صدر آصف علی زرداری ءَ عراق ءِ نگہبان مزن وزیر محمد شیاع السوداسنی ءَ گوں گند ءُ نند کتگ، دو نیمگی کمک ءُ وت مہ وتی مفاد ءِ اولویت ءِ شوبگ آنی تہ ءَ عملی گامگیج آنی سر ءَ گپ ءُ تران

بغداد۔21دسمبر  (اے پی پی): صدر آصف علی زرداری ءَ گورنمنٹ پیلس ءَ عراق ءِ نگہبان مزن وزیر محمد شیاع السودانی ءَ گوں گند ءُ نند کتگ ءُ وت مہ وتی مفاد ءِ اولیت ءِ شوبگ آنی تہ ءَ دو نیمگی کمک ءُ عملی گامگیج آنی سر ءَ گپ ءُ تران کتگ۔ صدر ءِ مملکت ءَ گرم مہمان داری ءِ پد ءَ عراق حکومت ءِ شگر ءُ منت گپت ءُ پارلیمانی گچین کاری ءِ عمل ءِ سرجمی ءِ پد ءَ عراق الس ءَ را مبارک بات دات۔ آئی ءَ عراق ءَ سروکی  ءِ پرامن ٹرانزیشن ءُ دیمروئی ءِ کوشست آنی برجائی ءِ واستہ وتی واھشت آنی درشان کت: پاکستان عراق ءِ گوما وتی دیریں ءُ براتی سیادی آناں ارزشت دنت ءُ یک منظم ءُ موثر عمل ءِ وسیلگ ءَ کمک ءَ را دیمروئی دیگ ءِ واستہ عراقی حکومت ءِ گوما نزیکی ءَ کار کنگ ءِ واستہ جزم اِنت۔ دوئیں رہشون آں دو نیمگی سیادی ءَ را گیش گیش کنگ ءِ واستہ یک شلی ءَ  مزن تک ءِ تبادلہ ءِ ارزشت ءِ سر ءَ تپاک کت۔ یک شمبے ءِ روچ ءَ صدارتی ایوان ءِ پریس ونگ ءِ نیمگ ءَ جاڑی بوتگیں بیان ءِ رد ءَ دوئیں بامرد آنی نیام ءَ اقتصادی ءُ مالیاتی کمک ءَ را گیش کنگ ءِ سر ءَ تپاک کنگ بوتگ۔ صدر مملکت ءَ اے گپ ءِ سر ءَ دلگوش کت کہ استیں تجارتی حجم چہ اُمیت ءَ باز کم اِنت ءُ ارادہ آناں عملی آسر آنی تہ ءَ بدل کنگ ءِ واستہ یکجاھیں کوشست آنی ضلورت اِنت۔ آئی ءَ گوشت کہ پاکستان انفارمیشن ٹیکنالوجی، کشت ءُ کشار ءُ وردن ءُ وراک ءِ سیکورٹی، جوڑیشت، دوائی ءُ دوا ءُ درمان ءِ وڑیں اولی شوبگ آنی تہ ءَ کمک ءَ را گیش کنگ ءِ واستہ تیار اِنت۔ آئی ءَ تجارت، کاروباری رابطہ ءُ مہمان آنی نقل و حرکت ءِ آسراتی ءِ واستہ براہ راست بینکنگ چینل آنی ارزشت ءِ سر ءَ ھم زور پر دات۔ آئی ءَ بغداد ءَ ھاسیں تجارتی ءُ جان سلامتی ءِ ھوالگ ءَ نمائش آنی تہ ءَ پاکستان ءِ بھر زوری ءِ حوالہ دات ءُ آھاں کاروباری سیادی ءِ پائیدار دیمروئی ءِ نیمگ ءَ گامگیج لیک اِت۔ آئی ءَ یک شلی ءَ  تبادلہ ءُ مجازی رابطہ ءِ وسیلگ ءَ دوئیں ملک آنی چیمبر آف کامرس ءُ نجی شعبہ ءِ نیام ءَ نزیکیں ہمگرنچی ءِ دلبڈی دات۔ آئی ءَ دو نیمگی دفاعی سیادی آنی تہ ءَ برجاھیں پیشرفت، جاری تربیتی پروگرام آنی سرجمی ءِ سر ءَ دل یکیمی ءِ درشان کت۔ آئی ءَ عراق ءِ ضلورت ءُ دیمروئی کنوکیں سیکورٹی جاور ھال آنی رد ءَ دفاعی کمک ءَ را گیش مھکم کنگ ءِ واستہ پاکستان ءِ تیاری ءِ سر ءَ زور پر دات۔ آئی ءَ عراق ءِ نوک جوڑیشت ءِ تہ ءَ کمک کنگ ءِ پاکستان ءِ توانائی ، ہنرمندیں مردمی قوت ، طبی ءُ رسد ءِ آسراتی ، ءُ تفصیلی گورننس ءِ تہ ءَ تکنیکی مہارت ءِ سر ءَ ھم زور پر دات ءُ مردمی قوت ءِ پجارینگ ءِ واستہ استیں فریم ورک ءَ را منظم ءُ گہبودی  پوسٹنگ ءِ واستہ المی لیک اِت۔ عراق ءِ تر ءُ تاب ءَ آیوکیں پاکستانی زیارتی آں گوں سیادی داروکیں جیڈھ آنی سر ءَ ھم سرجمی ءَ گپ ءُ تران کنگ بوت۔ صدر آصف علی زرداری ءَ وزیٹر مینجمنٹ ءِ ھوالگ ءَ مفاہمت نامہ ءِ زوت سرجم کنگ، امیگریشن پوائنٹس ءَ گہتریں آسراتی، ایمرجنسی ٹریول ءِ جیڈھ آنی تہ ءَ لچک ءُ زائرین ءَ را دیم ءَ اتکگیں جیڈھ آنی گیواری ءِ سر ءَ زور پر دات۔ نگران مزن وزیر ءَ تجویز آنی سر ءَ سرگرمیں رپک ءُ برجاھیں کمک ءِ سر ءَ پاکستان ءِ شگر ءُ منت گپت۔ دوئیں نیمگ ءَ ادارگی چینل آنی وسیلگ ءَ رابطہ ءِ برجائی ءُ یکوئی کمک ءَ را دیم ءَ برگ ءِ سر ءَ تپاک کنگ بوتگ کہ ایشی ءَ چہ دوئیں ملک آناں ٹھوس نپ رس ایت۔ صدر ءِ مملکت ءِ ہمراہی ءَ واجہ شیری  رحمان، واجہ سلیم منڈوی والا، گورنر پنجاب سردار سلمیٰ حیدر  خان ءُ عراق ءَ پاکستان ءِ سفیر  ہم ھوار انت۔