راجی ورنا پالیشی ورنا آناں ذاتی، وانگ ءُ زانگ ءُ پیشہ وارانہ دیمروئی ءِ واستہ پکوئیں  راہ ءُ درانی پجارینگ ءِ بنیات جوڑ بوتگ، مزن وزیر ءِ ورنا پروگرام ءِ چیئرمین رانا مشہود احمد خان ءَ میاں اوستمانی MOIC سمٹ پاکستان 2025 ءِ بنگیج ءِ مراگش ءَ گوں تران کنان ءَ گشتانک

اسلام آباد۔22دسمبر  (اے پی پی): مزن وزیر ءِ ورنا پروگرام ءِ چیئرمین رانا مشہود احمد خان ءَ گوشت کہ راجی ورنا پالیشی ورنا آناں ذاتی، وانگ ءُ زانگ ءُ پیشہ وارانہ دیمروئی ءِ واستہ منظم راہ آنی پجارینگ ءِ بنیات جوڑ بوتگ ءُ وفاقی حکومت اے ھاسیں گامگیج ءَ را گیش زورگ ءَ چہ ورنا آناں ھمک پڑ ءَ مھکم کنگ ءِ واستہ کار کنگ ءَ اِنت۔ آئی ءَ اے ھیالانی درشانی ایچ ای سی ءَ برجم داشتگیں میاں اوستمانی ایم او آئی سی سمٹ پاکستان 2025 ءِ بنگیجی مراگش ءَ گوں تران کنان ءَ کت۔ آئی ءَ گوشت کہ حکومت ورنا آناں توانمند کنگ ءُ آوانی واستہ موہ پیداک کنگ ءِ واستہ جزمیگ انت۔ مراگش ءَ اسلامی تعاون ورنا فورم ءِ صدر، ہائیر ایجوکیشن کمیشن ءِ نمائندگ ءُ پاکستان ءِ ورنا آں ھم بہر زور اِت۔ وتی گشتانک ءِ تہ ءَ رانا مشہود احمد خان ءَ پنجاب ءَ وتی وھد ءِ یات کت کہ اودا پاکستان ءِ اولی راجی ورنا پالیشی ھما وھد ءِ سر وزیر محمد شہباز شریف ءِ وژن ءِ چیر دستی ءَ دیم ءَ آرگ بوتگ۔ اے پالیسی ءَ ورنا آناں ذاتی، وانگ ءُ زانگ ءُ پیشہ وارانہ دیمروئی ءِ واستہ منظم راہ آنی پجارینگ ءِ بُن ھشت ایر کتگ ءُ وفاقی حکومت اے ھاسیں گامگیج ءَ را گیش ءَ چہ گیش برگ ءَ چہ ورنا آناں ھرچ پڑ ءَ مھکم کنگ ءِ واستہ کار کنگ ءَ اِنت۔ رانا مشہود احمد خان ءَ اے گپ ءِ سر ءَ زور پر دات کہ ورنا آنی تہ ءَ سرمایہ کاری راجی دیمروئی ءِ اولی ترجی اِنت ءُ وانگ ءُ زانگ ءِ کوالٹی ، ہنر ءِ تربیت ءُ روزگار ءِ موہ آناں گیش کنگ ءِ سر ءَ ھاسیں دلگوشی دیگ بوھگ ءَ اِنت تانکہ نوکیں نسل جھان ءِ پڑ ءَ مقابلہ کت کنت۔ مزن وزیر ءِ ورنا پروگرام ءِ چیر دستی ءَ چار آسانی ءِ جتا جتائیں گامگیج آنی تہ ءَ اسکالرشپ ءُ ایندگر کمکی پروگرام آنی تہ ءَ سرجمیں ملک ءَ ورنا آناں سوبمند بوھگ ءِ واستہ المی وسیلگ ءُ رہشونی ءِ پھجارینگ ءِ واستہ بندات کنگ بوتگ۔ چیئرمین ءَ گیش گوشت کہ درستیں گامگیج میرٹ ءُ برابریں موہ آنی سر ءَ بنیات ءَ کنگ بنت، تانکہ ھر ورنا وتی توانائی، محنت ءُ لگن ءِ بنیات ءَ دیمروئی بہ کنت ءُ منصفانہ ءُ ھواریں چاگرد ءَ سوبمندی ءِ ھاترا جھد بہ کنت۔ رانا مشہود احمد خان ءَ گوشت کہ ورنا آنی سروکی ءِ دیمروئی ءِ واستہ MOIC ءِ وڑیں میاں اوستمانی پلیٹ فارم المی اَنت، ایشی ءِ تہ ءَ ورنا نوکیں ھیال ءُ لیکہ آنی گوما اتک کن اَنت، گلوبل پارٹنر آنی گوما کمک کت کن اَنت ءُ پائیدار دیمروئی ءِ واستہ کمک کت کن اَنت۔ آئی ءَ جار جت کہ پاکستان ھم زوت وتی اولی راجی ای اسپورٹس پالیشی ءَ را دیم ءَ کاریت، ایشی ءَ چہ ڈیجیٹل ءُ گیمنگ ءِ شوبگ ءَ ورنا آنی واستہ نوکیں موہ پیداک بنت ءُ گیش جتائیں کیریئر ءِ راہ پچ بنت۔ اے موہ ءِ سر ءَ اسلامی کمکی ورنا فورم ءِ صدر ءَ پاکستان ءِ ورنا دوستیں پالیشی آنی توسیپ کنان ءَ گوشت کہ پاکستان ورنا آناں بااختیار جوڑ کنگ ءِ واستہ موثر گامگیج زورگ ءَ انت ءُ MOI سروک دیوان ءِ وڑیں فورم یکجائی وژن ءُ کمک ءِ وسیلگ ءَ ورنا آنی آیوکیں وھد ءَ را گہتر کنگ ءِ تہ ءَ مزنیں کرد پیلو کن اَنت۔ میاں اوستمانی MOIC سروک دیوان پاکستان 2025 ءَ ورنا رہشون، پالیسی ساز، ماہرین ءُ میاں اوستمانی شریک یکجاہ بنت ءُ ورنا آنی دیمروئی، جدت، کاروباری موہ ءُ جھان ءِ کمک ءِ وڑیں کلیدی سرھال آنی سر ءَ گپ ءُ تران کن اَنت۔ سروک دیوان ءَ بھر زوروک آناں وتی گیواری، جوانیں کار ءُ کرد ءُ ھیال آنی پیش کنگ ءَ پاکستان ءِ ورنا آنی واستہ موثر پالیسی سازی ءِ تہ ءَ کمک کنگ ءِ موہ رس ایت۔