منطقی چرجوئی ءِ۔ سی پیک1.0 ٹی حکومت تون حکومت معاہدہ غاتا رداٹ گوادر بندرگاہ و گوادر بالی پٹ کون آ اہم ڈٹ آک پورو مسر وخت اس کہ سی پیک 2.0 ٹی بزنس ٹو بزنس کمکاری نا کمک اٹ نجی بشخ و صنعت کار آتے واکدار کننگ انگ ءِ۔ اوپارے کہ ساڑی آ دورہ چین اٹی 8.5 ارب ڈالر مالیت نا معاہدہ و مفاہمتی یات داشت آتیا دستخط کننگا ہرا سی پیک 2.0 نا بھلا سرسہبی ءِ۔ اوپارے کہ سی پیک 2.0 نا مثبت کِسہ غاتے تالان کننگ کن پبلک پرائیویٹ پارٹنر شپ نا رداٹ اسیجائی کوشست المی ءِ۔ داوخت آ او پاکستان چائنا انسٹی ٹیوٹ نا رداٹ سی پیک و پاک چین کمکاری نا بابت اسہ ڈیجیٹل فیکٹ چیک فورم اسے نا جوڑ کننگ نا سلاہ تس ہرا جعلی خبر آتا پیدواری و سہی معلومداری نا وخت آ فراوانی ٹی کمکار مریک۔ بنجائی وزیر پارے کہ بروک آ سال پاکستان وچین نا نیام اٹ سفارتی تعلقداری نا 75 سال پورو مننگ ءِ ہرا ہڑتوم آ ملک آتا سنگتی ٹی اہم ءُ مزل نانشان اسے۔ اوپارے کہ داوخت آ صحافی، اینکر پرسن و ڈیجیٹل میڈیا انفلوئنسر آتا ہن و بر تون اوار میڈیا کمکاری ءِ پین بایدے ودفنگے تانکہ ڈیجیٹل دنیا ٹی پاک چین سنگتی نا سوگو عکاسی مننگ کے۔ بنجائی وزیر حوالکاری پارے کہ وزیراعظم محمد شہباز شریف ، حکومت پاکستان و وزارت حوالکاری و شینکاری پاک چین میڈیا کمکاری ءِ خاص کر ڈیجیٹل بشخ اٹی پین سوگو کننگ کن سنبرینگوک ءُ، و سی پیک نا برخلاف منفی پروپیگنڈا نا گچین و مدلل ورندی ءِ تننگک۔ اوپارے کہ پاک چین سنگتی آخبت اٹی ہم ہندا وڑ سوگو، پائیدار و بے مٹ مریک۔