برجائی، جتا جتائیں شعبہ آنی تہ ءَ کوکا  ءِ گہتری  ءُ ملکی ءُ میاں اوستمانی سرمایہ کار آنی تہ ءَ گیشی ءِ سبب ءَ اسٹاک مارکیٹ ءِ تہ ءَ راجدپتری ترندی پیداک اِنت،   خرم شہزاد

اسلام آباد۔22دسمبر  (اے پی پی): وزیر خزانہ ءِ مشیر خرم شہزاد ءَ گوشت کہ سرجمیں معیشت ءِ استحکام، جتا جتائیں شوبگ آنی تہ ءَ ڈھانچہ ءِ اصلاحات ءُ ملکی ءُ میاں اوستمانی سرمایہ کار آنی دلبڈی ءِ تہ ءَ گیشی ءِ سبب ءَ اسٹاک مارکیٹ ءَ راجدپتری دیمروئی ءِ گندگ بوھگ ءَ اِنت۔ سرمایہ کار آنی کساس 450ہزار ءَ سر بوتگ کہ ایشی ءِ تہ ءَ گوستگیں 15ماہ آنی تہ ءَ 120ہزار سرمایہ کار ھوار بوتگ اَنت۔ دو شمبے ءِ روچ ءَ سوشل نیٹ ورک ویب سائٹ ایکس ءِ سر ءَ وتی ھاسیں ویڈیو کلوہ ءِ تہ ءَ آئی ءَ گوشت کہ پاکستان ءِ اسٹاک مارکیٹ نوکیں بالاد آنی سر ءَ سر بوھگ ءَ اِنت۔ کے ایس ای 100 انڈیکس 171ہزار پوائنٹ ءَ سر بوتگ کہ اے نوکیں ریکارڈ اِنت۔ مارکیٹ ءِ تہا رونق ءِ اے سلسلہ برجاہ بیت ءُ گمان انت کہ نوکیں سرمایہ کاری ہم مارکیٹ ءَ کیت۔ خرم شہزاد ءَ گوشت کہ اے سال ءِ جنوری ءَ بگر داں دسمبر ءِ میان ءَ اسٹاک مارکیٹ ءَ 48درسد منافع داتگ، اے درگت ءَ اے گلوبل مارکیٹ آنی تہ ءَ کلیدی مارکیٹ جوڑ بوتگ کہ اودا گیش ءَ چہ گیش منافع رسگ ءَ انت۔ گوستگیں دو سالانی تہا 200 درسد ریٹرن داتگ کہ دنیا ءِ ہچ اسٹاک مارکیٹ ءَ اے کار نہ کتگ۔ آئی ءَ گوشت کہ سرجمیں معیشت ءِ استحکام، جتا جتائیں شوبگ آنی تہ ءَ ڈھانچہ ءِ اصلاحات ءُ ملکی ءُ میاں اوستمانی سرمایہ کار آنی تہ ءَ گیشی ءِ اعتماد ھما چیز اَنت کہ ایشی ءِ سبب ءَ اسٹاک مارکیٹ ءَ را دیمروئی کنگ ءَ اِنت۔ اے گامگیجاں چہ اے ھم پدر بوتگ کہ ملک ءِ معیشت ءِ رھبند راست اِنت۔ آئی ءَ گوشت کہ وشیں ھال ایش انت کہ اسٹاک مارکیٹ ءَ مزنیں کساسے ءَ نوکیں سرمایہ کار آھگ ءَ انت ءُ انوگ ءَ تاں سرمایہ کار آنی کساس 450 ہزار ءَ سر بوتگ، ایشی ءِ تہ ءَ گوستگیں 15ماہ ءِ تہ ءَ یک لکھ لکھ سرمایہ کار ھوار بوتگ انت۔ نیکیں گپ ایش انت کہ گیشتر انفرادی خوردہ سرمایہ کار ایشی ءِ نیمگ ءَ آھگ ءَ انت، چیا کہ نوں پبلک اسٹاک ءُ ایکویٹی مارکیٹ ءِ نیمگ ءَ آھگ ءَ انت۔ آئی ءَ گوشت کہ جنوری ءَ تاں ستمبر ءَ کارپوریٹ منافع ءَ 14درسد گیشی بوتگ، ءُ جولائی ءَ تاں ستمبر ءَ تاں وھد ءِ تہ ءَ منافع ءَ 9درسد گیشی ریکارڈ کنگ بوتگ۔ ایشی ءِ بزانت ایش انت کہ سود ءِ شرح ءِ کمی ءَ چہ منافع ءَ را گہتر کنگ ءُ صنعت آناں آسراتی رسگ ءَ انت۔ آئی ءَ گوشت کہ میوچل فنڈز آنی اثاثہ آنی تہ ءَ گیشی بوتگ کہ اے نیکیں گپ اِنت۔ باہمی فنڈز ءِ اثاثہ چار کھرب کلدار ءَ چہ گیش بوتگ انت۔ ایکویٹی مارکیٹ ءِ تہا باہمی فنڈ ءِ اوسط 27 درسد انت۔ خرم شہزاد ءَ گوشت کہ یک دگہ وشیں ھال ایش انت کہ 16 نوکیں آئی پی او آھگ ءَ انت، ایشی ءَ چہ سرمایہ کار آناں گیش موہ رس ایت۔ بازیں دہائیاں چوش نہ بوتگ کہ یک سالے ءِ مدت ءَ 16 نوکیں آئی پی او بوتگ انت۔ اے مزنیں اعتماد ءِ نشانی اِنت۔ 2022 ءَ ارب ڈالر ءِ کمپنیانی کساس 3 بوتگ ءُ نوں 18 ءَ سر بوتگ ءُ آیوکیں وھد ءَ اے کساس ءَ گیش بوھگ ءِ امکان اِنت۔