مزن وزیر شہباز شریف ءِ سروکی ءَ وفاقی کابینہ ءِ دیوان، ویزا کلیئرنس سسٹم، پی پی آر اے آرڈیننس 2002 ءِ تہا مٹ ءُ بدلی، نیشنل یونیورسٹی فار سیکورٹی سائنسز اسلام آباد 2025 ءِ بل ءِ رد کنگ ءِ منظوری

اسلام آباد۔23دسمبر  (اے پی پی): وفاقی کابینہ ءَ وزارت داخلہ ءِ سفارش ءِ رد ءَ ویزہ کلیئرنس سسٹم ءِ منظوری داتگ کہ ایشی ءِ مول ءُ مراد یک شفاف ءُ ایمنیں نظام ءِ چیر دستی ءَ درملک ءَ روگ ءَ پاکستانی آنی واستہ ویزہ ءِ گرگ ءَ آسراتی دیگ اِنت۔ وفاقی کابینہ ءَ نیشنل یونیورسٹی فار سیکورٹی سائنسز اسلام آباد 2025 ءِ بل ءِ رد کنگ ءُ سرکاری خریداری ریگولیٹری اتھارٹی آرڈیننس 2002 (پی پی آر اے آرڈیننس 2002) ءِ تہا مٹ ءُ بدلی ءِ ھاتر ءَ ہم اصولی منظوری داتگ۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ سئے شمبے ءِ روچ ءَ مزن وزیر محمد شہباز شریف ءِ سروکی ءَ وفاقی کابینہ ءِ دیوان مزن وزیر گس ءَ برجم دارگ بوت۔ مزن وزیر ءَ دیوان ءَ گوں گشتانک دیان ءَ گوشت کہ پاکستان ءِ حکومت ملک ءِ دیمروئی، وشھالی ءُ سیاسی یکوئی ءِ واستہ توامیں سیاسی گل آنی گوما ایمن گپ ءُ تران ءِ وتی اصولی موقف ءِ سر ءَ جزم اِنت۔ آئی ءَ گوشت کہ بازیں رند ءَ درستیں سیاسی گل آناں گپ ءُ تران ءِ پیشکش کنگ بوتگ ءُ سیاسی گپ ءُ تران ءِ آڑ ءَ امن ءُ ایمنی ءِ جاور ھال آناں ھراب کنگ ءِ ھچ وڑیں نا شریں کوشست ءَ را سوبمند بوھگ ءِ موہ دیگ نہ بیت۔ آئی ءَ گیش گوشت کہ حکومت پی آئی اے ءِ شفاف، مستند ءُ معتبریں نجکاری ءِ عمل ءَ را دل یکیمی کنگ ءِ واستہ ھرچ وڑیں گامگیج زورگ ءَ اِنت۔ آئی ءَ سرجمیں راج ءَ را انڈر 19 ایشیا کپ ءِ سوبمندی ءِ سر ءَ ھم مبارکی دات۔ وفاقی کابینہ ءَ پٹرولیم ڈویژن ءِ سفارش ءِ سر ءَ آف گرڈ پاور پلانٹس لیوی ایکٹ 2025 ءِ توسیپ ءِ ھم منظوری داتگ کہ ایشی ءِ تہ ءَ سیمی مردم آنی نیمگ ءَ قیدی پاور پلانٹ آناں گیس ءِ بہا کنگ ھوار کنگ بہ بیت۔ وفاقی کابینہ ءَ سرکاری حصولیابی ریگولیٹری اتھارٹی آرڈیننس 2002ءِ تہا اصولی مٹ ءُ بدلی ءِ ہم منظوری داتگ کہ سرکاری ٹینڈرنگ ءُ حصولیابی ءِ درستیں مراگشاں نوکیں لوٹ آنی گوما ہمگرنچ کنگ بہ بیت۔ ایشی ءَ ابید وفاقی کابینہ ءَ نیشنل یونیورسٹی فار سیکورٹی سائنسز اسلام آباد بل 2025 ءِ رد کنگ ءِ منظوری داتگ ءُ راجی اسمبلی ءَ کمیٹی جوڑ کتگ تانکہ نجی باسک آنی بل ءُ ایندگر کانود آنی سر ءَ جوانیں رنگ ءَ شور ءُ سلاھ کنگ بہ بیت۔ وفاقی کابینہ ءَ نیشنل کینابیس کنٹرول اینڈ ریگولیٹری پالیسی 2025ءِ ھم منظوری داتگ کہ ایشی ءِ مول ءُ مراد ملک ءَ دواسازی ءُ ٹیکسٹائل ءِ شوبگ ءَ بوٹانیکل پلانٹ آنی کارمردی ءَ را گیش کنگ اِنت۔ وفاقی کابینہ ءَ وزارت داخلہ ءِ سفارش ءِ سرا ویزا کلیئرنس سسٹم ءِ منظوری داتگ کہ ایشی ءِ مول ءُ مراد یک شفاف ءُ ایمنیں نظام ءِ چیر دستی ءَ درملک ءَ روگ ءَ پاکستانی آنی واستہ ویزہ ءِ گرگ ءِ آسراتی دیگ اِنت۔ وفاقی کابینہ ءَ 20 اکتوبر 2025، 5 نومبر 2025 ءُ 21 نومبر 2025 ءَ کابینہ کمیٹی ءِ قانون ساز کیس آنی دیوان آنی تہ ءَ کتگیں پیسلہ آنی منظوری کتگ ات۔