وزارت موسمیاتی بدلی و چاگڑدی ہم گرنچی سی آئی ٹی ای ایس مینجمنٹ اتھارٹی نا کمک اٹ 2025-26کن ٹرافی ہنٹنگ کوٹہ نا منظوری ءِ تس

اسلام آباد۔ 22 دسمبر (اے پی پی) وزارت موسمیاتی بدلی و چاگڑدی ہم گرنچی پاکستان نا سی آئی ٹی ای ایس مینجمنٹ اتھارٹی نا کمک اٹ 2025-26کن ٹرافی ، ہنٹنگ کوٹہ نا منظوری ءِ تسنے، دا فیصلہ پک آبادیاتی سرویز و سائنسی شاہدی تا بنداو آ کننگانے ہرا پاکستان اٹ شفاف و شاہدی تیا تالان وائلڈ لائف گورننس نا کنڈآ اسہ اہم ءُ پیش رفت اسے۔ دوشنبے نادے آ وزارت موسمیاتی بدلی و چاگڑدی ہم گرنچی آن جاری بیان نا رداٹ پاکستان حیاتیاتی تنوع نا کنونشن و جنگلی حیات و نباتات نا بقاء نا خطرہ غاتا گواچی وڑتا جہانی واپار نا بارواٹی کنونشن (سی آئی ٹی ای ایس) نا دستخط کنندہ ءِ و پائیدار و سائنسی بنداوتیا تالان تحفظ فطرت نا وڑوڈول آتا کمک اٹ تینا جہانی زمواری تا پورو پاسداری نا عزم انا درشانی ءِ کیک۔ 2025-26کن منظور مروک ٹرافی، ہنٹنگ کوٹہ ہرا وڑتیکن جتا کننگانے اوفتے ٹی مارخور، ہمالیان ابیکس، سندھ آئی بیکس، بلینڈ فورڈیوریئل، پنجاب یوریئل، بلوشیپ و کینیون گزیلی اوار ءُ، دا کوٹہ جہانی کہول آ امنا مروک پائیدار کاریم اٹ اتنگ نا اصول آتا رداٹ ءِ و صوبائی وائلڈ لائف محکمہ غاتا کنڈآن فراوان کروک آبادیاتی حساب وکتاب نا محتاط جاچ آ تالان ءِ۔ بنجائی وزیر موسمیاتی بدلی ڈاکٹر مصدق مسعود ملک نا کماشی ٹی وزارت کوٹہ الاٹمنٹ نا عمل ءِ پین گچین و منظم کرینے تانکہ شفاف ، جوابدہی و شاہدی تیا تالان فیصلہ سازی ءِ مون آ دننگ مرے و تحفظ فطرت نا بابت فیصلہ انتظامی روایت نا جاگہ غا پک سائنسی معلومداری تا بنداو آ کننگے۔ وزارت مچ آملک اٹی وائلڈ لائف سروے نا وڑوڈول ءِ سوگو و آب اٹ جوڑ کننگ ہم کوشست کننگ ءِ تانکہ آبادی نا بابت زیات سوگو و پت انا قابل حساب وکتاب دوئی کننگ مرے، دا گام گیج آتا مسخت جنگلی حیات نا رکھ انا گچین نتیجہ غاتون اوار اوار ہندی آبادی ءِ ہم فائدہ تننگ ءِ ہراڑے کمیونٹی بیسڈ کنزرویشن ءِ پاکستان نا وائلڈ لائف مینجمنٹ فریم ورک نا اہم تمبہ گوندنگانے۔ دا گام پائیدار وائلڈ لائف نا کاریم اٹ اتنگ، جہانی تحفظ فطرت ناخواست آتا پاسداری و داوڑنا تحفظی ماڈل آتیکن پاکستان نا عزم انا عکاسی ءِ کیک ہرا چاگڑدی توازن و راجی و زرگزرانی فائدہ غاتا نیام اٹ ہم گرنچی ودی کیک۔