گورنر خیبرپختونخوا تون ڈاکٹر نیک بادشاہ نا کماشی ٹی معذور بندغ آتا ڈل انا اوڑدہی، مون تروک ویل آتیان معلومدار کریر

پشاور ۔ 24 دسمبر (اے پی پی) گورنر خیبرپختونخوافیصل کریم کنڈی تون ایکشن کور کمیٹی ٹانک انا جنرل سیکرٹری ڈاکٹر نیک بادشاہ نا کماشی ٹی معذور بندغ آتا ڈل اوڑدہی کرے و اودے ٹانک و کیبی علاقہ غاتے مون تروک ویل آتیان معلومدار کرے ۔ ترجمان گورنر ہاؤس پشاور نا رداٹ اوڑدہی ٹی ڈل ٹانک و کیبی علاقہ غاتے مون تروک السی ویل آتیان گورنر ءِ معلومدار و محسود قبیلہ نا بھس مروک ہند آتا نسخان تا معاوضہ زہمی خاہوت آتے دمدستی وڑاٹ ادا کننگ نا خواست کرے۔ داکان بیدس شکتوئی نا علاقہ ٹی بجلی نا مریس و غیراعلانیہ لوڈشیڈنگ ، کم وولٹیج و بنداوی آسراتی تا کمتی آ ہم گڑتی نا درشانی ءِ کننگا۔ اوڑدہی ٹی معذور بندغ آتا ویل آتے خصوصی وڑاٹ تالان کننگا۔ ڈل ٹانک اٹی لوڈشیڈنگ آن الس ءِ مون تروک ویل آتیان ہم گورنر ءِ معلومدار کرے ہراڑآ فیصل کریم کنڈی باوری کرفے کہ او محسود قبیلہ نا زہمی، معذور بندغ و ٹانک نا الس ءِ مون تروک ویل آتا ایسری کن تینا کنڈآن ہرممکن کمکاری فراوان کیک۔ او تعلقدار کمامدار آتون رابطہ کرسا ویل آتا ایسری کن گچین گام گیج نا پارت کننگ نا ہم باوری کرفے۔