فیلڈ مارشل سید عاصم منیر نا سعودی وزیر دفاع شہزادہ خالد بن سلمان بن عبدالعزیزآل سعود تون اوڑدہی

راولپنڈی۔ 22 دسمبر(اے پی پی) چیف آف ڈیفنس فورسز و چیف آف آرمی اسٹاف فیلڈ مارشل سید عاصم منیر مملکتِ سعودی عرب نا سرکاری دورہ ٹی سعودی عرب نا وزیر دفاع شہزادہ خالد بن سلمان بن عبدالعزیز آل سعود تون اوڑدہی کرے۔ دوشنبے نادے آ پاک فوج انا شعبہ تعلقات عامہ (آئی ایس پی آر) نا رداٹ اوڑدہی ٹی تین پہ تینی است خواہی نا امور آ گپ وتران کننگا ہرافتے ٹی علاقائی سلامتی نا حالیت، دفاعی و عسکری کمکاری ، اسٹریٹجک شریداری نا عمل و بدل مروک جیو اسٹریٹجک چیلنج آک اوار ئسر۔ داوخت آ پاکستان و سعودی عرب نا نیام اٹ گہرا، تاریخی و ایلمی تعلقداری تے اسہ وار ولدا پک کننگا۔ خادمِ حرمینِ شریفین شاہ سلمان بن عبدالعزیز آل سعود نا جاری کروک شاہی فرمان نا رداٹ فیلڈ مارشل سید عاصم منیر ءِمملکتِ سعودی عرب نا بڑزکو انگا قومی اعزاز کنگ عبدالعزیز میڈل(بڑزکودرجہ) ہم تننگا۔ دا اعزاز فیلڈ مارشل سید عاصم منیر نا شاندار عسکری خذمت و سرکڑدہ ئی، پاکستان و سعودی عرب نا نیام اٹ دفاعی کمکاری، اسٹریٹجک ہم گرنچی و ادارہ جاتی رابطہ غاتا مون آ دننگ اٹ اونا اہم کڑد انا اعتراف ءِ۔ دا اعزاز علاقائی امن  و سوگوی کن اونا خذمت، خاص کر دہشت گردی تور و سلامتی نا بشخ آتیٹی پدریسہ کمکاری نا عکاسی ءِ ہم کیک۔ سعودی سرکڑدہ فیلڈ مارشل سید عاصم منیر نا کسبی لائخی و اسٹریٹجک وژن نا ستاءِ کرسا ہڑتوم آملک آتا متکن ، ایلمی تعلقداری تے سوگو کننگ کن اونا عزم انا ستاءِ کرے۔ فیلڈمارشل سید عاصم منیر خادم حرمین شریفین  و سعودی سرکڑدہ غاتا اعزاز تننگ آ منت واری ءِ ہرفسا اودے پاکستان و سعودی عرب نا نیام اٹ سوگو وپائیدار تعلقداری تا چیدہ گوندا۔ اومملکت سعودی عرب نا سلامتی، سوگوی و شونہالی کن پاکستان نا عزم انا درشانی ءِ کرے۔ کنگ عبدالعزیز میڈل (بڑزکو درجہ) نا دا اعزازی دود پاکستان و سعودی عرب نا تعلقداری تا کڑمبی و علاقائی و جہانی امن نا مون  آ دننگ کن ہڑتوم آملک آتا اسیجائی عزم انا ڈیک ءِ۔