پاکستان ءُ امارات ءِ سیادی ءِ بنیات ءَ سدانی سال  یکے دومی ءِ شرپ، دوستی ءُ نزیکیں کمک ءِ سرا مزن وزیر شہباز شریف ءَ امارات ءِ سفیر سالم محمد سالم البواب الزابی ءَ گوں گپ ءُ تران

اسلام آباد۔23دسمبر  (اے پی پی): مزن وزیر محمد شہباز شریف ءَ پاکستان ءُ متحدہ عرب امارات ءِ نیام ءَ دیریں ءُ برات ءِ سیادی ءِ توسیپ کتگ ءُ گوشت کہ دوئیں ملک آنی نیام ءَ سیادی دہائی آنی تہ ءَ یکے دومی ءِ شرپ، دوستی ءُ نزیکیں کمک ءِ سر ءَ بندوک انت ءُ امارات ءِ صدر صدر شیخ محمد بن زاید النہیان  ءِ پاکستان ءِ تر ءُ تاب ءِ ودار ءَ انت۔ آئی ءَ اے ھیالانی درشانی پاکستان ءَ امارات ءِ سفیر سالم محمد سالم البواب الزابی ءَ گوں گپ ءُ تران کنان ءَ کت اَنت آئی ءَ سئے شمبے ءِ روچ ءَ مزن وزیر گس ءَ آئی ءَ گوں گند ءُ نند کت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ گند ءُ نند ءَ مزن وزیر ءِ ھاسیں کمکار طارق فاطمی ءُ دری کارانی سیکرٹری آمنہ بلوچ ھم ساڑی بوتگ اَنت۔ مزن وزیر ءَ اماراتی سروک ءَ را گرمیں وش اتک کت ءُ آئی ءَ را گوستگیں وھد ءَ پاکستان ءِ سروکی ءِ پد ءَ مبارک بات دات۔ مزن وزیر ءَ پاکستان ءُ امارات ءِ نیام ءَ دیریں ءُ براتی سیادی ءَ را ساڑات ءُ گوشت کہ دوئیں ملک آنی نیام ءَ دہائیاں چہ وت مہ وتی ءِ شرپ ءُ شرپ، دوستی ءُ نزیکیں کمک ءِ بنیات بوتگ۔ مزن وزیر ءَ امارات ءِ سروکی ءِ ھاتر ءَ نیکیں واھشت ءُ منت واری ءِ احساسات ءِ درشان کنان ءَ گوشت کہ امارات ءِ صدر ءُ ابوظہبی ءِ حاکم ہز ہائینس شیخ محمد بن زاید النہیان ءِ پاکستان ءِ تر ءُ تاب ءِ ودار ءَ آں۔ مزن وزیر ءَ دوئیں ملک آنی نیام ءَ دو نیمگی تجارت ءِ کساس ءِ سر ءَ دل یکیمی ءِ درشان کنان ءَ اقتصادی سیادی ءَ را گیش دیمروئی دیگ ءِ ضلورت ءِ سر ءَ زور پر دات، تجارتی ءُ سرمایہ کاری ءِ موہ آناں گیش کنگ، توانائی، معدنیات، آئی ٹی، ریلوے ءُ ہوابازی ءِ وڑیں شوبگ آنی تہ ءَ کمک ءَ را گیش پراھی کنگ ءِ ضلورت ءِ سر ءَ زور پر دات۔ مزن وزیر ءَ پاکستان ءُ امارات ءِ سیادی ءَ را گیش مھکم کنگ ءِ واستہ پاکستان ءِ مھکمیں جزم ءِ سر ءَ زور پر دات ءُ امارات ءَ را پاکستان ءِ اقتصادی دیمروئی ءُ برجائی ءِ واستہ کلیدی شوبگ آنی تہ ءَ سرمایہ کاری ءِ دعوت دات۔ آئی ءَ انسانی کمک ءُ دیمروئی منصوبگ آنی تہ ءَ مشکلیں وھد ءَ پاکستان ءِ برجاھیں کمک ءِ ھم ساڑات۔ سفیر سالم محمد سالم البواب الزابی ءَ مزن وزیر ءِ شگر ءُ منت گپت ءُ امارات ءِ  صدر  شیخ محمد بن زاید النہیان ءِ نیکیں واھگ ءُ مبارکی آناں سر کت۔ آئی ءَ توامیں شوبگ آنی تہ ءَ پاکستان ءِ گوما وتی شریکداری ءَ را گیش گہتر کنگ ءِ واستہ امارات ءِ مھکمیں عزم ءِ سر ءَ زور پر دات ءُ مزن وزیر ءَ را دل یکیمی دات کہ آ دوئیں ملک آنی وت مہ وتی مفاد آنی تہ ءَ کمک ءِ واستہ نوکیں موہ آناں شوھازگ ءِ واستہ ھمک رنگ ءِ کوشست ءَ کنت۔