پی این ایس خیبر ءِ کمیشننگ راجی زرئی دفاع ءِ ھاتر ءَ یک ھاسیں سنگ میل ءِ ، انجینئر امیر مقام

اسلام آباد۔21دسمبر  (اے پی پی):کشمیر ءِ کار آنی وفاقی وزیر گلگت بلتستان ءُسیفرون ءِ انجینئر امیر مقام ءَ پاک بحریہ ءِ نوکیں جنگی جہاز پی این ایس خیبر ءِ ترکی ءَ بندات کنگ ءَ را راجی زرئی دفاع ءِ واستہ یک ھاسیں سنگ میل ءِ رنگ ءَ لیک اتگ۔ یک شمبے ءِ روچ ءَ وتی بیان ءِ تہ ءَ وفاقی وزیر ءَ پاک بحریہ، دفاعی ماہرین ءُ منصوبگ ءَ گوں سیادی داروکیں درستیں شریک آناں پی این ایس خیبر ءِ ھوار کنگ ءِ سر ءَ مبارک بات دات ءُ گوشت کہ نوکیں جنگی جہاز ءِ ھوار کنگ ءَ چہ پاکستان ءِ دریائی سیمسر آنی رکھینگ ءُ سرجمیں دریائی سیکورٹی ءَ را گیش گہتری کیت۔ آئی ءَ گوشت کہ بدل بوھوکیں دمگی ءُ جھان ءِ ایمنی ءِ جاور آنی تہ ءَ راجی دفاع ءِ واستہ مھکمیں نیوی توانائی المی انت۔ انجینئر امیر مقام ءَ گوشت کہ ملجم کلاس ءِ جنگی جہاز منصوبگ پاکستان ءُ ترکی ءِ نیام ءَ مھکمیں دفاعی کمک، ٹیکنیکل مہارت ءُ یکجائی وژن ءِ کامیابیں مثال انت۔ اے منصوبگ دوئیں ملک آنی نیام ءَ دیریں دوستی ءُ یکے دومی ءِ سر ءَ بھروسہ ءِ درشان اِنت کہ نوکیں دفاعی لوٹ آنی پیلو کنگ ءَ ھاسیں کرد پیلو کنگ ءَ اِنت۔ آئی ءَ گوشت کہ پی این ایس خیبر ءِ وڑیں نوکیں جہاز نہ ایوک ءَ زرئی نگرانی ءُ دفاعی صلاحیت آناں گیش کن اَنت بلکیں زرئی لین آنی رکھینگ، تجارتی کاروائی آناں دیمروئی دیگ ءُ دمگی امن ءُ ایمنی ءِ تہ ءَ کمک کن اَنت۔ وفاقی وزیر ءَ اے امیت سہرا کت کہ پاکستان ءُ ترکی ءِ نیام ءَ دفاعی کمک آیوکیں وھد ءَ ھم مھکم بیت ءُ اے رنگیں یکجائی منصوبگ ملکی ایمنی ءُ دمگی برجائی ءِ واستہ جوانیں آسراتی دینت۔