پاکستان اٹی زرگزرانی سوگوی، اصلاحات و پالیسی تا چرجوئی آن ملکی و جہانی کہو ل آ پت بحال، زرگزران برآمد آتیا تالان شونداری نا کنڈآ ہِننگ ءِ، وزیرخزانہ محمد اورنگزیب نا پنی آ امریکی جریدہ ٹی شینک مروک آ انٹرویو

اسلام آباد۔ 24 دسمبر (اے پی پی) بنجائی وزیر خزانہ ومحصولات سینیٹر محمد اورنگزیب پارینے کہ پاکستان اہم زرگزرانی موڑ آ سرمسنے، زرگزرانی سوگوی پدریسہ اصلاحا ت وپالیسی تا چرجوئی آن ملکی وجہانی کہول آ پت بحال مننگ ءِ، زرگزران داسہ بیرہ سوگوی نا ریسہ غان پیش تمسا برآمد آتیا تالان شونداری نا کنڈآ ہِننگ ءِ، ہندی و درملکی زرکارآتیکن پوسکن وارخواہی ودی مننگ ءِ و ملک پائیدار مریس مدی شونداری نا کسر آ ہنانے۔ داخیال آتا درشانی ءِ او (اسہ انٹرویو اسے ٹی ظاہر کرے ہرا منہ ہفتہ مست ہلنگاسس و داسہ پنی آ جہانی اخبار یوایس اے ٹوڈے ٹی شینک مروک آ 16 پنہ غاتیا تالان خصوصی اشاعت ‘‘ پاکستان اسپیشل رپورٹ‘‘ اٹی شینک مسنے)۔ دارپورٹ اٹی پاکستان نا زرگزران ، زرکاری نا مون آ بروک وارخواہی و اہم پالیسی اولیت آتیا سرجمی اٹ جاچ و چاہندار آتا سلاہ اوار ءِ۔ سینیٹر محمد اورنگزیب پارے کہ مالی سا ل 2025 نا بناپاکستان گچین زرگزرانی بنداوتون کرے ہراٹی آجو زرگزران نا سوگوی پیشن نا کھاتہ غاتیٹی گچینی و پنجرجاتی اصلاحات آن سوگو وابستگی ہم اوار ءِ۔ اوپارے کہ سال آتیان پد اولیکو وار پاکستان پرائمری بجٹ سرپلس و کرنٹ اکاؤنٹ سرپلس دوئی کرینے ہرا پدریسہ نسخان تا چکر آن پیش تمنگ نا پیدوار چیدہ ءِ، زرراہی تس اٹی نمان ودکی دا گچینی نا اہم سوب جوڑ مس وخت اس کہ کبینی 38 درسد نا بڑزکو کچ آن کم مرسا سنگل ڈیجٹ آ بسنے، زرمبادلہ نا کوڑی 14.5 ارب ڈالر آن گدرینگانے ہراڑآن کم و ود دونیم تُو انا درآمد آتا احاطہ ممکن و شرح مبادلہ ٹی سوگوی آن زرکار آتا پت بحال مس۔ وزیرخزانہ پیدوار کرے کہ دُن تو زرگزرانی سوگوی المی بنداو ءِ ولے پائیدار شونداری اصل چیلنج ءِ۔ اوپارے کہ تدوک آ مالی سال اٹی 2.7 درسد زرگزرانی نمو مثبت ضرور ارے ولے ترندی اٹ ودوک آ آبادی نا گرج آتے پورو کننگ کن گنج اس اف ۔ اوپارے کہ مستین نا آزموندہ غاتے مون آ تخسا حکومت کھپت و وام تیا تالان شونداری نا ماڈل آن اسہ کنڈ برآمد آتیا تالان حکمت عملی اس اختیار کننگ ءِ، ساڑی آ بجٹ اٹی خراج اصلاحات، توانائی نا بشخ اٹی گچینی، سرکاری ادارہ غاتا اصلاح و ٹیرف اصلاحات اوار ءِ ہرافتا مسخت دہائی تیا تالان تحفظاتی نظام نا چٹفنگ و جہانی مسابقت اٹی ودکی ءِ۔ سینیٹر محمد اورنگزیب پارینے کہ پاکستان تینا زرگزرانی حکمت عملی ءِ جہانی طلب اٹی بدلی تتون ہم گرنچ کننگ انگ ءِ ہراڑے آئی ٹی سروسز، ٹیکسٹائل و کشاری برآمد آک نمان بشخ ءُ۔ اونا پاننگ ئس کہ آئی ٹی برآمدات چار ار ب ڈالر آن گدرینگانو و جوان پالیسی چرجوئی اتون بروک آ پنچ سال اٹی اِراہنداخہ مننگ کیرہ، برآمد کنندگان آتیکن خراج نظام ءِ آسان کننگ و انتظامی اڑاند آتے کم کننگ نا گام گیج ہم برجاءِ۔